KAEN NI L’AGRUW E BABYOR NI
2 SAMUEL
Murung’agen e Re Ke Babyor Ney
Kaen Ni L’agruw e Samuel e ba ul ul ko Kaen Ni M’on e Samuel ni chepin David ni Pilung. Som’on e i gagiyegnag yu Judah ni bay ko ley ni yimuch e nam (yu guruy ni 1–4), me munmun me gagiyegnag e nam ni ga’ngin, nib mu’un yu Israel ngay ni bay ko ley ni lel’och e nam (yu guruy ni 5–24). Be dag rogon ni athamgiliy David ni nge ta’rebnag me ga’nag gil’ilungun, ma aram e thingari cham ngak pire’ e to’ogor rok ni boch e bay u lan e nam ma boch e beyib u wuru’ e nam. I David e be’ nrib mich Got u wan’ ma ba’adag ni ngi i fol rok, ma girdi’ ko nam rok e ra pired ni yad ba yul’yul’ ngak. Machane David e ki rin’ e tin rib kireb ni fan e i rin’ e tin ba’adag e dowef rok. Ma fa’ani yib Nathan ni profet rok Somol ngak me weliy ngak David e tin ke rin’ nrib kireb, me kolngan’ David me yog ngak Somol e denen rok. Ma fa’ani gechignag Got David me par ni bfel’ u wan’.
Rarogon David nge tin i rin’ nge tini thognag e ribfel u wan’ e girdi’ nu Israel, ni n’uw nap’an nga tomuren David mra gafgow e girdi’ ko nam miyad leamnag ni mang e yigi yag reb e pilung ngorad ni be’ ni owchen David ara “fak David”, ni be’ ni bod David.
Gathon e Re Ke Babyor Ney
Gagiyeg ni i tay David u Judah 1:1—4:12
Gagiyeg ni i tay David u ga’ngin yu Israel 5:1—24:25
a. Tin som’on e duw 5:1—10:19
b. David nge Bathsheba 11:1—12:25
c. Mom’aw nge gafgow 12:26—20:26
d. Tin tomur e duw 21:1—24:25
1
David ni nang nike yim’ Saul
Nap’an ni yim’ Saul, me sul David nike gel ngak e pi Amalekite ko mael, me yib i par nga Ziklag ni l’agruw e rran. Me reb e rran riy me taw be’ nib pagel ni yib ko gin ni ba’aram ni n’uf Saul nge pi salthaw rok e tent rorad riy ngar pired riy. Ma ke guchthuy e mad u daken, ma ke tay e but’ nga fithik’ i lolugen, ni aram e be dag ni kari kireban’. Me yib ngak David me yib i siro’ ngak ni aram e ke tay fan David. Me fith David ngak ni ga’ar, “Ka mub u uw?”
Me ga’ar, “Kug thay ko pi tent rok piyu Israel.”
Me ga’ar David, “Mu weliy ngog e tin ke buch.”
Me ga’ar, “Ke mil e pi salthaw rodad ko fare mael, ma pire’ e girdi’ rodad e ke yim’. Ma ku er rogon Saul nge Jonathan ni fak ni kan li’row.”
Me fith David ngak ni ga’ar, “Ke di’in ma kam nang nike yim’ Saul nge Jonathan?”
Me fulweg ni ga’ar, “Gu bay u daken e burey ni Gilboa, mu gguy Saul nike rugoy taban e sarey rok nga fithik’ e but’ ke duwgil ngay, ma aram e ke yib e pi chariot rok e to’ogor nge ku er i tay e girdi’ nike af nga daken e os ni yad be chugur i yib ngak. 1 Sa 31:1–13; 1 Kro 10:1–12 Me cheal me guyeg me piningeg. Mu gu fulweg lungun. Me fith ngog ko gag mini’, mu gu weliy ngak ni gag ba Amalekite. Me ga’ar ngog, ‘Ba gel e maad’ad ni kug tay ni be chugur ni nggum’. Moy, ngam li’eg nggum’.’ 10 Ma aram mu gu wan ngak nggu li’ ngem’, ya gumanang nnap’an ni yugu ra aw nga but’ ma ke yim’. Ma aram mu gu chuweg e te’eliyaw rok u lolugen nge bachal rok ni ba’aray rog ni kug fek i yib ni nggu pi’ ngom.” 11 Me guchthuy David e mad rok ni bochan e kari kireban’, ma urngin e tirok e girdi’ nra guchthuyed e mad rorad. 12 Miyad par ni kari kireban’rad ma yad be yor, mra pired ndar abichgad nge yan i mada’ ko blayal’ ni bochan Saul nge Jonathan, nge fan ngak yu Israel, ni girdi’ rok SOMOL, ni bochan e pire’ i yad e kan li’ ko re mael nem.
13 Me fith David fare pagel ni ir e ke fek fapi thin i yib ngak ni ga’ar, “Ga be’ u uw?”
Me fulweg ni ga’ar, “Gu ba Amalekite, machane gu be par ko nam rom.”
14 Me fith David ngak ni ga’ar, “I di’in me math’ magaren rom ni ngam li’ e pilung ni SOMOL e turguy?” 15 Me pining David reb e girdi’ rok me ga’ar ngak, “Mu li’ e cha’nir ngem’.” Me li’ fa’anem fare Amalekite ngem’, 16 me ga’ar David ngak fare Amalekite, “Gur e kam girengiy e biney e pa’ nga dakenam. Gur e mu turguy e n’en ni ngan rin’ ngom nnap’an ni mog ni gur e kam li’ e en ni SOMOL e turguy ni nge mang pilung.”
David ni yornag Saul nge Jonathan
17 Ba’aray e dololoy’ ni tay David ni fan ngak Saul nge Jonathan ni fak Saul, 18 me yog ni nga ni fil ngak e girdi’ nu Judah. (Ka ni yoloy u lan e Babyor rok Jashar.)
19 “Pi’in ni yad ma yog e thin rodad e karm’ad u daken e ted nu Israel!
Ma tin th’abi falu’ ko salthaw rodad e kan li’rad!
20 Dab mu weliyed u lan yu Gath
ara lan e yu pa’ i kanawo’ nu Ashkelon.
Ya ri felan’ e ppin nu Filistia;
nge ppin ni fak e pi’in ndar nanged Got.
 
21 “Manga yigi siy i aw e n’uw ara wa’angachal nga daken e yungi ted nu Gilboa;
manga yigi par daken e ted riy ndab ki tugul ban’en riy.
Ya fapi shield ni fen fapi salthaw nib falu’ ko mael e ke par u daken e but’ u rom ni kem’ay fan,
fa gi shield rok Saul e daknir gapgepnag.
22 Gat’ing rok Jonathan e ma li’ e girdi’,
saydon rok Saul e der runguy e girdi’,
ma aw ngak e pi’in nib gel ngar awgad nga but’, mma li’ e pi to’ogor ngarm’ad.
 
23 “Saul nge Jonathan e ri yow bfel’ ma yow ba t’uf;
u ranow u ta’bang ko biney e tamilang, ma ku ra m’ow u ta’bang.
Yow ba machreg ko arche’ ni eagle, ma yow ba gel ko layon!
 
24 “Gimed e ppin nu Israel, mu yor niged Saul!
Ya ke yin’ e mad nib row nga dakenmed nib tolang puluwon,
ma ke nunuw nagmed ko gol nge pin’en nib t’uf ma ba tolang puluwon.
25 “Pi salthaw ni yad ba falu’ e karm’ad,
kan li’rad ko mael.
Jonathan e ke par u daken e ted nib yam’.
 
26 “Jonathan ni walageg, ke kireban’ug ngom;
ya ri gab t’uf rog!
Rogon ni ug par ni gub t’uf rom e rib fel’,
kab gel nga rogon nib t’uf e pumo’on rok e ppin.”
 
27 “Pi salthaw ni yad ba falu’ e karm’ad,
talin e cham rorad e ke par ni kem’ay fan.”

1:6 1 Sa 31:1–13; 1 Kro 10:1–12