GIN MIGID E BABYOR NI PI’ PAUL NGE YAN NGAK
TIMOTHY
Gin migid e babyor rok Paul ngak Timothy e fonownag Paul Timothy ni be’ ni kab pagel ni yow nga maruwel. Tin ni ba ga’ fan riy e rogon ni ngu’un athamgil. I yog Paul ngak Timothy ni ngi i par nib yul’yul’ nge wereg murung’agen Jesus Kristus, ni ir fare Thin Ni Bfel’ nib riyul’, ma thangri ki weliy e thin ko bin Kakrom e M’ag, ma ngi i ngongliy e maruwel nrogon e tamchib ko fare Thin Ni Bfel’, ni yugu aram rogon ni bay e gafgow nge togopluw ni be yib ngak.
Ri be fonownag Paul Timothy nge dabi un ko malu’ag thin ndariyfan nma tay e pi’in ndar nanged fan e n’en ni yad be yog, ya dabi yib fan ngak e pi’in yad be motoyil ngay.
Urngin e pin’ey e puguran ngak Timothy rogon ni i par Paul nib gel e michan’ rok, nge rogon ni i par nib gumaen’, ma ba t’uf Got nge girdi’ rok, ma ma athamgil u fithik’ e gafgow nge togopluw ni yibe tay ngak.
Tin ni bay riy
Tabolngin 1:1–2
Magaer ni pining Paul ngak Got nge athamgil ni pi’ nga laniyan’ Timothy 1:3—2:13
Thin nma pi’ e ayuw nge fonow 2:14—4:5
Paul ni weliy salpen 4:6–18
Tin tomur e thin 4:19–22
1
1 Re babyor ney e yib rok Paul, ni Got e leamnag ni nge mang reb e apostel rok Kristus Jesus, ma kanol’oeg ni nge weliy murung’agen fare yafos ni yog Got nra pi’, ni ir e ke yag ngodad ni fan e kad ta’ab girdi’gad Kristus Jesus.
2 Ngak fakag i Timothy nib t’uf rog ni be lungug:
I Got ni Chitamangiy nge Kristus Jesus ni Somol rodad e ngu’ur ayuwegew gur ma yow be runguyem ma yow be pi’ e gapas nga lanin’um.
Magaer ni pining Paul ngak Got nge athamgil ni pi’ nga laniyan’ Timothy
3 Gu ma pining e magaer ngak Got, ni ir e gu be pigpig ngak ma dariy ban’en ni be yog lanin’ug ngog ni kug rin’ nib kireb, ni bod ni i rin’ pi chitamag. Gu be yibilayem ngak Got ma gu be pining e magaer ngak ni bocham nneap’ nge rran. 4 Dagur pag talin lu’am ni map’, ma ku gum’ ni bochan ni gomanga gguyem nggu felfelan’. 5 Ma dagur pag talin rogon nrib mich Got u wun’um, ni ta’reb rogon ngarogon nib mich Got u wan’ e titaw rom i Lois nge chitinam i Eunice. Rib muduwgil u wun’ug ni ku bay rom. 6 Ireray fan ni gu be puguran ngom ni ngam guy rogon ngam mon’og ko fare n’en ni gab salap riy nib tow’ath ni pi’ Got ngom ko fa ngiyal’nem ni gu tay pa’ag nga dakenam nggu yibilayem ngak Got. 7 Ya Kan Nthothup nike pi’ Got ngodad e dar ma ngongliydad ni ngad rusgad; machane Kan Nthothup rok e ma pi’ gelngidad, mma fal’egdad nge t’uf Got rodad nge girdi’, mma pi’ gelngidad nge yag nda t’ared lanin’dad.
8 Ere dab mu tamra’ ni ngu’um weliy murung’agen e Somol rodad; fa reb e mu tamra’ ngog, ni kug kalbus ni bochan. Machane mu’un ko gafgow ni fan ko fare Thin Ni Bfel’, nrogon gelngim ni bay i pi’ Got ngom. 9 Ke thapegdad ngak ma ke piningdad ni ngad manged girdi’en, ni gathi bochan e tin ni bfel’ ban’en ni kad ngongliyed, machane bochan e tin ke leamnag nge runguy rok ngodad. I runguydad u daken Kristus Jesus u m’on ndawori sunumiy e fayleng riy, 10 ma chiney e kan dag kad guyed ni fan e ke yib i m’ug e en nma thapegdad ngak Got, ni aram Kristus Jesus. Ya Kristus e ke taleg gelngin e yam’, ma Thin Ni Bfel’ nike yib Kristus i weliy ngodad e ir e ke tamilang nagdad u murung’agen e yafos ndariy n’umngin nap’an.
11 I Got e ke turguyeg ni nggu weliy ngak e girdi’ fare Thin Ni Bfel’, ni aram e gag reb e apostel nge tamchib, 12 ma ireray fan ni kug gafgow. Machane dagur tamra’ ngay, ya gu manang e en ni kug pagan’ug ngak, ma bmuduwgil u wun’ug nrayag rok ni nge tay e tin ke pag fan ngog ni dabi buch ban’en riy nge yan i mada’ ko Rofen ni bay sul riy. 13 Dab mpag fapi thin nib riyul’ ni kug fil ngom, ya ir e ngu’um fol riy, mu um par u fithik’ e michan’ nge t’ufeg nma yag ngodad ko ta’ab girdi’ ni gadad ma tay Kristus Jesus. 14 Fare Kan Nthothup ni be par u fithik’dad e gelngin e ngam ayuweg ngay fa pin’en ni bfel’ ni fa’an kan pag fan ngom.
15 Ga manang faram ni urngin e girdi’ ko nug nu Asia ni kar paged gag, nib mu’un Figelus nge Hermogenes ngay. 16 Nge runguy Somol girdi’en e tabinaw ku Onesiforus, ya bo’or yay nike pi’ e athamgil nga lanin’ug. Der tamra’ ngay ni gu bay u kalbus, 17 ya nap’an ni yigi taw nga Roma me gayeg i gayeg nge pir’egeg. 18 Nge runguy Somol e cha’nem ko Chirofen ni ba’aram! Me gur ma ga manang urngin e tin ke rin’ ni fan ngog u Efesus.
DRAFT VERSION — Proofreading in progress