ESTER (Krihk)
Oaralap en Pwuhk wet
Pwuken Ester me kawehwehsang ni mahsen en Krihs iei kawehwehpen oh kalaudpen Pwuken Ester me kawehwehsang ni mahsen en Ipru. Iren wiewia kan nan pwuhk riau pwukat kereniong duwepenehte, ahpw oaritik kei me wekpeseng ie, iangahki wekpeseng en mwaren aramas akan. Kalaudpen wasa weneu, me sansal nan ire laud A-F nan pwuhk wet kapwarehda tapi tohrohr oh imwi tohrohr, oh kapehsepen kisinlikou kei duwen mwomwen koperment oh duwen palien lamalam sang rehn sounntingo eh kapatahiong kapakap oh duwen pasapengpen kapakap ako.
Audepe ni Oaralap
Ester wiahla lih nanmwarki A.1—2.23
En Aman eh koasoandi suwed ong mehn Suhs akan 3.1—5.14
Aman kamakamala 6.1—7.10
Mehn Suhs ako kalowehdi ar imwintihti kan 8.1—F.10
Ntingdien mwuhr
1
En Mordekai eh Ouraman a Ire laud A 1-17 duwehte Ire Laud 11.2—12.6 ni ekei kahwehwepen pwuhk wet ni mahsen en wai.
1-3 Mordekai, mehn Suhs men me kisehn peneinei en Pensamin, kalipilipalahr iangahki Sehoiakin, nanmwarkien Suda, ni ahnsou me Nepukadnesar, nanmwarkien Papilonia kalowehdi Serusalem. Mordekai nein Sair me kisehn kadaudok en Kis oh Simei. E kin koukousoan nan kahnimw en Persia nan Susa, wasa me e wia aramas lapalap emen nan tehnpesen Serksihs, nanmwarki lapalapo.
Ni keriaun sounpar en mwehin Serksihs, ni rahn keieu en sounpwong en Nisan, Mordekai ahpw wia ouraman ehu. 2 Nan. 24.10-16. Dene wasa koaros nin sampah lapalahn pingiping oh ngihl laud ngiringirisek, nansapwe posopos oh sahpw akan wie rerrer ni kamasepwehk kowalahpie. Mwuhr lapalahn drakon riemen pa pwarada, ira onopadahn peipene. Ira weriwer ni ngihl kamasepwehk, oh ni ngilara ko eh lelpeseng wasa koaros, wehi koaros en sampah ahpw onopada re en mahweniong sapwellimen Koht aramas pwung kan. Rahno wia rahn rotorot ehu ong sampah, rahn kansensuwed, rahnen kahpwal laud. Suwed oh pingiping tohr me mi nin sampah. Sapwellimen Koht aramas pwung kan koaros, masepwehkada kowahlap oh epwelkihda dahme pahn wiawihong irail. Re onopadahr ong mehla, re ahpw sohpeiong Koht pekipeki sawas. Nan ouramano ar pekipeko pasapeng sang rehn pillap kalaimwun pwoat me pwilipwilieisang nan kisin pwarer ehu. 10 Wasa rahnpeseng, ketipin dakada, oh aramas aktikitik kan ahpw kehlailla oh kamwomwala ar imwintihti aklapalap ko.
11 Mordekai eri pirida sang eh ouramano ni eh kilangadahr dahme Koht ketin koasoakoasoane en ketin wia. E ahpw medemedewe duwen ouramano rahno pwon oh song en wehwehki ia wehwe.
Mordekai Doarehla Mour en Nanmwarkio
12 Nindokon Mordekai eh komkommoal nan kelen tehnpaso, wasa me sapwellimen nanmwarkio ohl lekwusol riemen, Kapada oh Tara wie sinsile, 13 e ahpw rongada ara wiewia koasoandi suwed ehu. Ih eri rongorong kanahieng dahme ira ndindao oh esehda me ira wiewia koasoandi en kemehla nanmwarkio. Mordekai eri kohla kairehki Nanmwarki Serksihs duwen koasoandi suwed en ohl lekusol riemeno. 14 Nanmwarkio eri kapeidekihra, oh ni ara sakarkihda me mehlel pwoat met, ira ahpw pakahrla oh kamakamala.
15 Nanmwarkio eri ntingihedi ire wet nan pwuken nanmwarki, oh Mordekai pil ntingihedi duwen ire wet. 16 Nanmwarkio eri kasapwilada Mordekai nan dehu ehu nan tehnpaso oh ketikihong kisakis tohto mehn katingiheki dahme e wiadahro.
17 Ahpw Aman, nein Ammedada, mehn Akak me kin keniken pahn nanmwarkio, song en kahpwalihala Mordekai oh ienge mehn Suhs ako, pwehki eh men dupukohng Mordekai mehlahn ohl lekwusol riemeno.
Lih Nanmwarki Pasdi Kahngohdiong Serksihs
18-19 [1-2] Mepwukat wiawiher ni mwehin Nanmwarki Serksihs, me kaunda wehi 127, sang India lel Sudan, oh e kin ketiket nan mwoale me mi Susa, poahsoan kaunen Persia. Esra 4.6. 20 [3] Ni kesiluhn sounpar en sapwellime mwehi, nanmwarkio ahpw wiahda kamadipw ehu ong sapwellime sounkaweid koaros, ong wiliepen wehi teikan, soupeidi kan en Persia oh Media, oh pil kepina kan en wehi kan me e kakaun. 21 [4] Erein sounpwong weneu e ketin wiahda kapwar dipwisou kan en nan tehnpaso ni kasarawi pwei laud oh kaselel.
22 [5] Mwurin kasarawio nanmwarkio ahpw wiahiong tohn wehi teiko me mihmi nan kahnimwo lapalahn kamadipw ehu. E wiewiawihki erein wihk ehu oh e wiawi nan kelen tehnpaso. 23 [6] Re kapwatahkihda wasao kahdeng poh mei oh pwetepwet me wiawihkihda likou linen oh koatin, oh sahl poh ntahn mwel pirapiriong ni rihng silper me tenekdahng ni uhr marpel kei. Irail pil kihdiong wasao mehn mwomwohd kei me wiawihkihda kohl oh silper, wasao tatki marpel pohn dihpw oh pwetepwet, iangahki pohn menihke melengileng. Likou mweimwei menipinip kaselel me irepe mehn mwomwohd ko, oh rohs mi ni keile kan. 24 [7] Mie kep silper oh kohl, oh ehu kep ko kapwatki kisin takai kesempwal me uwen pweine mihmi ni uwen pweinen ten en silper kid, kepo kohda mehn kasansal. Wain mwahu tohto mie me kohsang nan sapwellimen nanmwarkio wasahn nahk wain. 25 [8] Sohte irairdi en tungoale wain. Nanmwarkio ketin ruwese papah ko en nan tehnpaso re en kihda uwen me ih oh tohnkamadipwo anahne.
26 [9] Ni ahnsowo, Lih Nanmwarki Pasdi pil kamakamadipwe lih akan nan tehnpaso.
27 [10] Ni keisuhn rahn me nanmwarkio kamakamadipwki, e inenen pereperen kowahlap, eri, e ahpw malipehdo ohl lekwusol isimen me kin papah, me iei: Aman, Pasan, Tara, Porase, Sadolda, Apadasa, oh Darapa. 28 [11] E ahpw mahsanihong irail re en kahrehdo lih nanmwarkio, pwe en kak ketikidahng lisoarop en lih nanmwarki pohn moangen liho oh suweikihong lapalap ako oh tohnkamadipwo, pwehki liho lih kasalel men. 29 [12] Ahpw Lih Nanmwarki Pasdi sohte peikiong oh sohte iangala papah ko. Met ahpw kanamenekihala nanmwarkio oh kahrehiong eh engiengda kowahlap.
30 [13] Ih eri mahsanihong sapwellime sounkaweid ko duwen en Pasdi eh pasapeng oh keinemwe rehrail dahme e pahn wia. 31-32 [14-15] Silimen irail, me keieu karanih nanmwarkio oh ahneki pwukoa laud, ahpw patohwanohng nanmwarkio dahme mi nan kosonned oh dahme pahn wiawihong Lih Nanmwarki Pasdi pwehki eh sapeikiong mahsen me e ketikihong papah ko. Iet mwaren sounkaweid ko: Arkeseus, Sarsateus, Malesear, lapalap en Persia oh Media kei.
33 [16] Nanmwarkio eri mahsanihong sapwellime lapalap ako oh kepina kan en Media oh Persia duwen lih nanmwarkio eh kahngohdiong. Mukaeus eri patohwanohng nanmwarkio oh koaros me patopato wasao: “Kaidehn komwihte me Lih Nanmwarki Pasdi kasarowehdi, ahpw e pil kasarowehdi kiht koaros. 34-35 [17-18] Ni at pwoud kan ar pahn rongada dahme lih nanmwarkio wiadahr, re pahn mwadangete kahngohdiongala ar pwoud kan oh mwamwahlikinirailla duwehte me Pasdi wiahiong komwi. 36 [19] Maing Wasa Lapalap, ma komw pahn kupwurki, komw ketin wiahda ehu kosonned oh kalohkihda me Pasdi solahr pahn pato mwohn nanmwarki. Komw ketin ntingihedi nan kosonned en Media oh Persia. Oh komw ketikihong emen lih tohrohr me pahn mwahusang dewen lih nanmwarki. Sohte ehu soahng tohrohr me kitail kak wia. 37 [20] Ni sapwellimomwi kalohko eh pahn lelpeseng wasa koaros nan wehiet, eri, lih koaros pahn waunekihla ar pwoud kan, mehnda ma ih ohl kepwehpwe de semwehmwe.”
38 [21] Nanmwarkio oh sapwellime lapalap ako inenen kupwurperenkihda lamalam wet, nanmwarkio eri kapwaiada. 39 [22] E ahpw ketin kadarpeseng sapwellime poahngok nan kisinlikou ong wasa koaros nan sapwellime wehi ni mahsen en ehuehu wehi, pwe ehuehu wehi en kak dehdehki kalohko ni uhdahn eh mahsen, nan poahngoko eh mahsanih me ohl pwopwoud kan en kaunda mehkoaros nan imwarail.

a^ Ire laud A 1-17 duwehte Ire Laud 11.2—12.6 ni ekei kahwehwepen pwuhk wet ni mahsen en wai.

1:1-3: 2 Nan. 24.10-16.

1:18-19: Esra 4.6.