Aeuin Toropwe seni
Johannes
Kapas akom
I. Chon makkei ei toropwe: Ewe soukünö Johannes.
II. A mak ngeni iö: Mine a makkei a malapei ngeni ekewe mwichefel meinisin.
III. Itelapemongen ei toropwe: Chiechifengen, Sile me Chen.
IV. Kapas aüchean ei toropwe: Kot i manau, saram me chen.
V. Masouen ei toropwe: A wor ruu popun pwe Johannes a makkei aeuin nöün ei toropwe: An epwe apöchöküla chokewe mi aleani ei toropwe ar repwe chiechifengen me Kot pwal ngeni Nöün we Jesus Kraist. A pwal fönöör ar repwe ü ngeni ekewe afalafal mi tongeni atai ei chiechifengen. Ei sokun afalafal mi mwäl a longolong won ewe lükü, pwe mine mi ngau a pop seni än aramas pacheri ei fanüfan. Iei mine Jesus ewe Nöün Kot esap tongeni wesewesen eman aramas. Ekei sense ra apasa, pwe än eman küna manau esemüch, iei an ngas seni öürekin ei fanüfan. Ra pwal aiti ngeni aramas, pwe än eman küna manau esemüch esap pop seni an föföröch ika an tongei chon arun.
Johannes a ü ngeni ei afalafal o afata lon mine a makkei pwe Jesus Kraist i wesewesen aramas, a pwal afatafichi pwe meinisin mi lükü Jesus me echeni Kot repwe pwal fokun echenifengeniir lefiler.
VI. Tettelin masouen ei toropwe:
Kapas akom 1.1-4
Saram me rochopwak 1.5–2.29
Ekewe nöün Kot me nöün Tefil 3.1-24
Let me mwäl 4.1-6
Angangen Chen 4.7-21
Ach pwora lon ach lükü Jesus 5.1-21
1
Ewe Kapasen Manau
1.1-4
1 Äm aia mak ngenikemi usun ewe Kapasen Manau mi nonom chök seni me lepoputän. Aia fen rongorong ren selingem me küna ren mesem, ewer, aia fen küna o atapa ren pöüm. ✡ Joh 1.1 2 Lupwen ei manau a pwäla, aia küna. Iei mine aia kapas usun o asile ngenikemi usun ewe manau esemüch mi nom ren ewe Sam, nge a pwä ngenikem. ✡ Joh 1.14 3 Mine aia fen küna o rongorong aia pwal asile ngenikemi, pwe ämi oupwe etikem lon äm chiechifengen me ewe Sam me Jesus Kraist Nöün we. 4 Aia makkei ei pwe ämi pwapwa epwe unusöchüla.
Kot i Saram
1.5-10
5 Iwe, iei ewe kapas aia rongorong seni Nöün we o aronga ngenikemi: Kot i saram, esap fokun wor rochopwak lon. 6 Are sia apasa pwe sia chiechi ngeni Kot, nge sia nom lon rochopwak, sia chofona lon ach kapas pwal lon ach föför. 7 Nge are sia nonom lon ewe saram usun i a nonom lon saram, iwe, sia chiechifengen lefilach, nge chaan Jesus Nöün we a limetikich seni ach tipis meinisin.
8 Iwe, are sia apasa pwe esap wor ach tipis, sia püsin atupukich, nge esap wor let loch. 9 Nge are sia pwärätä ach tipis ngeni Kot, i epwe apwönüetä an pwon o föri mine a pwüng: Epwe amusala ach tipis o limetikich seni ach pwüngingau meinisin. 10 Are sia apasa pwe sisap tipis, sia achofonai Kot, nge an kapas esap nom loch.