GIN MIGID E BABYOR NI PI’
JOHN
Gin migid e babyor e yoloy John ni en nib ilal ko galesiya ngak be’ ni bpin nge pifak ni yad bt’uf rok, ni yibe leamnag ni fare pin nge pifak e be yip’ fan ba galesiya nge girdi’en. Be fonownag John e girdi’ ni ngar pired nib t’uf bagayad rok bagayad ma ngar ayuwgad ko pi tamchib ni go’ gogi ban’en nge tin ni yad be fil.
Tin ni bay riy
Tabolngin 1–3
T’ufeg e th’abi ga’fan 4–6
Nga ni ayuw ko pi tamchib ni go’ bogi ban’en 7–11
Tin tomur e thin 12–13
1
Re babyor ney e yib rok e en nib ilal —
Ni yan ngak fare pin nge pifak* FARE PINNGE PIFAK: Sana be yip’ fan ba galasiya nge chonggin (ku arrogon ko verse 4, 5). ni bogni’ nri yad ba t’uf rog. Gathi kemus ni go’ gag, ya urngin e girdi’ ni karnanged e tin riyul’ ni gimed ba t’uf rorad, ya n’en nib riyul’ e ke par u fithik’dad ma bayi par rodad ni dariy n’umngin nap’an.
I Got ni Chitamangiy nge Somol Jesus Kristus, ni Fak e en ni Chitamangiy, e ngu’ur ayuwegew gadad, ma yow be runguydad, ma yow be pi’ e gapas nga lanin’dad, ngu’ud pired riy u fithik’ e yul’yul’ nge t’ufeg.
Tin nib riyul’ nge t’ufeg
Kari gu fefelan’ ni kugnang ni be par boch pifakam ni yad ba yul’yul’ ko tin nib riyul’, ni bod rogon nike yog e en ni Chitamangiy ngodad ni ngad rin’ed. Ere gu be wenig ngom, i gur e re pin nir ni gab t’uf rog: ni gadad gubin ni nge bagadad me t’ufeg bagadad. Re bugithin ney ni kug yoloy kug pi’ ngom e gathi bbugithin nib be’ech nike yog Got ni ngan rin’; ireray e re bugithin ni kan pi’ ngodad ko tabolngin. Fan e re bugithin ney ni gu be yog ni nge t’uf be’ rok be’ e aram e thingar da pired ni gadad be fol ko tin ke yog Got ngodad ni ngad rin’ed. Re bugithin ney nike pi’ Got ni ngan fol riy ni bod rogon ni kam rung’aged aram ko tabolngin e ba’aray nike ga’ar: thingar um pired ni gimed gubin nib t’uf bigimed rok bigimed.
Bo’or e pi’in yad be bannag e girdi’ ni kar wergad u fayleng, ni girdi’ ndarir weliyed ni Jesus Kristus e yib i ngal’ ni be’ nrayag ni nge yim’. Ra aram rogon be’ ma ir be’ ni be bannag e girdi’, ma aram e ir e To’ogor rok Kristus. Ere mu ayuwgad, ya ri mul u pa’med e tin ni kad muruwliyed, ya nge yag ngomed urngin e tin ni ngan pi’ ngomed.
En nder par nib yul’yul’ ko tin ni yib i fil Kristus ngodad, machane me yan nge thum’ nga wuru’, e de moy Got rok. 10 Fa’anra yib be’ ngomed ni gathi tin ni fil Jesus ngodad e ke fek i yib, ma dab mu pininged nga tabinaw romed; ni mus ni nge lungumed ngak, “Nge yib e gapas gom,” ma dab mogned ngak. 11 Ya en nra yog e re bugithin ney ngak e yow ra mang ngabang ngu’ur rin’ew e kireb ni be rin’ fa’anem.
Tin tomur e thin
12 Bo’or ban’en ni ngog ngomed, machane gu ba’adag ndab gu tay nga babyor; ya gu be finey ni nggub gguymed ngad nonad, nge yag nda felfelan’gad. 13 Pifak e en ni walagem ni bpin PIFAK E EN NI WALAGEM NI BPIN: Sana be yip’ fan chonggin ba galasiya ni cha’ney ni yol e ku bagyad. e be lungurad e nge felan’ Got ngom.

*1:1 FARE PINNGE PIFAK: Sana be yip’ fan ba galasiya nge chonggin (ku arrogon ko verse 4, 5).

1:13 PIFAK E EN NI WALAGEM NI BPIN: Sana be yip’ fan chonggin ba galasiya ni cha’ney ni yol e ku bagyad.