2
Pi’in ni owchen Judah
I Jakob e immoy ragag nge l’agruw i pumo’on ni fak: Ruben, Simeon, Levi, Judah, Issakar, Zebulun, Dan, Josef, Benjamin, Naftali, Gad, nge Asher. Me Judah e lal e pumo’on ni fak u gubin. Ma dalip i yad e fakrow Bathshua ni le’engin, ni be’ nu Kanaan: ni aram Er, Onan, nge Shelah. I Er ni bin nganni’ ko pi pumo’on nem ni fak e ri thum’ ngaru’ ko kireb ma aram me thang SOMOL e pogofan rok. I Tamar ni i figirngiy fak Judah, e bay l’agruw e pagel ni fakrow Judah ni Perez nge Zerah.
Perez e l’agruw e pumo’on ni fak, i Hezron nge Hamul. Me Zerah ni walagen ni pumo’on e lal e pagel ni fak: Zimri, Ethan, Heman, Kalkol, nge Darda. I Akan nib mo’on ni fak Karmi, ni reb e pi’in owchen Zerah e girengiy e riya’ nga daken e girdi’ nu Israel ko fa pin’en nni fek u tan e mael ni tel nde pi’ ni kan mu’ i ognag ngak Got.
I Ethan e ta’reb e pagel ni fak ni Azariah.
Lik’egal rok David ni Pilung
I Hezron e dalip e pagel ni fak: Jerahmeel, Ram, nge Kaleb.
10 Irera’ fare um i girdi’ ni tabab rok Ram nge mada’ ngak Jesse: Ram, Amminadab, Nahshon (be’ nib mo’on nib ga’fan u lan fare ganong rok Judah), 11 Salmon, Boaz, 12 Obed, nge Jesse.
13 I Jesse e medlip e pagel ni fak. Ni rogon yarmen fithingarad e tabab ko en ni nganni’: Eliab, Abinadab, Shammah, 14 Nethanel, Raddai, 15 Ozem, nge David. 16 Miki immoy l’agruw i ppin ni fak, ni Zeruyah nge Abigail.
Me Zeruyah ni fare bpin ni fak Jesse e immoy dalip i pagel ni fak: Abishai, Joab, nge Asahel. 17 Ma fa binem e bpin ni fak ni Abigail e figirngiy Jether, nreb i owchen Ishmael, miyow fakay reb e pagel ni Amasa fithingan.
Pi’in owchen Hezron
18 I Kaleb nib mo’on ni fak Hezron e le’engiy Azubah ngar fakyew be’ ni bpin ni Jerioth fithingan. I Jerioth e dalip e pumo’on ni fak: Jesher, Shobab, nge Ardon. 19 Nga tomuren nike yim’ Azubah, me le’engiy Kaleb i Efrath, miyow diyennag be’ ni pagel ni Hur fithingan. 20 Ma fak Hur ni pumo’on e Uri, ma Uri e ir e chitamngin Bezalel.
21 Nap’an ni gaman e nel’i ragag e duw rok Hezron me le’engiy be’ ni bpin ni chitamngin e Makir ma walagen e Gilead. Miyow diyennag be’ ni pagel ni Segub fithingan, 22 ma fak Segub ni pumo’on e Jair. I Jair e i yog e thin u rliw’ nge dalip e binaw u lan e nug nu Gilead. 23 Machane nam nu Geshur ngu Aram e ra kolew nel’i ragag e yochi binaw u rom, nib mu’un fa galochi binaw ni Jair nge Kenath ngay, nge pi yochi binaw nib chugur ngay. Urngin e pi girdi’ ni yad ma par u rom e pi’in ni owchen Makir ni chitamngin Gilead. 24 Tomuren nike yim’ Hezron ma be’ ni pagel ni fak ni Kaleb e le’engiy Efrath ni aram e re bpin ni i le’engiy e chitamngin nike yim’. Miyow diyennag be’ nib pagel ni Ashhur fithingan, ni ir e sunmiy fachi binaw nu Tekoa.
Pi’in ni Owchen Jerahmeel
25 I Jerahmeel e bin ba nganni’ e pumo’on ni fak Hezron, ni immoy lal i pagel ni fak: Ram e ba nganni’, me yib Bunah, Oren, Ozem, nge Ahijah. 26-27 I Ram e immoy dalip i pagel ni fak: ni Maaz, Jamin, nge Eker. Miki le’engiy Jerahmeel reb e bpin ni Atarah fithingan, miyow diyennag be’ ni pagel ni Onam. 28 I Onam e l’agruw e pumo’on ni fak, i Shammai nge Jada. Me Shammai e ki fakay l’agruw e pagel, ni Nadab nge Abishur.
29 Me le’engiy Abishur be’ ni bpin ni Abihail fithingan, ngar diyen nigew l’agruw i pumo’on ni Ahban nge Molid. 30 Me Nadab ni be’ nib pumo’on ni walagen Abishur e fakay l’agruw e pagel, ni Seled nge Appaim, machane Seled e yim’ ni de fakay e pumo’on. 31 I Appaim e chitamngin Ishi, me Ishi e chitamngin Sheshan, me Sheshan e chitamngin Ahlai.
32 Me Jada nib mo’on ni walagen Shammai e l’agruw e pumo’on ni fak, ni Jether nge Jonathan, machane Jether e yim’ ni de fakay e pumo’on. 33 Me Jonathan e l’agruw e pumo’on ni fak ni Peleth nge Zaza. Gubin e picha’ ney ma yad e pi’in owchen i Jerahmeel.
34 I Sheshan e de fakay e pagel, kemus ni go’ ppin pifak. Ma immoy be’ ni pumo’on ni tapigpig rok ni be’ nu Egypt ni Jarha fithingan, 35 ni ir e pi’ Sheshan reb fapi ppin ni pifak ngak nge le’engiy. Miyow diyennag be’ nib pagel ni Attai fithingan. 36 Irera’ fare um i girdi’ ni tabab rok Attai nge mada’ ngak Elishama: Attai, Nathan, Zabad, 37 Eflal, Obed, 38 Jehu, Azariah, 39 Helez, Eleasah, 40 Sismai, Shallum, 41 Jekamiah, nge Elishama.
Ku Boch e pi’in ni owchen Kaleb
42 Bin nganni’ e pagel u fak Kaleb ni walagen i Jerahmeel, e nni tunguy Mesha ngak. Me Mesha e chitamngin Zif, ni ir chitamngin Mareshah, ni chitamngin Hebron. 43 I Hebron e immoy aningeg i pagel ni fak: Korah, Tappuah, Rekem, nge Shema. 44 Me Shema e chitamngin Raham ni chitamngin Jorkeam. Me Rekem nib mo’on ni walagen Shema e chitamngin Shammai, 45 ni ir e chitamngin Maon, ni chitamngin Bethzur.
46 Ma immoy yug reb e bpin rok Kaleb ni Efah fithingan, miki diyennag dalip e pagel ni fak Kaleb: ni Haran, Moza, nge Gazez. Ma Haran e kubay reb e pagel ni fak ni Gazez fithingan.
47 (Be’ nib mo’on ni Jahdai fithingan e immoy nel’ i pagel ni fak: ni Regem, Jotham, Geshan, Pelet, Efah, nge Shaaf.)
48 Ma ki immoy yug reb e bpin rok Kaleb, ni Maakah ni gergeleg l’agruw e pagel ni fak Kaleb, ni Sheber nge Tirhanah. 49 Me munmun miki fakay fare pin l’agruw e pagel: ni Shaaf ni ir e sunmeg fachi binaw nu Madmannah; nge Shevah ni ir e sunmeg fa galchi binaw nu Machbenah ngu Gibea.
Miki immoy be’ ni bpin ni fak Kaleb ni Aksah fithingan.
50 Ma tin ni ba’aray e ku boch e pi’in owchen Kaleb.
I Hur e bin nib nganni’ ko pumo’on u fak Kaleb nge Efrath ni bpin rok. Me Shobal nib mo’on ni fak Hur e ir e sunmeg yu Kiriath Jearim, 51 ma en migid u pifak ni pumo’on e Salma ni ir e sunmeg yu Bethlehem, ma bin dalip e pumo’on ni fak e Haref ni ir e sunmeg yu Bethgader.
52 I Shobal ni ir e sunmeg yu Kiriath Jearim, ma ir e chitamngin fapi girdi’ nu Haroeh, nge baley ko girdi’ nu Menuhoth, 53 nge yuke girdi’ ni ba’aray ni yad ma par u lan yu Kiriath Jearim: pi Ithrite, Puthite, Shumathite, nge pi Mishraite. (Girdi’ ko fa gali binaw nu Zorah ngu Eshtaol e girdi’en e yuke girdi’ ney.)
54 I Salma ni ir e sunmeg yu Bethlehem, ma ir e chitamngin e girdi’ nu Netofath, ngu Atroth Beth Joab, ngu Zorite, ni yad ba ta’reb ko fa gal ke girdi’ nu Manahath.
55 (Yuke girdi’ ni ba’aray ni yad ba salap ko yol nge rogon i yoloy ya’an ban’en ni ur pired u lan yu Jabez: ni aram pi Tirath, Shimeath, nge Sukath. Yad e pi Kenite ni ur mabgolgad ko pi Rekabite.)