17
Än chon Juta tipis a rup lon leluker
17.1-18
1 Ewe Samol mi Lapalap a apasa, “Än chon Juta tipis a mak ren efoch pen seni mächä, a rup lon leluker ren mesen eföü fau aüchea itan taimont, pwal won mächän ar kewe rongen asor. 2 Nöür kewe ra fel mwen ar kewe rongen asor, pwal ngeni ar kewe uluulun ewe anüfefin Asera ünükün iteiten irä mi mwuresires, won ekewe chukutekison, 3 pwal won ekewe chuk lon ewe fanü. Iwe, üpwe föri pwe chon oputakemi repwe liapeni wöümi kana me ämi pisek mi aüchea meinisin, pun liwinin ämi tipis oua föriir lemenen unusen fanüemi. 4 Oupwe fangatä fanüemi üa ngenikemi, nge ngang üpwe föri pwe oupwe angang ngeni chon oputakemi me lon eu fanü ämi ousap silei. Pun ai song a usun chök ekkei mi pulopul tori feilfeilachök.”
5 Ewe Samol mi Lapalap a pwal apasa,
“A anümamau eman aramas mi anomu an apilükülük won aramas
o lükü pöchökülen aramas,
nge lelukan a rik seniei.
6 A wewe ngeni efoch iräkis lon fanüapö.
Esap fokun tori och feiöch.
Epwe nom lon ekewe leni mi pwasapwas me lon ewe fanüapö,
lon eu fanü mi wor salt lon, eu fanü esap so.
7 A feiöch eman aramas mi lükü ewe Samol mi Lapalap
o anomu an apilükülük won.
8 A wewe ngeni efoch irä mi fot unupen eu chanpupu
a apwükawu waran ngeni ewe koluk,
nge esap niuokus lupwen pwichikar a tori,
pun chön kana ra chök arauarau.
Esap öürek lon fansoun pwasapwas,
pun esap ükütiu le ua. ✡ Kölf 1.3
9 Letipen aramas a fokun atuputup lap seni mettoch meinisin,
a unusen ingau.
Iö a tongeni weweiti?
10 Ngang ewe Samol mi Lapalap üa atittina ekiekin aramas o sotuni leluker,
pwe üpwe ngeni iteiten eman me eman aükükün lapalapen manauan
me uän an föför.” ✡ Pwär 2.23; Kölf 62.12
11 Usun ewe machang itan patrik a aloppa sokul,
nge esap püsin sokulun,
iei usun ätewe mi pisekisekila fän pwüngingau.
Lukalapen fansoun manauan wöün epwe pöüt seni,
nge lesopolan manauan epwe eman mi umwes.
12 Ach imwenfel a wewe ngeni än king lenien mot mi fokun ling,
a tekia seni lepoputan.
13 Ai Samol mi Lapalap, en än chon Israel apilükülük.
Meinisin mi likitukela repwe säw,
nge chokewe mi kul senuk epwe mak iter lepwül,
pokiten ra likitala ewe Samol mi Lapalap
ewe puächen kolukun manau.
14 Ai Samol mi Lapalap, kopwe apöchökülaei, pwe üpwe wesewesen pöchökül. Kopwe amanauaei pwe üpwe fokun manau, pun en ewe üa mwareiti. 15 Nengeni, ra üreniei, “Ikafan alon ewe Samol mi Lapalap? Epwe föri usun mine a apasa. 16 Üsap pesee ngonuk pwe kopwe awarato ingau, üsap pwal älälei ewe ränin feiengau, en ka silei usun. Mine üa apasawu a pwäla fän mesom. 17 Kosap eu minen eniweniw ngeniei, en ai lenien op lon fansoun feiengau. 18 Chokewe mi ariaföüüei repwe küna säw, nge kosap mwüt ngeniei pwe üpwe küna säw. Kopwe arüköör, nge kosap arüköei. Kopwe awarato feiengau wor o fokun atatakisiir.
Ekewe aramas repwe pinini pinin ewe ränin sapat
17.19-27
19 Iei alon ewe Samol mi Lapalap ngeniei, “Kopwe feila o ütä ünükün ewe Asamalapen Aramas, ewe ia ekewe kingen Juta ra tolong o towu me ie, o aronga ai kapas ngeniir. Mürin kopwe feila ren ekewe asamalapen Jerusalem meinisin. 20 Iwe, kopwe üra, ‘Oupwe aüselinga alon ewe Samol mi Lapalap, ämi kewe kingen Juta me chon Juta meinisin, pwal ämi chon Jerusalem mi tolong lon ekewe asamalap. 21 Iei alon ewe Samol mi Lapalap: Oupwe afäli manauemi. Ousap mwärei och mettoch lon ewe ränin sapat ika uwalong och lon ekewe asamalapen Jerusalem. ✡ Ne 13.15-22 22 Ousap mwäreewu och seni lon imwemi lon ewe ränin sapat, ousap pwal föri och angang, nge oupwe pinini pinin ewe ränin sapat, usun üa allük ngeni ämi kewe lewo. ✡ Eks 20.8-10; Tut 5.12 23 Nge ir resap rongorong ika aüseling. Ra ülöförea, pun resap rongorong o angei ai öüröür.’ ”
24 Iei alon ewe Samol mi Lapalap, “Nge are ämi oupwe aüselingaei, are ousap uwalong och lon asamalapen ei telinimw lon ewe ränin sapat, are oupwe pinini pinin ewe ränin sapat pwe ousap föri och angang lon, 25 mürin ämi kewe king repwe tolong lon asamalapen ei telinimw o mot won än Tafit lenien motun king. Repwe wawa woken fiti oris, ir me nöür kewe nöüwis, ekewe chon Juta me chon Jerusalem. Nge ei telinimw epwe so tori feilfeilachök. 26 Iwe, ekewe aramas repwe feito seni ekewe telinimwen Juta me ekewe leni pwelin ünükün Jerusalem, seni ewe fanü Peniamin me ewe fanü Sefela, seni ewe fanü mi chukuchukutä me ewe fanü Nekep. Repwe uwato lon imwenfelin ewe Samol mi Lapalap asoren kek me sokun asor, asoren mongö me apach mi pwokus, pwal ekewe asoren kilisou. 27 Nge are ousap mochen aüselingaei, are ousap pinini pinin ewe ränin sapat, nge oua mwärei och o tolong lon asamalapen Jerusalem lon ewe ränin sapat, mürin üpwe aküw eu ekkei pwe epwe kenala asamalapen ei telinimw, pwal ekewe imwen king, nge esap wor eman a tongeni kunuela.”