Kölfel
Kapas akom
I. Iten ei puk: Kölfel. Ei puk a iteni ei it, pun mine a mak lon, köl mi fel, souläng ra eäni lon ar fel ngeni Kot seni me lom tori ikenai.
II. Chon makei ei puk: Mi wor ekoch chon makei ei puk. Ikkei iter:
Tafit a makei ina epwe ükükün 73
Ekewe mwirimwirin Kora 10
Asaf 12
Salomon 2
Etan 1
Heman 1
pwal Moses 1
Mi pwal wor ekoch Kölfel esap fat iö a makeer.
III. Itelapemongen ei puk: Ngüni, kopwe mwareiti ewe Samol mi Lapalap.
IV. Kapas aüchean ei puk: Än chon lükülük mwareiti Kot me ar iotek.
V. Masouen ei puk Kölfel: Ei puk eu puken köl me iotek me lon Paipel. A lefiletam lefilen fansoun än ekewe chon mak makei ekei Kölfel, pun ekei köl minen fansoun Moses tori fansoun än chon Juta liwinsefäl seni ar oola. Nge ekewe chon Israel ra achufengeni ekei köl me iotek o aea lon fansoun ar fel ngeni Kot. Mürin ra apacha ekei Kölfel ngeni nöür Paipel. Mi wor chomong sokun Kölfel: Kölün mwareiti me fel ngeni Kot, iotekin tüngor alilis, tümwün me küna manau, tüngoren amusamusen tipis, kölün kilisou fän iten än Kot afeiöchüür, pwal tüngor pwe Kot epwe apwüngü chon oputer. Ekei iotek ra eäni fän iten eman chök ika fän iten eu mwü. Ekoch ekei iotek ra pwärätä mefien mwökütükütün leluken eman aramas, nge ekoch ra pwärätä osupwangen me mefien nöün Kot aramas meinisin. Jesus a aea ekei Kölfel, pwal ekewe chon makei Testament mi Fö ra aea ekoch wokisin seniir. Iei mine ekei Kölfel ra aüchea me ren ekewe souläng lon mwichefel seni lepoputan tori ikenai.
VI. Tettelin masouen ei puk: Ekei 150 Kölfel ra kinikinitiu lon limu kinikin:
1. Kölfel 1-41: Usun aramas me än Kot föri läng me fanüfan
2. Kölfel 42-72: Usun chon Israel me ar ngasala
3. Kölfel 73-89: Usun än aramas fel ngeni Kot, pwal usun ewe imwenfel
4. Kölfel 90-106: Usun än aramas siamü won fanüfan
5. Kölfel 107-150: Usun än aramas mwareiti Kot me än Kot kapas
AEUIN PUK
1
Eman aramas mi pwüng me eman aramasangau
1.1-6
Ra feiöch ekewe aramas resap fetal fän öüröüräen aramasangau,
resap apirü föförün ekewe chon tipis,
resap pwal nom ren ekewe chon turunufas,
nge ra pwapwaiti än ewe Samol mi Lapalap allük
o ekieki usun lerän me lepwin.
Ätekewe ra wewe ngeni irä mi mär ünükün ekewe chanpupu,
ra ua lon fansoun räs,
nge chör resap aiolol.
Meinisin mine ra föri a fisiöch. Jer 17.8
Nge ekewe aramasangau resap iei usun.
Pun ra wewe ngeni pipi asepwäl a ässala.
Iei mine ekewe aramasangau resap üöch lon ewe ränin kapwüng,
nge ekewe chon tipis resap nom lon mwichen chon pwüng.
Pun ewe Samol mi Lapalap a emweni o tümwünü ekewe chon pwüng,
nge ekewe aramasangau repwe fetal ngeni ewe lenien feiengau.

1:3: Jer 17.8