Esra
Kapas akom
I. Iten ei puk: Esra. Ei puk a angei itan seni iten ewe aramas mi aüchea, a mak pworausan lon. Wewen ei it Esra: Chon Alilis.
II. Chon makei ei puk: Ese nien fat. Ekewe sousilelap lon Paipel ra tipeeu ngeni, pwe Esra a makei ekoch kinikin me lon ei puk, nge esap unusan, eli i ätewe a achufengeni ekewe kinikinin lon meinisin.
III. Itelapemongen ei puk: Kot esap likitala nöün aramas.
IV. Kapas aüchean ei puk: Mine Kot a fen pwon ngeni Jeremaia, pwe chon Juta repwe liwinsefäl seni ar oola, a pwönüetä.
V. Masouen ei puk Esra: Lon ei puk a soposopola ekewe pworaus mi mak lon ekewe puken Kronika. A apworausa usun än ekoch chon Juta mi oola Papilon liwinsefäliti Jerusalem o popuetäsefäli ar angangen fel ngeni Kot. Ekei pworaus ra mak lon 3 tettel:
1. Aeuin mwichen chon Juta mi oola Papilon a liwinsefäl fän Sirus ewe kingen Persia allük.
2. Ewe imwenfel a kaüsefäl o efinun. Ewe angangen fel ngeni Kot a fissefäl lon Jerusalem.
3. Ekoch ier mürin pwal eu mwichen chon Juta a liwinsefäliti Jerusalem fän emwenien Esra. Ätewe mi silelapei än Kot kewe allük. Esra a alisi ekewe aramas le akotasefäli angangen ar lamalam me nonomun manauer, pwe repwe tongeni tümwünü pwüngün ar lamalam ra angei seni ar kewe lewo.
VI. Tettelin masouen ei puk:
Ewe aeuin mwichen chon Juta a liwinsefäl seni ar oola 1.1–2.70
Ewe imwenfel a kaütä o efinun 3.1–6.22
Esra me pwal ekoch chon oola ra liwinsefäl 7.1–10.44
1
Än Sirus pworausen asilesil
1.1-4
Iwe, lon aeuin ierin mwün Sirus ewe kingen Persia, ewe Samol mi Lapalap a amwökütükütü leluken Sirus pwe epwe föri pworausen asilesil ngeni unusen mwün. Ei a fis pwe epwe pwönüetä mine Jeremia a apasa fän alon ewe Samol mi Lapalap. Iwe, Sirus ewe kingen Persia a makeetiu, Jer 25.11; 29.10 “Iei aloi ngang Sirus ewe kingen Persia: Ewe Samol mi Lapalap, ewe Koten läng, a ngeniei ekewe mwün fanüfan meinisin. Iwe, a filiei pwe üpwe aüetä eu imwenfel fän itan me lon Jerusalem lon ewe fanü Juta. Ais 44.28 Ämi meinisin mi iteni nöün Kot aramas, Kot epwe etikemi. Oupwe feila Jerusalem lon ewe fanü Juta, pwe oupwe aüsefälietä imwen ewe Samol mi Lapalap ewe Koten Israel, i ewe Kot mi nom Jerusalem. Iwe, iteiten eman me eman mi chüen manau o mochen liwinsefäl, ese lifilifil ia a nom ie, epwe angei alilisin seni aramasen lenian. Epwe angei silifer me kolt, sokopaten pisek me man, pwal ekewe asor aramas ra fangala seni mochenin letiper fän iten ewe imwen Kot mi nom lon Jerusalem.”
Ekewe chon oola ra liwinsefäliti Jerusalem
1.5-11
Mürin, mwänirelan än semer kewe cho seni ewe ainangen Juta me Peniamin, ekewe souasor me ekewe aramas seni ewe ainangen Lefi, pwal ir meinisin Kot a amwökütükütü leluker ra ütä pwe repwe feila o aüsefälietä imwen ewe Samol mi Lapalap mi nom Jerusalem. Nge chon arur meinisin ra alisiir ren pisek seni silifer, ren kolt me sokopaten pisek, ren man pwal ren pisek mi aüchea, fiti ekewe asor ra fangala seni mochenin letiper. Iwe, ewe king Sirus a pwal atowu ekewe pisek Nepukatnesar a angei seni imwen ewe Samol mi Lapalap lon Jerusalem me lom o anomu lon imwen an kewe kot. Iwe, Sirus ewe kingen Persia a atorolong fän nemenien Mitretat ewe chon tümwünü moni. Ätei a aleani ekewe pisek ngeni Sespasar ewe samolun Juta. Iwe, iei iteiten ekewe pisek: Ilik sepi seni kolt, engeröü sepi seni silifer, rüe me tiu sepi fän iten apach mi pwokus, 10 ilik kükün sepi seni kolt me föpükü engol kükün sepi seni silifer, pwal engeröü sokopaten sepi. 11 Iwe, ekewe pisek meinisin seni kolt me silifer ükükür limungeröü föpükü. Ekei pisek meinisin Sespasar a uwala, lupwen i me ekewe chon oola ra towu seni Papilon o liwinsefäliti Jerusalem.

1:1: Jer 25.11; 29.10

1:2: Ais 44.28