Ester
Kapas akom
I. Iten ei puk: Ester. Ei puk a angei itan seni iten ewe aramas mi aüchea, a mak pworausan lon. Wewen ei it Ester: Fü.
II. Chon makei ei puk: Ese nien fat, nge eli eman lein ekewe chon Juta mi nom lon Persia lon ewe otun a fis ei pworaus.
III. Itelapemongen ei puk: Kot a nöünöü Ester pwe epwe angasa nöün aramas.
IV. Kapas aüchean ei puk: Kot a fokun tümwünü nöün aramas pwal lupwen ar toropasfeil.
V. Masouen ei puk Ester: Lon ei puk a mak pworausen mine a fis me lon imwen ewe kingen Persia, pwal pworausen eman fin Juta mi fokun pwora itan Ester. Neminei a amanaua aramasan seni ar repwe rosola ren chon oputer. Ei puk a awewei usun poputan me wewen än chon Juta we chulap itan Purim.
VI. Tettelin masouen ei puk:
Fasti a tur seni wisan wisen kiwiin, Ester a tolong lon lenian 1.1–2.23
Än Haman rawangau ngeni chon Juta meinisin 3.1–5.14
Haman a ninnila 6.1–7.10
Ekewe chon Juta ra akufu chon oputer 8.1–9.19
Ekewe chon Juta ra föri ewe ränin achem itan Purim 9.20–10.3
1
Kiwiin Fasti a pälüeni ewe king Asuworos
1.1-22
Ei pworaus a fis lon ränin manauen Asuworos, i ewe Asuworos mi nemeni ipükü rüe me fisu sop seni Intia tori Itiopia. Esr 4.6 Lon ena fansoun ewe king Asuworos a mot won an lenien motun king lon Susa, samolun telinimwen ewe fanü. Iwe, lon aülüngatin ierin an nemenem a föri eu kametip fän iten nöün kewe samol me nöün kewe nöüwis meinisin. Iwe, ekewe samolun sounfiun Persia me Metia, pwal ekewe aramas tekia me kepinan ekewe sop ra nom ren. Lon ükükün ipükü walik rän king Asuworos a aiti ngeniir wöün mwün mi watte, pwal chomong sokun pisekin king mi amwarar o ling. Iwe, wesin ekewe rän, ewe king a föri eu kametip ngeni aramas meinisin mi nom lon Susa samolun telinimwen ewe fanü, ngeni aramas tekia me aramas tekison. Ewe kametip a fis lon ükükün fisu rän lon eu leni mi amassawa lükün ewe imwen king. Ewe leni a chech ngeni cheech mi pwech me arauarau, ra föfö ngeni säl mi fokun pwech pwal parachol lon ring seni silifer o riri ngeni üren lon ewe leni ra för seni ewe fau itan marpel. Mi pwal wor peet mi för seni kolt me silifer, nge won ewe lenien fetal a för seni ewe fau mi sokopat anüan seni marpel mi par me pwech me arauarau fetil. Ra ün wain lon chomong sokopaten kap seni kolt, nge ünümer wain me ren ewe king a fokun somwola. Iwe, a wor eu allük me ren ewe king ngeni nöün kewe chon angang, pwe resap echimwa eman lupwen ar repwe ngeni ünüman, nge repwe chök ngeni eman me eman ükükün an mochen ün. Lon ena chök fansoun kiwiin Fasti a pwal föri eu kametip fän iten ekewe fefin mi nom lon imwen ewe king Asuworos.
10 Iwe, lon afisuen ränin ewe kametip, lupwen ewe king a pwapwa ren an ünümi wain, a allük ngeni Mehuman, Pista, Harpona, Pikta, Apakta, Setar me Karkas, ir nöün ewe king kewe füman chon angang mi angang ngeni, 11 pwe repwe emwenato ren kiwiin Fasti fän mwärin mwärin kiwiin, pun a mochen einga ngeni ekewe aramas me ekewe nöüwis liöchün ewe kiwiin, pokiten a fokun liöch. 12 Nge lupwen ekewe chon angang ra asile ngeni kiwiin Fasti än ewe king we allük, neminei esap mochen. Ren ei ewe king a wesewesen lingeringer o fokun song.
13 Iei örünien ewe king pwe epwe angei öüröüran seni ekewe mi silelap allük me pwüng. Iei mine a körato ekewe sousile allük o aisiniir mine epwe föri. 14 Ikkei ir ekewe mwän mi nom ren ewe king: Karsina, Setar, Atmata, Tarsis, Meres, Marsena me Memukan. Ir ekewe füman nöüwisen Persia me Metia mi tongeni churi ewe king iteiten fansoun o wiseni wis tekia lon mwün. 15 Iwe, a aisiniir, “Met pwüngün ewe allük usun mine epwe fis ngeni kiwiin Fasti? Ngang king Asuworos üa tinala nei chon angang ren pwe repwe asile ngeni ai we allük, nge i esap fokun aleasochis ngeni.” 16 Mürin, Memukan a pälüeni ei kapas ais me fän mesen ewe king me ekewe nöüwis, “Kiwiin Fasti esap chök tipis ngonuk en king, nge a pwal tipis ngeni ekewe nöüwis meinisin, pwal ngeni aramasen ekewe sop meinisin mi nom fän nemeniom, en äm king Asuworos. 17 Iwe, ei föför ewe kiwiin a föri epwe chöfetal ngeni fefin meinisin. Mürin ir repwe lükümach ngeni pwülüer, pun repwe apasa, ‘King Asuworos a allük ngeni kiwiin Fasti pwe epwe feito ren, nge Fasti esap feito.’ 18 Seni ei fansoun, lupwen pwülüen ekewe nöüwisen Persia me Metia repwe rongorong usun föförün ewe kiwiin, repwe pwal tipepöchökül ngeni pwülüen nöün ewe king kewe nöüwis meinisin. Iwe, epwe chök lapala lükümach me osukosuk. 19 Are en äm king ka tipeeu ngeni, kopwe föri eu allük pwe Fasti esap chüen feito fän mesen ewe king. Ei allük epwe pach ngeni allükün Persia me Metia, pwe esap wor eman a tongeni siwili. Mürin en äm king kopwe angei seni wisan wisen kiwiin o ngeni eman mi mürina seni. 20 Iwe, are om ei allük epwe chöfetal lon unusen mumw mi fokun watte, ekewe fefin mi tekia me tekison meinisin repwe meniniti pwülüer.” 21 Ei ekiek ewe king me ekewe nöüwis ra tipeeu ngeni. Iei mine ewe king a föri usun mine Memukan a apasa. 22 A tinala toropwe ngeni ekewe sop meinisin mi nom fän nemenian, nge ekewe toropwe ra mak lon en me maken fanüan me fosun fanüan, pwe iteiten mwän epwe samolun an famili o nemeni aramasan.

1:1: Esr 4.6