10
Lingen Kot a towu seni lon ewe imwenfel
10.1-22
Iwe, lupwen üa nenela, üa küna och mi wewe ngeni eu lenien motun king mi för seni ewe fau aüchea itan safaia, a pwä me won läng asen möküren ekewe kerop. Is 1.26; Pwär 4.2 Kot a üreni ewe mwän mi üföüf echö üf mi pwechepwech, “Kopwe tolong lefilen ekewe wiil mi kul fän ekewe kerop. Kopwe tukei lon poum molien ekkei mi sarara seni lefilen ekewe kerop o atoropasafeiliir won ewe telinimw.” Pwär 8.5
Iwe, lupwen üa katol, a tolong lon. Lupwen ewe mwän a tolong, ekewe kerop ra ütä lepeliörün ewe imwenfel, nge eu kuchu a aurala ewe leni mwen ewe imwenfel. Iwe, lingen ewe Samol mi Lapalap a feitä seni ekewe kerop o feila ngeni asamalapen ewe imwenfel. Mürin, ewe kuchu a aurala ewe imwenfel, nge ewe leni mwen ewe imwenfel a ur ren saramaramen lingen ewe Samol mi Lapalap. Iwe, mwaataaten pöükässin ekewe kerop a tori ewe leni lükün ewe imwenfel, a usun chök mwelien ewe Kot mi Unusen Manaman, lupwen a kapas.
Lupwen ewe Samol mi Lapalap a kapas ngeni ewe mwän mi üföüf echö üf mi pwechepwech, pwe epwe angei molien ekkei seni lefilen ekewe wiil mi kul, pwal seni lefilen ekewe kerop, a tolong o ütä lükün eu kewe wiil. Mürin, eman seni lein ekewe kerop a aitiela pöün ngeni ewe ekkei a nom lefilen ekewe kerop, a angei ekoch molian o uwalong lepöün ewe mwän mi üföüf echö üf mi pwechepwech. Iwe, ewe mwän a angei ewe molien ekkei o towu lükün. Fän efoch me efoch pöükässin ekewe kerop a pwä och mi wewe ngeni efoch pöün aramas.
Iwe, lupwen üa nenela, üa küna rüanü wiil lepekin ekewe kerop, eu wiil lepekin eman me eman. Nge lapalapen ekewe wiil a usun chök meriweriwen ewe faü aüchea itan kirisolait. 10 Iwe, lapalapen ekewe rüanü wiil a wewefengen, a usun chök eu wiil mi nom lon eu. 11 Lupwen ekewe kerop ra fetal, ra tongeni fetal ngeni ekewe rüanü pekin, nge resap kul lupwen ar fetal. Iwe, ra fetalepök lon en me wenewenan ia meser a sape ngeni ie, nge resap kul lupwen ar fetal. 12 Iwe, unusen inisin ekewe kerop, sökürür, pöür me pöükässir ra kula ren föün mas. Ina usun pwal ekewe wiil mi nom lepekir. Pwär 4.8 13 Üa püsin rongorong pwe ekewe wiil ra iteni wiil mi märäkul. Is 1.15-21 14 Iwe, iteiten eman me eman ekewe kerop a wor rüanü won mesan. Aeuin won mesan a usun chök won mesen eman kerop, aruuen won mesan a usun chök won mesen eman aramas, aülüngatin won mesan a usun chök won mesen eman laion, nge arüanün won mesan a usun chök won mesen eman ikel. Is 1.10; Pwär 4.7
15 Ikkei ir ekewe mönümanau üa fen küna me ünükün ewe chanpupu Kepar. Iwe, ekewe kerop ra ässitä. 16 Iwe, lupwen ekewe kerop ra fetal, ekewe wiil ra fetal lepekir, nge lupwen ra awenawu pöükässir pwe repwe ässitä seni won fanü, ekewe wiil resap feil seni lepekir. 17 Lupwen ekewe kerop ra üla, ekewe wiil ra pwal üla, nge lupwen ekewe kerop ra feitä, ir ra pwal feitä, pun ngünün ekewe mönümanau ra nonom lon ekewe wiil.
18 Mürin, lingen ewe Samol mi Lapalap a feil seni asamalapen ewe imwenfel o üla me won ekewe kerop. 19 Nge lupwen üa nenengeni ekewe kerop, ra awenawu pöükässir o feitä seni won fanü, nge ekewe wiil ra etiir. Ra feila ren asamalapen imwen ewe Samol mi Lapalap mi sape ngeni ötiu o üla ikenan, nge lingen ewe Koten Israel a nonom wor.
20 Ikkei ir ekewe mönümanau üa fen küneer pwe ra nom fän ewe Koten Israel ünükün ewe chanpupu Kepar. Iwe, üa sileniir pwe ir kerop. 21 Iwe iteiten eman me eman leir a wor rüanü won mesan, pwal fofoch pöükässin, nge fän pöükässir a wor och mi wewe ngeni pöün aramas. 22 Iwe, lapalapen won meser a fokun usun chök won mesen ekewe mönümanau üa fen küneer ünükün ewe chanpupu Kepar. Iteiten eman me eman leir a fetal wenewen.

10:1: Is 1.26; Pwär 4.2

10:2: Pwär 8.5

10:12: Pwär 4.8

10:13: Is 1.15-21

10:14: Is 1.10; Pwär 4.7