9
Kot me nöün kewe aramas a filiiretä
9.1-18
Ngang üpwe apasatä mine a let. Üsap chofona, pun ngang eman nöün Kraist. Mwelien letipei mi nom fän nemenien Ngünmifel a pwal anüküchara ngeniei, pwe üsap chofona, lupwen üa kapas usun watten ai lolilen, pwal usun riaföün letipei esap ükütiu fän iten aramasei lon fitukei! Ai äneän pwe amwo püsin ngang üpwe nom fän än Kot anümamau o imwüla seni Kraist fänäsengesiir. Ir nöün Kot kewe aramas a filiiretä. I a atolongeer lon tettelin nöün o a pwäri ngeniir an ling. I a föri an we pwon ngeniir o ngeniir ekewe Allük. Ra fel ngeni Kot fän pwüng o angei än Kot kewe pwon. Eks 9.4 Ir mwirimwirin ar kewe lewo re Ipru mi iteföüla, pwal Kraist eman me leir lon an nom lon fituk. Sipwe mwareiti Kot tori feilfeilachök, ewe mi nemeni mettoch meinisin. Amen.
Ngang üsap apasa pwe än Kot we pwon esap pwönüetä. Pun sap chon Israel meinisin ra nöün Kot aramas. Sap pwal ekewe mwirimwirin Apraham meinisin ir nöün Kot. Kot a üreni Apraham, “Ekewe mwirimwirin Isaak chök, ikkei ir mwirimwirum kewe üa pwon ngonuk.” Ken 21.12 Wewen ei, pwe ekewe nau mi upun won Apraham sap ir meinisin nöün Kot. Nge ekewe nau mi uputiu pokiten än Kot we pwon, ir wesewesen mwirimwirin. Pun iei masouen än Kot we pwon, “Lon ewe fansoun mi fich üpwe liwinsefälito, iwe, Sara epwe nöüni eman ät.” Ken 18.10 10 Nge sap iei chök. Pun nöün Repeka kewe ruoman ät ra semeni eman chök sam, iei i ach we lewo Isaak. 11 Nge me mwen än ekewe lippwe resamwo uputiu, ika me mwen ar resamwo föri och föför mi mürina ika mi ngau, (pwe än Kot ekiek lon an fil epwe pwönüetä, 12 ewe fil esap longolong won föför, nge a longolong won an kö) Kot a fen üreni Repeka, “Ewe mwänichi epwe angang ngeni ewe mi kis.” Ken 25.23 13 Pun iei usun a mak lon ewe Toropwe mi Pin, “Üa echeni Jakop, nge üa oput Esau.” Mal 1.2-3
14 Iwe, ifa usun, sipwe apasa pwe Kot a föri mine esap pwüng? Apwi, esap ina! 15 Pun a apasa ngeni Moses, “Üpwe ümöümöch ngeni iö üa mochen ümöümöch ngeni. Üpwe pwal eäni tong ngeni iö üa mochen eäni tong ngeni.” Eks 33.19 16 Iei mine än Kot fil esap longolong won än eman aramas mochen ika an föför, nge a longolong won än Kot ümöümöch. 17 Pun iei usun mine a mak lon ewe Toropwe mi Pin fän iten ewe kingen Isip, “Üa awisa ngonuk ewe wisen king pwe üpwe nöünöü en le pwärala ai manaman, pwe itei epwe föüla won unusen fanüfan.” Eks 9.16 18 Iei usun Kot a ümöümöch ngeni iö a mochen ümöümöch ngeni, nge a pwal aülöföreai eman i a mochen aülöföreai.
Än Kot song me an ümöümöch
9.19–10.4
19 Iwe, eman me leimi epwe üreniei, “Are a iei usun, epwe ifa usun än Kot epwe tongeni atipisi eman? Iö epwe tongeni ü ngeni letipen Kot?” 20 Pwii, nge pwota ka tongeni wippin ngeni Kot? Ifa usun, eu sepi seni pwül a tongeni aisini ewe chon föri, “Pwota ka föriei pwe üpwe iei usun?” Ais 29.16; 45.9 21 Ifa usun, ewe chon för sepi esap wor an pwüng an epwe föri met a mochen seni ewe eu chök pwül? Esap tongeni föri eu sepi fän iten rän mi aüchea, pwal eu sepi fän iten iteiten rän?
22 Iei usun mine Kot a föri. A mochen pwärala an song o aiti ngeni aramas an manaman. Nge a fokun mosonotam lon an engila ngeni chokewe a song ngeniir, ir mi molotä ngeni feiengau. 23 A pwal mochen pwärala an ling mi lapalap, a torikich, kich chokewe a ümöümöch ngeni, o a amolakich pwe sipwe angei an we ling. 24 Pun kich chokewe i a köriir, sap chök seni me lein ekewe chon Juta, nge pwal seni me lein ekewe chon lükün Israel. 25 Iei usun mine a mak lon puken Osea,
“Ekewe aramas esap ir nei,
üpwe aita ngeniir ‘Nei aramas’!
Chon ewe mwü üsap echeniir,
üpwe aita ngeniir ‘Nei mi achengicheng’! Os 2.23
26 Lon ewe chök leni ia ra rongorong ewe kapas,
‘Ämi ousap nei aramas’, ikenan repwe iteni nöün Kot ewe mi Manau.” Os 1.10 27 Iwe, Aisea a kökkö fän leüömong usun Israel, “Inamwo ika ekewe chon Israel ra chomong usun pien aroset, ekoch chök me leir repwe küna manau, 28 pun ewe Samol epwe müttir apwüngü chon fanüfan meinisin.” Ais 10.22-23 29 Iei usun a fis mine Aisea a fen apasa me mwan, “Are ewe Samol mi Unusen Manaman esap amanaua ekoch mwirimwirich, kich sipwe usun chök chon Sotom me chon Komora.” Ais 1.9
Chon Israel me ewe Kapasen Manau
9.30–10.4
30 Iwe, met sipwe tongeni apasa? Ekewe chon lükün Israel resap kütta usun ar repwe eäni pwüng me ren Kot, ra küna pwüng ren ar lükülük. 31 Nge ekewe chon Israel mi kütta eu allük epwe alisiir pwe repwe küna pwüng me ren Kot, nge resap küna. 32 Pwota resap küna? Pokiten mine ra föri esap longolong won lükülük, nge a longolong won met ra föri. Iei usun ra chepetek won ewe “föün chepetek”, 33 usun ewe Toropwe mi Pin a kapas usun,
“Nengeni, üa anomu lon Sion eföü fau
aramas repwe chepetek ren,
eu achau aramas repwe opuri.
Nge iö a lükü i esap küna lichipüng.” Ais 28.16

9:4: Eks 9.4

9:7: Ken 21.12

9:9: Ken 18.10

9:12: Ken 25.23

9:13: Mal 1.2-3

9:15: Eks 33.19

9:17: Eks 9.16

9:20: Ais 29.16; 45.9

9:25: Os 2.23

9:26: Os 1.10

9:28: Ais 10.22-23

9:29: Ais 1.9

9:33: Ais 28.16