14
Ekewe aramas ra ü ngeni Kot
14.1-19
Mürin, ekewe aramasen Israel meinisin ra leüömong le puchör o kechü lon unusen ewe pwin. Iwe, ra lal ngeni Moses me Aaron o üreniir, “Amwo aipwe fen mäla chök lon ewe fanü Isip, ika aipwe fen mäla lon ei fanüapö. Pwota ewe Samol mi Lapalap a emwenikeemito lon ei fanü pwe aipwe mäla lon maun, nge pwülüem me nöüm kewe semirit repwe oola? Epwe fen öch äm aipwe liwinsefäliti Isip.”
Iwe, ra kapasfengen lefiler, “Ousipwe le filätä eman nöüch souemwen pwe sipwe liwiniti Isip.” Mürin, Moses me Aaron ra chapetiu won pwül fän mesen ekewe aramasen Israel meinisin mi mwichefengen. Nge Josua nöün Nun mwän me Kalep nöün Jefune mwän, chienen chokewe mi operi ewe fanü Kanaan, ra kamwei üfer fän ar letipeta. Iwe, ra üreni ekewe aramasen Israel meinisin, “Ewe fanü aia saifetal lon o operi fokun eu fanü mi unusen mürina. Are ewe Samol mi Lapalap epwe kirikiröch ngenikich, epwe emwenikichelong o ngenikich ewe fanü mi pwülüöch o fanüeräs. Nge ousap fokun ü ngeni ewe Samol mi Lapalap, ousap pwal niuokusiti aramasen ewe fanü, pun ir chök okufuach. Iwe, ar apilükülük a sü seniir, nge ewe Samol mi Lapalap a etikich. Ousap fokun niuokusitiir.” 10 Nge ekewe aramas meinisin ra üra pwe repwe monei ngeniir fau. Mürin, lingen ewe Samol mi Lapalap a pwä won ewe imwenfel seni mangaku ngeni ekewe aramasen Israel meinisin. 11 Iwe, ewe Samol mi Lapalap a üreni Moses, “Ifa ükükün fansoun än ekei aramas turunufaseei? Ifa ükükün fansoun ar resap mochen lüküei, inamwo ika ra fen küna ekewe manaman üa föri lefiler? 12 Üpwe ni ngeniir mätter o aroserela. Nge üpwe föri senuk eu mwü mi watte o pöchökül seniir.”
13 Nge Moses a üreni ewe Samol mi Lapalap, “En ka emwenawu ekei aramas seni Isip fän om manaman. Epwe ifa usun, ika ekewe chon Isip repwe rongorong usun mine ka föri ngeniir? 14 Repwe asile ngeni chon ei fanü ei pworaus. Ir ra fen rongorong pwe en ai Samol mi Lapalap ka nom lein ekei aramas, pun en ka newenewen ngeniir, pwal om kuchu a ütä wor, nge en ka akomw mwer lon eu ürekuchu lerän me eu üreekkei lepwin. 15 Are ka nipöküela ekei aramas iei chök, chon ekewe mwü mi rongorong usun mine ka föri repwe apasa, 16 ‘Pokiten ewe Samol mi Lapalap esap tongeni emwenalong ekewe aramas lon ewe fanü a pwon pwe epwe ngeniir, iei mine a nirela lon ewe fanüapö.’ 17 Nge iei üa tüngor ngonuk, ai Samol, kopwe pwäri om manaman ngenikem usun ka fen apasa lon om pwon, 18 ‘Ewe Samol mi Lapalap a songomang o wöün tong, a amusala föföringau me pupungau, nge esap amusafatei chon tipis, pwe a liwini än samasam tipis won nöür tori aülüngatin me arüanün tettelin aramas.’ 19 Kose mochen kopwe amusala än ekei aramas tipis lon om tong mi lapalap, usun ka fen amusala än ekewe aramas tipis seni ewe fansoun ar towu seni Isip tori iei.”
Kot a apwüngü chon Israel
14.20-35
20 Mürin, ewe Samol mi Lapalap a üreni Moses, “Üa amusala ar tipis usun ka tüngor. 21 Nge ellet mwo manauei me ai we ling mi aura unusen fanüfan, 22 esap wor eman lein ekewe mwän repwe tolong lon ewe fanü. Ra küna ai ling me ai kewe manaman üa föriir lon Isip pwal lon ewe fanüapö, nge ra chök sotuniei fän chomong, resap pwal aleasochisi aloi. 23 Esap wor eman leir epwe tolong lon ewe fanü üa pwon fän akapel ngeni ar kewe lewo. Esap fokun wor eman me lein chokewe mi turunufaseei repwe tolong lon ewe fanü. Ipr 3.18 24 Nge nei chon angang Kalep üpwe emwenalong lon ewe fanü a fen piin feila lon, pwe mwirimwirin repwe fanüeni, pun a sokola ekiekin lelukan, a pwal fokun aleasochisiei. Jos 14.9-12 25 Iwe, pokiten ekewe chon Amalek me chon Kanaan ra nonom lemolun ewe fanü, lesor ämi oupwe kul o feila lon ewe fanüapö won ewe al a ale ngeni ewe Setipar.”
26 Iwe, ewe Samol mi Lapalap a üreni Moses me Aaron, 27 “Ifa ükükün fansoun än ei mwichen aramasangau lal ngeniei? Üa ku ren ai rongorong än ekei aramas lal ngeniei. 28 Oupwe üreniir pwe iei aloi ngang ewe Samol mi Lapalap, ‘Mwo manauei, mine oua apasa, iei üpwe föri ngenikemi. 29 Ämi oupwe mätiu lon ei fanüapö. Nge esap wor eman me lein iteitemi seni ier rüe feitä mi lal ngeniei, Ipr 3.17 30 epwe tolong lon ewe fanü üa pwon fän akapel pwe oupwe fanüeni, chilon chök Kalep nöün Jefune mwän me Josua nöün Nun mwän. 31 Nge nöümi semirit oua apasa pwe repwe oola, ngang üpwe emwenirelong lon ewe fanü ämi oua oputa, pwe repwe fanüeni. 32 Nge ämi oupwe mätiu lon ei fanüapö. 33 Iwe, nöümi repwe chon fofol man lon ewe fanüapö lon ükükün faik ier, repwe pwal riaföü pokiten ämi ousap allükülük, tori ewe amüchülan me leimi epwe mätiu lon ewe fanüapö. Föf 7.36 34 Ükükün iteiten ekewe faik rän oua operi ewe fanü, iei ükükün ierin ämi oupwe uwei liwinin ämi föföringau. Pun eu ier epwe fän iten eu rän. Iei usun oupwe mefi weiresin ai ü ngenikemi lon ükükün faik ier.’ 35 Ellet üpwe föri ei ngeni unusen ei mwich mi ngau ra chufengen lon ar ü ngeniei: Repwe mätiu o rosola lon ei fanüapö. Ngang ewe Samol mi Lapalap üa kapas.”
Ekewe engol chon op mi ngau ra mäla
14.36-38
36 Nge ekewe mwän Moses a tinirela pwe repwe operi ewe fanü, ir ätekewe mi liwinto o uwato pworaus mi mwäl usun ewe fanü, pwe unusen ewe mwichen aramas ra popuetä lal ngeni Moses, ra mäla. 37 Pokiten ar uwato och pworaus mi mwäl usun ewe fanü, ra mäla ren och mätter fän mesen ewe Samol mi Lapalap. 38 Nge Josua nöün Nun mwän me Kalep nöün Jefune mwän ra manau me lein ätekewe mi feila operi ewe fanü.
Chon Israel ra kuf me lon Horma
14.39-45
(Tut 1.41-46)
39 Iwe, lupwen Moses a apworausa ekei kapas ngeni ekewe aramasen Israel meinisin, ra fokun lolilen. 40 Iwe, lesosorusichin sorotän ewe rän ra pwätä o feitä won ewe fanü mi chukuchukutä, pun ra apasa, “Sa mefi pwe sa tipis. Nge iei ousipwe feitä ngeni ewe fanü ewe Samol mi Lapalap a pwon ngenikich.” 41 Nge Moses a üreniir, “Pwota oua chök sopwela le purätiu än ewe Samol mi Lapalap allük? Ämi ousap win. 42 Ousap feitä pwe oute kuf ren chon oputakemi, pun ewe Samol mi Lapalap esap etikemi. 43 Pun ekewe chon Amalek me chon Kanaan ra nom ikenan, repwe nikemi lon maun. Pokiten oua kul seni ewe Samol mi Lapalap, i esap chüen etikemi.” 44 Iwe, ekewe aramas ra chök ouucho le feitä ngeni ewe fanü mi chukuchukutä. Nge ewe pworofel än ewe Samol mi Lapalap pwal Moses ra chök nonom lon ewe leni ia ra nonom ie. 45 Mürin, ekewe chon Amalek me ekewe chon Kanaan mi nom lon ewe fanü mi chukuchukutä ra feitiu o maun ngeniir. Ra akufu ekewe chon Israel o tapweriir tori Horma.

14:23: Ipr 3.18

14:24: Jos 14.9-12

14:29: Ipr 3.17

14:33: Föf 7.36