Nöün Paulus Toropwe ngeni ekewe Souläng lon
Filipi
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ekewe souläng lon Filipi lupwen a nom lon imwen fötek lon Rom.
III. Itelapemongen ei toropwe: Oupwe fokun pwapwa! (4.4)
IV. Kapas aüchean ei toropwe: Jesus Kraist ach Samol.
V. Masouen ei toropwe: Paulus a mak nöün ei toropwe ngeni chon ewe mwichefel lon Filipi, iei aeuin mwichefel lon Europe a fisitä ren än Paulus angang ngeni. Filipi a nom lon ewe fanü Masetonia mi nom fän nemenien mwün Rom. Paulus a mak ei toropwe lupwen a nom lon imwen fötek lupwen fansoun a nom lon osukosuk me ren ekoch chon angang ngeni Kot mi ü ngeni, a pwal riaföü ren ekewe afalafal mi mwäl aramas ra afalafala lon ewe mwichefel Filipi. Nge masouen nöün ei toropwe a pwärätä ngenikich usun pwapwa me apilükülük mi pop seni alololun än Paulus lükü Jesus Kraist.
Popun än Paulus makkei ei toropwe pwe epwe kilisou ngeni ekewe souläng lon Filipi fän iten ewe lifang ra tinala ren, pwe epwe alisi lon fansoun an osupwang. A aea ei fansoun an epwe apöchöküleer lon ar souläng, pwe repwe tipepwora o apilüköch, inamwo ika i me ir ra nom lon riaföü. A fokun tüngor ngeniir pwe repwe eäni än Jesus tipetekison, nge resap nom fän nemenien apangau me lamalamtekia. A achema ngeniir, pwe ewe manau ra manaueni lon Kraist eu lifangen än Kot ümöümöch ngeniir ra angei ren ar lükü, nge esap ren ar aleasochis ngeni pwüngün än ekewe chon Juta we lamalam. A makkei usun ewe pwapwa me kinamwe Kot a fang ngeni chokewe mi nom lon Kraist.
Ei toropwe a fokun pwärätä usun pwapwa, apilüköch, tipeeufengen me likitü lon manauen souläng me ar lükü. A pwal pwärala alololun än Paulus tongei chon ewe mwichefel lon Filipi.
VI. Tettelin masouen ei toropwe:
Kapas akom 1.1-11
Usun lapalapen manauen Paulus 1.12-26
Ewe manau lon Kraist 1.27–2.18
Ekewe akot fän iten Timoty me Epafrotitus 2.19-30
Kapasen fön usun ar repwe afäliir ren ekewe chon oputer me ekewe mettoch repwe afeiengauer 3.1–4.9
Paulus me chiechian kewe chon Filipi 4.10-20
Kapasen lesopolan 4.21-23
1
Kapong
1.1-2
1 Äm Paulus me Timoty, äm nöün Kraist kewe chon angang, aia kapong ngeni ekewe chon pin lon Kraist Jesus mi nom lon Filipi, pwal ngeni ekewe soumasen mwichefel me ekewe sounkoa: ✡ Föf 16.12 2 Samach Kot me ach Samol Jesus Kraist epwe ngenikemi ümöümöch me kinamwe.
Paulus a iotek fän iten ekewe souläng lon Filipi
1.3-11
3 Ngang üa kilisou ngeni ai Kot fansoun meinisin lupwen ai chechemenikemi. 4 Fansoun meinisin lupwen üa iotek fän itemi, üa iotek fän pwapwa 5 pokiten ämi oua alisiei lon ai angangen arongafeili ewe Pworausen Manau seni lepoputän ai nom remi tori ikenai. 6 Üa fokun lükü, pwe Kot ewe mi popuetä lomi ei angang mi mürina epwe pwal sopwela tori an epwe wesöchüela lon ewe Ränin än Kraist Jesus epwe liwinsefälito. 7 Üa chechemenikemi lon letipei fansoun meinisin, iei mine a pwüng ngeniei an epwe iei usun ai tongekemi. Pun ämi meinisin oua chieneniei lon ei angang mi aüchea Kot a ngeniei, sap chök lon ei fansoun üa nom lon imwen fötek, nge pwal lon ewe fansoun lupwen üa ngasala pwe üpwe peni ewe Pworausen Manau o anüküchara. 8 Kot i nei chon pwärätä pwe a let mine üa apasa, pwe üa tongekemi meinisin, usun chök Kraist Jesus a fen tongekemi.
9 Ngang üa iotek pwe ämi chen epwe fokun lalapala lefilemi, oupwe pwal silei mine a let o weweöchiti mettoch meinisin, 10 pwe oupwe tongeni filätä mine a fokun mürina. Mürin oupwe limöch, esap pwal wor och mine oupwe mwäl won lon ewe Ränin än Kraist epwe liwinsefäl. 11 Iwe, manauemi epwe urela ren sokun föför mürina Jesus Kraist chök a tongeni afisätä, pwe Kot epwe ling o iteüöch ren.
Kraist chök i popun ach manau
1.12-30
12 Iwe, ämi pwii kana, üa mochen pwe oupwe silei pwe ekewe mettoch mi fis ngeniei ra wesewesen alisi chöülan ewe Pworausen Manau. 13 Iei popun ekewe sounfiu mi mamasa imwen Sisar pwal ekewe ekoch aramas ra silei pwe üa nom lon imwen fötek pokiten ngang eman chon angang ngeni Kraist. ✡ Föf 28.30 14 Ren ai nonom lon imwen fötek a fis pwe chomong pwiich kewe souläng ra apilükülükü ach Samol, iei mine a lapala ar pwora le afalafala ewe kapasen Kot, nge resap niuokus.
15 Ewer, ekoch me leir ra afalafala Kraist pokiten ra lolowo me anini, nge pwal ekoch ra afalafala ren öchün letiper. 16 Ätekei ra föri ei seni ar eäni chen, pokiten ar silei pwe Kot a ngeniei ewe angangen peni ewe Pworausen Manau, 17 nge ekewe ekoch resap afalafala Kraist fän wenecharen letiper, nge ren ar mochen kütta püsin ar, ra ekieki pwe repwe chök ariaföüüei lupwen üa nom lon imwen fötek.
18 Iwe, nge pwota üpwe lolilen ren? Ngang üpwe chök pwapwa pwe aramas ra afalafala Kraist lon sokopaten lapalap, ese lifilifil ika a pop seni och ekiek mi mwäl ika och ekiek mi pwüng. Ewer, üpwe chök sopwela le pwapwa, 19 pun üa silei pwe pokiten ämi iotek, pwal ren än Ngünün Jesus Kraist alisiei üpwe ngasala. 20 Üa fokun ösüküsükü o apilükülükü pwe üsap achanü, pwe üpwe föri wisei, nge fansoun meinisin epwe wor ai tipepwora, fokun lon ei fansoun, pwe üpwe alinga Kraist lon unusen manauei, ese lifilifil ika üpwe manau ika üpwe mäla. 21 Pun me rei Kraist ai manau, nge mäla ai feiöch. 22 Nge are ren ai üpwe sopwela le manau üa tongeni föri chomong sokun angang mi lomot, iwe, nge üsap silei mine üpwe filätä. 23 Iei mine üa tiperüörü lefilen ekei ruu ekiek: Üa fokun mochen ai üpwe feila o nom ren Kraist, pun iei met epwe fokun mürina, 24 nge ren ai üpwe manau epwe watte lomotan fänäsengesimi. 25 Üa fokun lükü pwe met üa apasa a pwüng, iei mine üa silei pwe üpwe nonometiu. Üpwe nonom remi meinisin pwe üpwe alisikemiitä pwe oupwe fefeitä o pwapwa lon ämi lükülük, 26 pwe lupwen üpwe liwinsefäl o nonom remi epwe fokun wor popun ämi oupwe aingaing lon Kraist Jesus fänäsengesi. 27 Iwe, iei ewe mettoch mi aüchea, pwe lapalapen manauemi epwe fich ngeni ewe Pworausen Manau usun Kraist. Mürin ese lifilifil ika ngang üpwe tongeni feila churikemi ika üsap, nge üpwe rongorong pwe oua üppos lon eu chök popun, oua pwal achocho le ütä lon eu chök tip fän iten ämi lükü ewe Pworausen Manau. 28 Ousap niuokusiti ekewe aramas mi ü ngenikemi. Oupwe tipepwora fansoun meinisin. Ei epwe alletätä ngeniir pwe ir ra lus, nge ämi oua win, pokiten Kot a fang ngenikemi ämi win. 29 Pun Kot a ngenikemi ewe wis mi aüchea pwe oupwe angang ngeni Kraist, sap chök ren ämi oupwe lükü i, nge pwal ren ämi oupwe riaföü fän itan. 30 Iei ämi oua tongeni etiei lon ewe fiu üa eäni fän iten ai peni ewe Pworausen Manau. Iei pwal chök ewe fiu oua küna me rei me lom, nge oua pwal rongorong pwe üa chüen eäni iei. ✡ Föf 16.19-40