14
Kölün takir usun turun ewe kingen Papilon
14.1-23
Iwe, ewe Samol mi Lapalap epwe ümöümöch ngeni ekewe mwirimwirin Jakop, epwe filisefäli chon Israel o alenier lon poputän fanüer. Chon ekis repwe chiechi ngeniir o pach ngeniir. Iwe, aramasen chomong mwü repwe aliwinala chon Israel ngeni poputän fanüer. Nge chon Israel repwe nöüniir chon angang mwän me chon angang fefin lon ewe fanü ewe Samol mi Lapalap a ngeniir. Repwe liapenala chokewe ra liapeniir me mwan, nge repwe nemeni chokewe ra nemeniir me lom fän pöchökül.
Lupwen ewe Samol mi Lapalap epwe angasakemi seni ämi riaföü me fitikoko me angang weires ra achouu ngenikemi, ämi oupwe eäni ei kölün takir usun turun ewe kingen Papilon, “A mosonosonola ewe chon ariaföüükich, a pwal wesila an song mi fokun watte. Ewe Samol mi Lapalap a aükätiu pöchökülen ekewe sounemenem mi ngau, mi ariaföüü ekewe aramas fän ar song, nge resap ükütiu le afeiengaua chon ekewe mwü ra liapeni. Iei unusen fanüfan a kinamwela, nge chon ra chietä köl fän pwapwa. Ekewe irä saipires me setar won Lepanon ra pwapwa reöm, en kingen Papilon. Ra apasa, ‘Seni ewe fansoun, lupwen ka küna tekison, esap wor eman a feito o pökükich.’ Lenien sotup a mwökütüküt pwe epwe etiwok lupwen kopwe war, ngünün ekewe mi samol won fanüfan repwe pwätä pwe repwe kapong ngonuk, nge chokewe mi king repwe ütä seni ar lenien motun king. 10 Ir meinisin repwe apasa ngonuk, ‘En ka pwal apwangapwangala usun chök äm. Iei ka wewe ngenikem.’ 11 Lingom a turutiu lon lenien sotup, nge tikitikin noum kitar a wes. Iwe, kiom epwe ur ren möttö, nge moso repwe pwölukala.
12 Ka fokun turutiu seni läng, en Fü Rän, Nöün Mallen Rän! Ka turutiu won fanüfan o tatakis lepwül, en ewe mi atekisonätiu mwü me lom. Pwär 8.10; 9.1 13 Ka ekieki lon letipom, ‘Üpwe feitä läng o anomu ai lenien motun king asen ekewe fün Kot. Üpwe mottiu won ewe chukun mwich mi fokun toau, a nom peliefeng. 14 Iwe, üpwe feitä, feitä asen ekewe kuchu, pwe üpwe wewe ngeni Ewe mi Fokun Tekia.’ 15 Nge iei ka chök turufochofochetiu epin lenien sotup. Mat 11.23; Luk 10.15 16 Chokewe mi künok repwe nefochofoch ngonuk o mairü reöm. Iwe, repwe aisfengen lefiler, ‘Ifa usun, iei i ewe mwän a amwöükü fanüfan o föri pwe chon ekewe mwü ra chechech? 17 Iei i ätewe mi atai telinimw kana o awili fanüfan ngeni fanüapö, nge esap mwüt ngeni nöün chon fötek pwe repwe liwiniti lenier?’ 18 Ekewe king meinisin ra peias fän ling lon en me püsin peiasan. 19 Nge en esap wor püsin peiasom. Ka pöütüla lükün usun chök efoch palen irä eman a moneela. Ka pwölüla ren somä, ren chokewe mi mäla lon maun, chokewe mi katurutiu lon ewe pwang mi wor fau lon. Iwe, ka usun chök eman somä aramas ra puri. 20 Kosap chufengen me rer le peias, pun ka ataela fanüom o niela aramasom. Esap wor eman mwirimwirin ewe chon föföringau epwe chüen manau. 21 Oupwe amolätä pisekin ninni fän iten nöün kewe mwän pokiten än ar kewe lewo tipis. Resap chüen ütä o nemeni fanüfan, resap pwal aüetä telinimw won.”
22 Ewe Samol mi Unusen Manaman a apasa, “Üpwe ütä o pälüeni Papilon, üpwe arosala seni lon chokewe mi chüen manau, nöür me mwirimwirir kana. Ngang ewe Samol mi Lapalap üa kapas. 23 Iwe, üpwe awili Papilon ngeni eu lenien pwakak fukuro ra chök lenieni, üpwe pwal pirumwei ren efoch pirum mi afeiengau. Ngang ewe Samol mi Unusen Manaman üa kapas.”
Kapasen osuni usun Asiria
14.24-27
24 Iwe, ewe Samol mi Unusen Manaman a akapel, “Ellet, mine üa akota epwe fis, nge mine üa filätä epwe pwönüetä. 25 Üpwe arosala chon Asiria me lon fanüei, üpwe puriir fän pechei won chuki kana. Üpwe angei seni nei aramasen Israel ewe waas chon Asiria ra anomu wor, pwal woser mi chou.” Ais 10.5-34; Nah 1.1–3.19; Sef 2.13-15 26 Iei ewe akot Kot a apwüngala pwe epwe fis won unusen fanüfan, epwe apwönüetä ren pöün mi itila won ekewe mwü meinisin, pwe epwe afeiengaueer. 27 Lupwen ewe Samol mi Unusen Manaman a amolätä och pwe epwe föri, iö epwe tongeni pinei? Nge lupwen a aitiela pöün, iö epwe tongeni numalong?
Kapasen osuni usun Filistia
14.28-32
28 Lon ewe ier ewe king Ahas a mäla, ei kapasen osuni a feito seni Kot, 2.King 16.20; 2.Kron 28.27 29 “Ousap pwapwa, ämi chon Filistia meinisin, pwe wokun ewe mi wichikemi a kup. Pun eman serepenit mi afeiengau epwe pop seni ewe aemanün serepenit, nge atelian epwe eman trakon mi äkäs. Jer 47.1-7; Is 25.15-17; Sow 3.4-8; Am 1.6-8; Sef 2.4-7; Sek 9.5-7 30 Iwe, nei aramas mi fokun wöüngau repwe mongö, pwal ir mi osupwang repwe asösö fän kinamwe. Nge ämi chon Filistia, üpwe niela mwirimwirimi ren lengita o arosala chokewe mi chüen manau me leimi. 31 Ämi chon Filistia meinisin, oupwe kechü lon asamalapen tittin ämi telinimw, oupwe pupuchör lon telinimwemi fän niuokus. Pun eu mwichen sounfiu a feito seni efeng, nge esap wor eman me leir epwe nisin.”
32 Meni sokun pworaus sipwe apworausa ngeni ekewe chon künö seni Filistia? Sipwe apworausa ngeniir pwe ewe Samol mi Lapalap a anüküchara Sion, nge nöün aramas mi nom lon riaföü repwe op lon.

14:12: Pwär 8.10; 9.1

14:15: Mat 11.23; Luk 10.15

14:25: Ais 10.5-34; Nah 1.13.19; Sef 2.13-15

14:28: 2.King 16.20; 2.Kron 28.27

14:29: Jer 47.1-7; Is 25.15-17; Sow 3.4-8; Am 1.6-8; Sef 2.4-7; Sek 9.5-7