16
Sohn nein Saimon ahpw mweselsang Keser kolahng pakairkihong semeo dahme Sendepius wiadahr. Saimon eri ndaiong Sohn oh Sudas, nah pwutak laud riemeno, “Peneineien ei pahpa koaros, riei ko, oh ngehi, se mahwenki Israel ni uwen at kak, oh pak tohto se pweida ni at doare Israel. Eri, met I ohl laudlahr, ahpw kalahngan en Koht amwa mwahnakapw ahnsou wet. Kumwa pahn uhd wiliandi ngehi oh riei ko oh mahwenki atail wehi. Oh Koht en ketin ieiang kumwa.”
Sohn eri kapokonepene sounpei koahiek oh sounpein dak oahs en Israel 20,000, oh mwekidla pwe re en mahweniong Sendepius. Re pweidi nan Modein, oh manda nimensehngie re mwekidlahng nan patapato. Lapalahn karis ehu me dak oahs oh sounpei me alu pil mwekidla pwe re en mahweniong mehn Suhs, ahpw mie pillap ehu me ireirailpeseng. Sohn oh nah sounpei ko ahpw irekla sohpeilahng imwintihti ko, ahpw ni Sohn eh tehkada me nah sounpei ko masak kotehla pihlo, e ahpw tiengla kotehla mwohrail, oh nah sounpei ko ahpw kilang oh idawehnla. Sohn nehkpeseng nah sounpei ko oh kihdiong me dak oahs ko nanpwungen sounpei me alu ko, pwehki nein imwintihti sounpein dak oahs ar tohto. Sowi ahpw pepeuk oh mahwen tepida, Sendepius oh nah sounpei ko lohdi, oh me tohto rehrail me kamakamala. Luhwe ko sopolahng nan kelen Kedron. Sudas soahn nan peio, a rie pwutak Sohn pwakipwakihalahte imwintihti ko lao lel Kedron, wasa me Sendepius onehda sapahl. 10 Sounpei me sopohla ko tangalahng wasahn iroir kan me mi nan mohs kan en Asdod, oh Sohn ahpw isikada kahnimwo. Sounpei imwintihti 2,000 me kamakamala rahno, oh Sohn pwurala Sudia nsenamwahu.
Kamakamalahn Saimon oh Nah Pwutak Riemen
11 Samworo Lapalap Saimon idihada Tolemi, nein Apupus, pwe en kaunda sounpei kan me mi nan Patapat en Seriko. Tolemi inenen kepwehpwe, 12 pwehki eh pwoudiki nein Saimon serepein. 13 Ahpw e inenen ngoangkihla oh men uhd kaunda wehio. E ahpw wiahda koasoandi suwed ehu en kemehla Saimon oh nah pwutak ko. 14 Saimon, iangahki nah pwutak Madadaias oh Sudas, seiseiloakseli nan kisin kahnimw kan nan wehio, pwe re en tehk anahnepen aramas akan. Re lellahng Seriko nan sounpwong Sehpad, kaeisek ehu en sounpwong, nan pahr 177.z PAHR 177: Sounpar wet pahrekiong pahr 134 mwohn Krais.
15 Tolemi wie koasoakoasoanehte en kemehla Saimon oh nah pwutak riemeno, e ahpw kasamwo irail nan kisin kelen mahwen ehu me adaneki Dok, me e wiahda. E wiahiong irail lapalahn kamadipw ehu, ahpw e ekihla ohl ekei nan kehlo. 16 Ni Saimon oh nah pwutak ko ar sakaulahr, Tolemi oh ohl ako ahpw pwarada sang wasa re rukuruk ie wisik kedlahs oh tangalahng wasa kamadipw wiewiawi ie, wasa re kemehla ie Saimon, nah pwutak ko, oh ekei sounpapah ko. 17 Pwehki soangen mwekid suwed wet, Tolemi dupungki wiewia suwed ong wiewia mwahu.
18 Tolemi eri ntingihda kisinlikou kis duwen mehkan me e wiadahr oh kadaralahng nanmwarkio. Nan kisinlikowo e peki ekei sounpei en pekederla reh pwe re en sewese, oh kahnimw kan oh wehi en uhd kohieng pwe en kaunda. 19 E pil ntingihada kisinlikou kis oh kadaralahng lapalap en sounpei kan, luke irail en iangala ih, oh inoukihda me e pahn kihong irail silper, kohl, oh soangen kisakis teikan. Ih eri kadarala ekei nah aramas Keser pwe re en kemehla Sohn, 20 oh ekei e kadarala re en kalowehdi Serusalem oh dohl me Tehnpas Sarawio mi ie. 21 Ahpw mie aramas me mwadangala Keser mwohn nein Tolemi aramas ako oh pakairkihong Sohn me eh pahpao oh rie pwutak ko kamakamalahr, oh Tolemi pil kadarala ohl ekei pwe re en kemehla Sohn. 22 Sohn inenen masepwehkada ni eh rong rohng wet, ahpw pwehki pakair en mwekid wet eh mwadang leledohng, e koledi oh kemehla ohl ako me pekederla pwe re en kemehla.
23 Eri, soahng teikan me Sohn wiahda mwurin eh wiliandi eh pahpao: mahwen kan me e wia, eh wiewia kommwad akan, eh onehda sapahl kehl kan, oh soahng teikan me e wiadahr, 24 ntingdier nan poadopoad en eh mwehi ni eh wiewia Samworo Lapalap.

z16:14: PAHR 177: Sounpar wet pahrekiong pahr 134 mwohn Krais.