Aeuin nöün Paulus Toropwe ngeni
Timoty
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ewe alüal Timoty, eman chon angang ngeni Kot.
III. Itelapemongen ei toropwe: Kapasen öüröür me fön ngeni Timoty lon wisan me an angang ngeni ewe Pworausen Manau.
IV. Kapas aüchean ei toropwe: Kopwe tümwünü masouen om afalafala ewe Pworausen Manau mi feito seni Kot.
V. Masouen ei toropwe: Timoty, eman alüal mi souläng seni Asia Kisikis, i nöün eman fefin seni Jutea, nge saman eman re Krik. A chieneni Paulus o alisi i lon an angangen missionari. Aeuin nöün Paulus toropwe ngeni Timoty a kapas usun ülüngat sokun ekiek mi aüchea.
Ewe aeuin ekiek mi aüchea eu kapasen fön usun än Timoty epwe ü ngeni ekewe afalafal chofona mi fis lon mwichefel. Ei sokun afalafal a nofitifengeni ekiekin chon Juta me ekiekin ekewe aramas sap ir chon Juta. A longolong won ewe lükülük pwe ei fanüfan a ngau, o esap wor eman a küna manau chilon chök ir mi eäni och sokun silelap mi monomon, pwal ir mi tümwünüfichi ar resap mongö ekoch sokun mongö, resap pwal pwüpwülü. Pwal masouen ei toropwe a mak kapasen öüröür usun emweni mwichefel me usun fel ngeni Kot. A pwal aweweni met sokun manau eman chon emweni mwichefel me eman chon alisi epwe manaueni. Lesopolan Paulus a öüröüra Timoty usun an epwe eman nöün Jesus Kraist chon angang mi mürina, pwal usun wisan ngeni ekewe chon lükülük lon ekewe sokopaten mwich.
VI. Tettelin masouen ei toropwe:
Kapas akom 1.1-2
Kapasen öüröür usun angangen lon mwichefel, pwal usun ekewe nöüwis 1.3–3.16
Kapasen öüröür ngeni Timoty usun an angang 4.1–6.21
1
Kapong
1.1-2
Ngang Paulus, eman nöün Kraist Jesus soukünö fän än Kot ach we Chon Amanau allük me Kraist Jesus ach apilükülük, üa kapong ngonuk Timoty wesewesen nei lon lükülük: Samach Kot me ach Samol Kraist Jesus epwe ngonuk ümöümöch, tong me kinamwe. Föf 16.1
Kapasen fön usun än Timoty epwe ü ngeni ekewe afalafal chofona
1.3-11
Üa mochen pwe kopwe nonometiu lon Efisos, usun üa fen tüngor ngonuk lupwen üa saila Masetonia. Mi wor ekoch aramas ikenan ra afalafalafeili sokun afalafal chofona usun ewe lükülükün souläng. Iwe, kopwe allük ngeniir, pwe repwe ükütiu. Kopwe üreniir, pwe resap asolapala ar fansoun le apworausa ekewe tutulap me tettelin uruwon ekewe lewo, pun ra chök afisätä anini, nge resap apwönüetä än Kot akot fän itach, ewe sia silei ren ach lükü. Popun ai ei allük pwe epwe afisätä ewe chen mi pop seni eu leluk mi limöch me eu mwelien letip mi mürina, pwal eu lükülük mi let. Ekoch aramas ra kul seni ekei sokun mettoch o ra tokola seni aler ren sokopaten kapasen anini mi lomotongau. Ra mochen asukula än Kot kewe allük, nge resap silei mine ra kapas usun ika ekewe mettoch ra fos won fän watten ar apilükülük.
Kich sia silei pwe ekewe Allük ra mürina are sia eäniir lon met pwüngün. Sia pwal silei pwe ekewe allük resap för fän iten ekewe chon pwüng, nge ra för fän iten ekewe chon atai allük me chon ü ngeni mwü, fän iten chokewe resap meniniti Kot me chon tipis, fän iten chokewe resap mochen apini manauer me chokewe resap meniniti lamalam, fän iten chokewe mi niela semer me iner, pwal fän iten ekewe chon niela aramas, 10 fän iten chokewe mi föri föförün lisowu me chokewe mi föri sokun föförün lisowu lefilen mwän me mwän, fän iten chokewe mi soläni aramas me chokewe mi eäni kapas chofona o pwärätä pwärier mi mwäl, pwal fän iten chokewe meinisin mi ü ngeni ewe kapasen Kot mi let sia afalafala. 11 Ei sokun afalafal a pwä lon ewe Pworausen Manau mi lükülük ngeniei pwe üpwe arongafeili, iei ewe Pworausen Manau seni ewe Kot mi ling o pin.
Än Paulus kilisou fän iten än Kot ümöümöch
1.12-20
12 Üa kilisou ngeni Kraist Jesus ach Samol, ewe mi fang ngeniei pöchökül fän iten ai angang. Üa kilisou ngeni ren an ekieki pwe ngang mi allükülük o a awisaei pwe üpwe angang ngeni. 13 Inamwo ika me lom üa kapasingau usun i, üa ariaföüü o turunufaseei. Nge Kot a eäni tong ngeniei, pun esap mwo wor ai lükülük, iei mine üsap silei mine üa föri. Föf 8.3; 9.4-5 14 Iwe, ach Samol a tinatiu woi an ümöümöch mi somwola o fang ngeniei lükülük me chen mi nom lon Kraist Jesus. 15 A allükülük ewe kapas pwe aramas repwe fokun etiwa o lükü: Kraist Jesus a feito lon ei fanüfan pwe epwe amanaua chon tipis. Ngang eman chon tipis mi ngau seniir meinisin. 16 Nge Kot a eäni tong ngeniei, pwe Kraist Jesus epwe pwärala unusen an mosonotam lon met a föri ngeniei, ngang eman chon tipis mi ngau seniir meinisin, pwe üpwe eu minen awewe ngeni chokewe repwe lükü i me mürin o repwe küna ewe manau esemüch. 17 Ewe King mi nonom tori feilfeilachök, ewe eman chök Kot, ewe esap tongeni mäla, esap wor eman a tongeni küna, sipwe meniniti o alinga tori feilfeilachök! Amen.
18 En nei Timoty, üpwe ngonuk ei allük, a usun chök mine ekewe soufos ra apasa usumw me lom. Kopwe aea ekei kapas pwe om pisekin fiu, pwe kopwe mauneni ewe maun mi öch, 19 kopwe pwal amwöchü om lükülük me eu mwelien letip mi mürina. Ekoch aramas resap rongorong ngeni mwelien letiper, iwe, ra küna wata lon ar lükülük. 20 Ruoman me leir Himenäus me Aleksanter, ätekei üa likitiir ngeni Satan pwe epwe apwüngüür. Ren ei repwe kaiö pwe repwe ükütiu le turunufasei Kot.

1:2: Föf 16.1

1:13: Föf 8.3; 9.4-5