16
Än Paulus kapong
16.1-16
Üa mochen asile ngenikemi pworausen fefinach we Föpe mi angang lon ewe mwichefel lon Kenkrea. Oupwe etiwa neminei fän iten ewe Samol usun mine oua föri ngeni ekewe chon pin o oupwe alisi i lon mine a osupwang ren, pun i a pwal alisi chomong aramas, a pwal alisiei.
Ai kapong ngeni Prisila me Akwila, chienei kewe chon angang lon ewe angangen Kraist. Föf 18.2 Ra amoleeretä pwe repwe ninnila fän itei. Üa fokun kilisou ngeniir, nge sap ngang chök, pwe pwal chon ekewe mwichefelin chon lükün Israel meinisin. Pwal ai kapong ngeni ewe mwichefel mi chufengen lon imwer.
Ai kapong ngeni chienei mi achengicheng Epänetus, i ätewe mi akomwen lükü Kraist lon ewe fanü Asia. Ai kapong ngeni Maria, neminewe mi angang weires fän itemi. Pwal ai kapong ngeni Antronikus me Junias chienei kewe chon Juta mi etiei le nom lon imwen fötek. Ra fokun iteföüla me lein ekewe soukünö o ra pwal akom le souläng mwei. Ai kapong ngeni Ampliatus chienei we mi achengicheng lon ach Samol. Ai kapong ngeni Urpanus chienach we chon angang lon än Kraist angang, pwal ngeni Stakis chienei we mi achengicheng. 10 Ai kapong ngeni Apeles, an allükülük ngeni Kraist a pwäpwäla. Pwal ai kapong ngeni chon leimwen Aristopulus. 11 Ai kapong ngeni Herotian, eman chienei chon Juta, pwal ngeni ekewe souläng ir chon leimwen Narsisus. 12 Ai kapong ngeni Trifana me Trifosa, ir mi angang ngeni ach Samol, pwal ai kapong ngeni fefinei mi achengicheng Persis, neminewe mi fokun angang weires fän iten ach Samol. 13 Ai kapong ngeni Rufus, i ewe chon angang mi iteföüla lon än ewe Samol angang, pwal ngeni inan we mi tümwünüei usun eman nöün. Mark 15.21 14 Ai kapong ngeni Asinkritus, Flekon, Hermes, Patropas, Hermas, pwal ngeni ekewe souläng mi nom rer. 15 Ai kapong ngeni Filolokus me Julia, ngeni Nereus me fefinan we, ngeni Olimpas, pwal ngeni ekewe chon pin meinisin mi nom rer. 16 Oupwe kapongfengen lefilemi ren ewe kapongen souläng. Chon ewe mwichefelin Kraist meinisin ra kapong ngenikemi.
Sopolan än Paulus kapasen öüröür
16.17-24
17 Ämi pwii kana, üa pese ngenikemi pwe oupwe afälikemi ren chokewe mi afisätä kinikinfesen lefilen aramas o atoka än aramas lükülük, ir ra ü ngeni ekewe kapas sia aiti ngenikemi. Ousap chiechi ngeniir. 18 Pun chokewe mi föri ei sokun föför resap angang ngeni Kraist ach Samol, nge ra angang ngeni püsin inisir. Ren ar kapas motoutou me kapas amichimich ra atupu ekewe aramas mi miritimang. 19 Aramas meinisin ra rongorong usun ämi aleasochis ngeni ewe Pworausen Manau, iei popun üa pwapwa usumi. Üa mochen ämi oupwe miritikai ngeni met a mürina, nge oupwe miritimang ngeni mine a ngau. 20 Iwe, Kot, i popun ach kinamwe, epwe müttir apachacha Satan fän pechemi. Ümöümöchün ach Samol Jesus epwe nonom remi.
21 Timoty, chienei we chon angang, a kapong ngenikemi, pwal Lusius, Jason me Sosipater, ir chienei kewe chon Juta, ra pwal kapong ngenikemi. Föf 16.1 22 Ngang Tertius, ewe mi makkei ei toropwe, üa eäni ewe kapongen souläng ngenikemi. 23 Kaius, ätewe üa nonom ren, pwal chon ewe mwichefel a mwichfengen lon imwan ra kapong ngenikemi. Erastus, ewe chon tümwünü moni fän iten ewe telinimw, me pwiich Kwartus ra kapong ngenikemi. Föf 19.29; 1.Kor 1.14; 2.Tim 4.20 24 [Ümöümöchün ach Samol Jesus Kraist epwe nonom remi meinisin. Amen.]
Än Paulus iotekin lesopolan
16.25-27
25 Ousipwe mwareiti Kot! I a tongeni anükücharakemi lon ämi lükülük ren ewe Pworausen Manau üa afalafala, ewe pworaus usun Jesus Kraist, pwal ren pwälan ewe monomon mi let a monomonola me lom lon chomong, chomong fansoun. 26 Nge iei ena monomon a pwäpwäla ren makkeen ekewe soufos, o ren än Kot, ewe mi manau tori feilfeilachök we allük a pwäla ngeni chon ekewe mwü meinisin ar repwe silei usun, pwe meinisin repwe lükü o aleasochis ngeni. 27 Ewe eman chök Kot, i chök ewe eman mi unusen tipachem, epwe ling ren Jesus Kraist tori feilfeilachök! Amen.

16:3: Föf 18.2

16:13: Mark 15.21

16:21: Föf 16.1

16:23: Föf 19.29; 1.Kor 1.14; 2.Tim 4.20