28
Mine a fis ngeni Paulus me won ewe fanü Malta
28.1-10
Iwe, lupwen aia tiwelong wilifanü, aia silei pwe ewe fanü itan Malta. Chon ei fanü ra fokun kirikiröch ngenikem. Ra aküetä eu ekkei o etiwakem meinisin, pun a püng üt o patekich. Paulus a pwal ionifengeni amwüch. Nge lupwen a uwoutä won ewe ekkei, eman serepenit a towu me lon ekewe amwüch pokiten pwichikaren ewe ekkei, a küüw pöün o nikemeitiu won. Iwe, lupwen chon ewe fanü ra küna ewe serepenit mi nikemeitiu won pöün Paulus, ra kapasfengen lefiler, “Ei mwän i eman chon niela aramas. Pun inamwo ika a fen manaueto seni le matau, nge ewe anün pwüng esap mwüt ngeni an epwe manau.” Nge Paulus a wichikalong ewe serepenit lon ewe ekkei, nge esap feiengau ren. Iwe, ekewe aramas ra witiwiti pwe pöün Paulus epwe pwootä ika epwe fen turula o mäla. Ra witiwit fansoun langatam, nge lupwen resap küna och feiengau a fis ngeni, ra siwili ar ekiek o apasa, “Ätei eman kot!”
A wor ekoch fanü ikenan mi arap ngeni ei leni, fanüen Puplius, i samolun ewe fanü. Ätei a etiwakem lon lenian o lon ükükün ülüngat rän a awasölakem pokiten an kirikiröch. Iwe, semen Puplius a mwelilong leimw ren an pwichikar me feiseni. Paulus a tolong lon rumwan o mürin an iotek fän itan a iseis pöün won o apöchökülätä. Lupwen a fis ei, ekewe lusun chon samau meinisin me won ewe fanü ra feito, nge Paulus a apöchöküleeretä. 10 Iwe, chon ewe fanü ra ngenikem chomong lifang, nge lupwen aipwele sai, ra uwätä won ewe sip met a lomot fän iten äm we sai.
Ewe sai seni Malta tori Rom
28.11-15
11 Iwe, mürin äm nonom ikenan ülüngat maram, aia sü won efoch sip seni Aleksantria mi wor liosun ekewe “Kot Lipwe” won lesopun me mwan iter Kastor me Polluk. Ei sip a mamaram ikenan fansoun lefen. 12 Mürin äm aia tori ewe telinimw Sirakus o nonom ikenan lon ükükün ülüngat rän. 13 Seni ikenan aia sai o tori ewe telinimw Rekium. Sorotän ewe rän eu asepwäl a popuetä le enito seni ör o mürin ruu rän aia tori ewe telinimw Puteoli. 14 Ikenan aia churi ekoch chon lükü Jesus mi tüngor ngenikem pwe aipwe nonom rer lon ükükün eu wiik. Iei usun aia sai ngeni Rom. 15 Iwe, ekewe chon lükü Jesus mi nom lon Rom ra rong usum, ra feila tori ekewe kükün telinimw iter Appius Forum me Ülüngat Imwen Wasöla, pwe repwe sounikem. Iwe, lupwen Paulus a küneer, a kilisou ngeni Kot o letipan a fokun pöchökülela.
Paulus a churi ekewe chon Juta lon Rom
28.16-31
16 Iwe, lupwen äm tori Rom, ra mwüt ngeni Paulus pwe epwe tongeni aemanüla le nonom, nge eman sounfiu epwe nom ren o mamasa. 17 Mürin ülüngat rän, Paulus a körato ekewe souemwenin ekewe chon Juta mi chon lefanüla lon Rom pwe repwe mwichfengen. Iwe, lupwen ar chufengen, Paulus a üreniir, “Ämi pwii kana chon Israel! Inamwo ika ngang üsap föri och mi ü ngeni aramasach ika örüniach kewe sia angei seni ach kewe lewo, nge ra fötekiniei lon Jerusalem o atolongaei fän nemenien chon Rom. 18 Mürin än ekewe chon Rom atittinaei, ra mochen amusaei, pun üsap föri och föför üpwe tipisin mäla ren. 19 Nge lupwen ekewe chon Juta resap tipeeu ngeni, esap wor och mine üpwe tongeni föri. Üa chök tüngor pwe ai kapwüng epwe amwet ngeni Sisar, nge esap wor och ai kapasen tipi ngeni aramasei kewe. Föf 25.11 20 Ina popun üa tüngor pwe üpwe churikemi o kapas ngenikemi. Pun ngang üa fötek pokiten än ekewe chon Israel apilükülük.”
21 Iwe, ekewe chon Juta ra üreni Paulus, “Äm aisap angei echö toropwe seni Jutea usumw, esap pwal wor eman me lein aramasach a feito seni ikenan fän och pworaus, ika fän och kapas mi ngau usumw. 22 Nge aia mochen rongorong mefiom, pun aia silei pwe ekis meinisin aramas ra kapasen ü ngeni ei mwich ka choni.” 23 Iei mine ra filätä eu rän pwe repwe churi Paulus lon. Iwe, chomong me leir ra feito lon ewe rän lon ewe leni ia Paulus a nonom ie. Seni lesosor tori lepwin a afalafaleer o awewe ngeniir usun ewe Mwün Kot. A sotuni le pese ngeniir usun ar repwe lükü Jesus ren an pwärätä ngeniir ekewe kapas seni än Moses kewe allük me seni mine ekewe soufos ra makkeetiu. 24 Iwe, ekoch me leir ra lükü, pwe mine a apasa a let, nge ekoch resap lükü. 25 Iei mine ra feila lon ar tipefesen lefiler mürin än Paulus apasatä ei eu mettoch: “A pwüng mine ewe Ngünmifel a kapas ren ewe soufos Aisea ngeni ach kewe lewo! 26 Pun a apasa,
‘Kopwe feila o aronga ngeni ekei aramas:
Oupwe aü selingemi o rongorong,
nge ousap wewe ren.
Oupwe nenengeni, nge ousap küna och.
27 Pun letipen ekei aramas a pöchökül.
Ra ükütiu le rongorong
o ra amöürü meser.
Pun are resap föri iei usun,
repwe tongeni küna ren meser
o rongorong ren selinger, nge letiper repwe wewela,
repwe pwal kul ngeniei,
pwe üpwe apöchöküleer. Iei alon Kot.’ Ais 6.9-10 28 Iei mine ngang üa mochen pwe ämi oupwe silei, pwe än Kot kapasen manau a tori ekewe chon lükün Israel o ir repwe aüselinga.” 29 [Mürin än Paulus apasa ei, ekewe chon Juta ra feila, nge ra fokun aninifengen lefiler.]
30 Iwe, lon ükükün ruu ier Paulus a nonom lon eu leni i a püsin möni o etiwa aramas meinisin mi feito ren, pwe repwe churi. 31 A afalafal usun Mwün Kot o aiti ngeniir usun ach Samol Jesus Kraist. A pwora le kapas, nge esap wor eman a pinei.

28:19: Föf 25.11

28:27: Ais 6.9-10