12
Paluk’af
Me non SOMOL ngak Moses nge Aron u lan yu Egypt ni ga’ar, “Re pul ney e nge par ni bin m’on e pul romed ko duw. Mognew ngak urngin e girdi’ nu Israel ni rofen ni ragag ko re pul ney e ra reb e pumo’on ma thangri mel’eg ba pifak e saf ara ba pifak e kaming ni fan ko birok e tabinaw. Ma fa’anra ba’ reb e tabinaw nib lich e girdi’ riy ndabiyag ni ngar longuyed reb e gamanman ni go’ yad, ma ngar cheaggad ko re tabinaw ni yad bbuguliyoror, ngar paged e f’oth ko fare gamanman ni oren e tin nrayag ni kay be’ ni be yan u rogon urngin e girdi’ ko fa gal tabnaw. Ngam mel’egged ba saf ara ba kaming ni pumo’on, ni ta’reb e duw rok ma dariy bang u downgin nib kireb. Mi gimed tay nge mada’ ko rofen ni ragag nge aningeg ko re pul ney, aram e rofen ni urngin piyu Israel ni ngar li’ed e gamanman rorad nike aw e lumor. Ma aram e ngar feked boch e racha’ riy ngar thiyed nga daken e gal raba’ i langan e mab nge nga daken langan e mab ko pi naun ni ir e ngan longuy e pi gamanman nem riy. Re nep’ i n’em e ngan urfiy ufin e pi gamanman nem min th’ag ko flowa ni dariy e is riy nge woldug nib mo’oy. Dab ni longuy ni k’akling fa nlith ko ran, machane yira longuy ni kan urfiy ni polo’, nib mu’un lolugen nge ay nge urngin ban’en ni bay u fithik’ i downgin ngay. 10 Thingar dab mu ted boch riy nge af ko kadbul; ya fa’anra magey boch riy, ma thingar ni urfiy. 11 Ba’aray rogon ni ngam longuyed: ngam longuyed ni kam m’aged e leed romed nga lukngumed, ma kam chuwgad nga sus romed, ma bay e sog romed u pa’med; thingar mu longuyed ni gimed ba gur. Ya mur ko madnom ni Paluk’af ni fan ngak SOMOL.
12 “Ra taw ko re nep’ nem ma bay gu wan u lan e nam nu Egypt nggu thang e pogofan rok urngin e tin nganni’ i fakey ni pumo’on, ni girdi’ nge gamanman. Bay gu gechignag urngin e pi got rok yu Egypt. I Gag SOMOL. 13 Rracha’ ko pi mab e bayi mang pow ko pi naun ni gimed be par riy. Nap’an ni gu ra guy e racha’, mu gu luk’afmed ni dab gu bucheg ban’en romed, u nap’an ni gu be gechignag yu Egypt. 14 Re rran nem e nge par ni puguran ngomed; thingar um madnom niged ni gimed be tayfan SOMOL. Thingar mu madnom niged ni gubin e mfen ni nge par nib madnom ndab ni pag.”
Dnom ko flowa ni dariy e is riy
15 “Medlip e rran nthingar mu koyed e flowa ni dariy e is riy. Chirofen ni som’on e ngam chuweged u naun romed urngin e is, ya fa’anra kay be’ e flowa ni kan tay e is ngay ko bin som’on e rran nge mada’ ko bin medlip, ma ngan chuweg u fithik’ e tirog e girdi’. 16 Bin m’on e rran, nge ku bayay ko chirofen ni gaman e medlip e ngam mu’ulunggad ngam liyorgad ngak SOMOL. Dariy e maruwel ni ngan ngongliy ko pi rran nem, machane ngam ngongliyed e ggan ni nge kay urngin e girdi’. 17 Ngu’um madnom niged e re madnom ney ni yibe kay e flowa ni dariy e is riy, ya irera’ e rofen ni gu fekmed nga wuru’ yu Egypt ni aram fenmed pire’. Um madnom niged e re rran ney ni urngin e mfen ndab mu paged. 18 Thingar mu koyed e flowa ni dariy e is riy ko nep’ ko chirofen ni ragag nge aningeg fen e pul ko bin m’on e pul nge yan i mada’ ko nep’ ko chirofen ni reliw’ nge ta’reb fen e pul. 19 Medlip e rran nthingari dab ni pir’eg u naun romed e is, ya fa’anra kay be’ e flowa ni ka nin’ e is ngay, ma ngan chuweg u fithik’ piyu Israel, ndemturug ko be’ u bang ara be’ nu Israel. 20 Thingar dab mu koyed e flowa ni bay e is riy; gimed gubin nthingar mu koyed e flowa ndariy e is riy.”
Bin som’on e Paluk’af
21 Me ulunguy Moses urngin e girdi’ nu Israel ni yad ma yog e thin rorad, me ga’ar ngorad, “Ngam marod nge bigimed me mel’eg ba fak e saf ara ba fak e kaming nge li’, ya nge madnomnag girdi’en e tabnaw rom e Paluk’af. 22 Me bigimed me fek ba pa’ngin e hyssop nge lthag nga fithik’ e racha’ nike tay nga baraba’ i ban’en nge achey nga ruw raba’ i langan e mab nge nga daken langan e mab. Dariy bigimed ni nge yan nga wuru’ e naun rok nge mada’ ko kadbul. 23 Ya ngiyal’ ni bay yan SOMOL u lan yu Egypt ni nge thang e fan rok piyu Egypt, e bayi guy e racha’ u daken langan e mab ngu daken ruw raba’ i langan e mab, ma dabi pag e Engel ko Yam’ nge yib ngalan e naun romed nge thang e pogofan. 24 Thingar mu folgad ko pi motochiyel ney, ni gimed nge pifakmed ma nge par riy ni aray rogon i yan ni dariy n’umngin nap’an. 25 Ma nap’an ni gimed ra yan ngalan e re nam ni bayi pi’ SOMOL ngomed, ni bod rogon nike yog ni bay rin’, ma thingar um rin’ed e pin’ey. 26 Mra fithmed pifakmed ko mangfan e pin’ey, 27 ma nge lungumed, ‘Irera’ e maligach ko Paluk’af ni yibe liyor ngak SOMOL, ni bochan e luk’af e pi naun rok piyu Israel u lan yu Egypt ko fa ngiyal’nem ni thang e fan rok piyu Egypt me pag e pi tabinaw rodad nde bit’ ko girdi’ riy.’ ”
Me ragbug fapi girdi’ nga but’ ngar liyorgad ngak SOMOL. 28 Me yan piyu Israel miyad fol riy; ya ra ngongliyed e tin nike yog SOMOL ngak Moses nge Aron.
Yam’ ni tay e tin nganni’ e pagel ni fakey
29 Me lukngun e nep’ me thang SOMOL e pogofan rok urngin e tin nganni’ i fakey ni pumo’on u Egypt, ni mus rok e bin nganni’ e pagel ni fak Farao ni ir e ra yan nga luwan Farao nge mada’ ko bin nganni’ e pagel ni fak ba kalbus ni bay u kalbus; ma ku er rogon ni urngin e tin som’on u pifak e gamanman nli’rad. 30 Farao nge pi tolang ni bay u tan pa’ nge urngin piyu Egypt nra odgad e re nep’ i n’em, ma yibe yor ni ba ga’ lamey u Egypt, ya dariy reb e tabinaw ndawori yim’ reb e pagel riy. 31 Ka re nep’ i n’em me l’oeg Farao e thin nge yan ngak Moses nge Aron ni ngarbow ngak, me ga’ar ngorow, “Gimew nge piyu Israel e ngam gurgad ngam chuwgad u Egypt; mu chuwgad u fithik’ e girdi’ rog ngam marod ngam meybilgad ngak SOMOL, ni bod rogon ni kam wenig nigew ngog. 32 Mfeked e saf nge kaming nge garbaw romed ngam marod, ni bod rogon ni kam wenig nigew ngog. Miki gimew meybil ngak SOMOL nge ayuwegneg.” 33 Me tay piyu Egypt e gur ngak piyu Israel ni ngar gurgad ngar chuwgad u Egypt; ya lungurad, “Fa’anra dab mu chuwgad ma gamad gubin ni bay gu m’ad.” 34 Ma aram me fek piyu Israel e flowa rorad ni kan gelgiy nda nin’ e is ngay ngar ted nga daken porad ni kar ted ngalan yu raba’ i ban’en ni tafen e flowa ma kar inged e mad rorad u wuru’. 35 I rin’ piyu Israel ni bod rogon nike yog Moses ngorad, miyad ning ngak piyu Egypt e gol nge nunuw nni ngongliy ko silber, nge mad. 36 Ma ke gagiyegnag SOMOL piyu Egypt ke yib fan piyu Israel u wun’rad, ma aram me pi’ piyu Egypt ngorad e tin kar ninged ngorad. I fek piyu Israel e machaf rok piyu Egypt.
Piyu Israel nra chuwgad u Egypt
37 Piyu Israel e ra chuwgad u Rameses ngranod ni yad be nameg yu Sukkoth. Urngin e pumo’on e gonapan 600,000 nranod u but’, nda nthe’eg e ppin nge bitir. 38 Bo’or yugu boch e girdi’, ma bo’or e saf nge kaming nge garbaw niki un ngorad ngranod. 39 Ra lithed e flowa nda nin’ e is ngay nra feked ko fapi flowa ni kan gelgiy u Egypt, ni bochan e nog ngorad nib tomgin ni ngar chuwgad u Egypt. Ere dakiyag nra ngongliyed e ggan ara ra ngongliyed ni bay e is riy.
40 Piyu Israel e ra pired u Egypt ni 430 e duw. Act 7:6 41 Rofen ni gaman e 430 e duw ngay e gubin e ganong rok SOMOL nra chuwgad u Egypt. 42 Reb e nep’ ni matanagiyrad SOMOL nge fekrad nga wuru’ yu Egypt; re nep’ nem e ntay ni birok SOMOL e nep’, ni ba nep’ ni gubin e mfen rok piyu Israel ma thingar ur odgad riy.
Motochiyel ko Paluk’af
43 Me ga’ar SOMOL ngak Moses nge Aron, “Ireray e pi gafal ko Paluk’af: Pi’in gathiyad piyu Israel e dab ra uned i kay boch e ggan ko Paluk’af, 44 machane ra reb e sib ni kam chuw’iyed mrayag ni nge un i kay e re ggan ney ni fa’an gimed ra maad’adnag nsom’on. 45 Dabiyag ni nge kay be’ nib milekag ara be’ ni yibe pi’ puluwon ko pigpig ni be tay. 46 Ma thingar ni kay u lan e re naun ni ir e ni fal’eg rogon riy; thingar dab ni fek boch e ufin riy nga wean. Ma dab ni t’ar reb i yil’an fare gamanman. Num 9:12; Jhn 19:36 47 Ri ga’ngin yu Israel nthingar ra aywegned e re madnom ney, 48 machane dariy reb e pumo’on ndawor ni maad’adnag nrayag ni nge kay boch fapi ggan. Fa’anra mang e bay be’ u reb e nam ni yad ma par chon e tabnaw rok u fithik’med, ni ba’adag ni nge un i madnomnag e Paluk’af nge liyor ngak SOMOL, ma th’abi som’on e ngam maad’ad niged urngin e pumo’on ni yad bay u lan e tabnaw rok. Ma aram e fin rayag ni nge un ko fare madnom ni bod be’ nni gargeleg u Israel. 49 Re motochiyel ney e ta’reb rogon ngak e pi’in ni gargelegrad u Israel nge pi’in nu bang ni yad be par u fithik’med.” 50 Gubin piyu Israel nra folgad riy ngar rin’ed e tin keyog SOMOL ngak Moses nge Aron. 51 Ma karofen nem me fek SOMOL fapi ganong nu Israel nga wuru’ yu Egypt.

12:40 Act 7:6

12:46 Num 9:12; Jhn 19:36