2.Samuel
Kapas akom
I. Iten ei puk: Aruuen Samuel, soposopun ekewe pworaus mi mak lon Aeuin Samuel. Lon ewe Paipelin Ipru ekei ruu puk Aeuin me Aruuen Samuel ra chök eu.
II. Chon makei ei puk: Esap fat io a makei.
III. Itelapemongen ei puk: Mine eman aramas a fotuki, iei epwe pwal kini.
IV. Kapas aüchean ei puk: Pworausen uruwon Israel, lupwen Tafit a nemenem, an tur lon tipis me an ekieksefäl.
V. Masouen ei puk Aruuen Samuel: Lon ei puk a mak pworausen uruwon än Tafit nemenem. Akom a nemeni Juta (sopun 1-4), mürin a nemeni unusen Israel (sopun 5-24). Ei pworaus a aiti ngenikich tichikin pworausen än Tafit maun ngeni chon oputan me lon mwün tori ekewe mwün lükün, pwe epwe awattelai mwün o anüküchara an nemenem. A pwä pwe Tafit eman mwän mi alolol an lükülük me achocho le angang ngeni Kot, a pwal föri sokun föför pwe nöün aramas repwe allükülük ngeni. Nge a pwal pwä pwe fän ekoch Tafit a föri föför mi ngau pwe epwe apwönüetä püsin letipan. Nge lupwen nöün ewe Samol mi Lapalap we soufos Natan a apwüngü Tafit, mürin a pwärätä an tipis o tipeeu ngeni an epwe angei chappen an we föför. Ekewe chon Israel ra fokun mwar ren ekewe föför Tafit a föri lon fansoun manauan, pwe lupwen ra nom lon weires me mürin ra positi eman king, eman “nöün Tafit”, eman mwirimwirin mi wewe ngeni.
VI. Tettelin masouen ei puk:
Tafit a nemeni Juta 1.1–4.12
Tafit a nemeni unusen Israel 5.1–24.25
1. Ekewe ier lepoputän an nemenem 5.1–10.19
2. Tafit me Patsipa 11.1–12.25
3. Tafit a tolong lon osukosuk me riaföü 12.26–20.26
4. Ekewe ier lesopolan an nemenem 21.1–24.25
1
Tafit a rongorong pwe Saul a mäla
1.1-16
1 Iwe, mürin än Saul mäla, Tafit a liwinto seni an akufu ekewe chon Amalek o nonom Siklak lon ükükün ruu rän. 2 Nge lon aülüngatin rän eman mwän a feito seni ewe leni ia nöün Saul mwichen sounfiu ra nom ie. Iwe, üfan a kam, a pwal wor pwül won möküran, asisilen an letipeta. Lupwen a feito ren Tafit, a chapetiu lepwül o asamolu. 3 Tafit a aisini, “Ia ka feito me ie?” Ätewe a pälüeni, “Üa sü seni ewe lenien sounfiun Israel.” 4 Tafit a üreni, “Kopwe apworausa ngeniei mine a fis.” Ätewe a üreni, “Ekewe sounfiun Israel ra sü seni ewe maun, nge chomong leir ra mäla. Iwe, Saul me nöün we mwän Jonatan ra pwal mäla.” 5 Mürin, Tafit a aisini ewe alüal mi apworausa ngeni ewe pworaus, “Pwota ka silei pwe Saul me Jonatan ra mäla?” 6 Ewe alüal a pälüeni, “A chök fis pwe üa nom won ewe chuk Kilpoa. Ikenan üa küna Saul pwe a aünna ngeni wokun siles, nge ekewe woken me chokewe mi wawa oris seni sounfiun Filistia ra kaneto ngeni. 7 Lupwen a nennesökür, a künaei o kökköriei. Iwe, üa pälüeni, ‘Ngang iei.’ 8 Saul a aisiniei, ‘En chon ia?’ Üa pälüeni, ‘Ngang eman re Amalek.’ 9 Mürin, Saul a üreniei, ‘Kopwe feito rei o nieila, pun üa fokun kinas, nge üa chüen manau.’ 10 Iei mine üa feila ren o niela, pun üa silei pwe esap chüen tongeni manau mürin an turula. Mürin üa angei mwärin seni won möküran, pwal an lälä seni won pöün, o uweereto reöm en ai samol.” ✡ 1.Sam 31.1-6; 1.Kron 10.1-6
11 Mürin, Tafit a kamwei üfan, nge nöün kewe aramas mi nom ren ra pwal kamwei üfer. 12 Ra ngüngüres o kechü, ra pwal öchüün tori lekuniol fän iten Saul me Jonatan, pwal fän iten nöün ewe Samol mi Lapalap aramas ekewe chon Israel, pun chomong ra mäla lon maun. 13 Iwe, Tafit a aisini ewe alüal mi apworausa ngeni ewe pworaus, “Ia ka feito me ie?” Ätewe a pälüeni, “Ngang nöün eman chon Amalek mi siamü lon ei fanü.” 14 Tafit a aisini, “Pwota kosap niuokus le angatä won nöün ewe Samol mi Lapalap we mi kepit, nge ka niela?” 15 Mürin, Tafit a körato eman lein ekewe mwän mi eti o üreni, “Kopwe niela ätenan.” Iwe, a niela ätewe pwe a mäla. 16 Pun Tafit a fen üreni ewe re Amalek, “Chaom epwe ukum chök, pun kapasen awom a püsin etipisuk ren om apasa pwe ka niela nöün ewe Samol mi Lapalap we mi kepit.”
Tafit a kechüeiti Saul me Jonatan
1.17-27
17 Mürin, Tafit a eäni ei kölün kechü won Saul me Jonatan nöün we mwän 18 o apasa pwe repwe aiti ngeni ekewe aramasen Juta. (Ei kölün kechü a mak lon ewe puken Jasar.) ✡ Jos 10.13
19 “Israel, noum kewe souemwen ra ninnila me won ekewe chuk, ekewe chon pwora ra mäla.
20 Ousap apworausa ei pworaus lon Kat,
ousap pwal asilefeili lon ekewe alen Askelon,
pwe ekewe föpwülün Filistia resap pwapwa,
ekewe föpwül nöün chokewe resap sirkomsais resap meseik.
21 Ämi kewe chukun Kilpoa, amwo esap wor amurenipwin ika üt epwe püngütiu womi,
esap pwal wor uän ämi tanipi fän iten asor.
Pun ikenan än ekewe mi pwora tittin maun ra limengau ren cha,
än Saul tittin maun esap chüen kepit ngeni lö.
22 Nöün Jonatan likapich esap lomotongau,
pun a asükü chan ekewe mi mäfeiengau o tililong lon fituken ekewe mi pwora.
Nge nöün Saul ketilas esap liwinto fän asöülapö.
23 Saul me Jonatan ra chen me ren aramas o eäni kirikiröch.
Resap imwüfesen lon ar manau, pwal lon ar mäla.
Ra müttir seni ekewe ikel o pöchökül seni ekewe laion.
24 Ämi föpwülün Israel, oupwe kechüeiti Saul
mi aüfa ngenikemi üf mi parapar o fokun mürina,
a pwal fouteekemi ren fout seni kolt.
25 Ekewe sounfiu mi pwora ra mäla lon maun.
Jonatan a mätiu won ekewe chuk.
26 Üa letipeta fän itom, pwii Jonatan.
Ka fokun aüchea me rei.
Om tongeei a fokun mürina
lap seni än fefin tong.
27 Ekewe chon pwora ra mäla,
ekewe pisekin maun ra tala.”