BABYOR NI
HAGGAI
Murung’agen e Re Ke Babyor Ney
Fare Babyor ni Haggai e bay riy e thin ni yog Somol ngak Haggai ni profet ni nge weliy ngak e girdi’ ko duw ni 520 u m’on ndawori yib Kristus. Ngiyal’nem e ke sul e girdi’ ni ur pired u Babylon ni kalbus nga Jerusalem. Kar pired u Jerusalem ni in e duw, machane kab puth e Tempel ndawor ni toy. Mu daken fapi thin rok Somol ngak Haggai ni profet e yog Somol ngorad e tayugang’ ko girdi’ ni ngar toyed fare Tempel bayay, me micheg Somol ngorad ni bayi ayuwegrad nge fel’ rogorad miyad par u fithik’ e gapas ni bochan e bay ur rin’ed e tin ni ba’adag Somol.
Gathon e Re Ke Babyor Ney
Nog ni ngan toy bayay fare Tempel 1:1–15
Pi thin ni nge fal’eg lanin’uy me pi’ e l’agan’ 2:1–23
1
Yog SOMOL ni ngan toy bayay fare Tempel
1 Bin l’agruw e duw ni Darius e Pilung nu Persia, ni aram e bin m’on e rran ko bin n’el e pul, me non SOMOL u daken Haggai ni profet. Thin ni yog SOMOL e fan ngak fare governor nu Judah, ni Zerubbabel nib mo’on ni fak Shealtiel, ma ku fan ngak fare Prist ni Th’abi Ga’, ni aram Joshua nib mo’on ni fak Jehozadak.
2 I ga’ar SOMOL ni Gubin ma Rayag Rok ngak Haggai, “Pi girdi’ ney e yad be yog ni gathi aray e ngiyal’ ni bfel’ ni ngan toy bayay fare Tempel.” 3 Ma aram me yog SOMOL e re thin ney u l’ugun Haggai ko fapi girdi’: 4 “Girdi’ rog, mangfan ni gimed be par u lan bogi naun ni fafalel’ ma kabay e Tempel rog u but’ nib puth? 5 Damur guyed e n’en ni be buch romed? 6 Kam yunged e woldug ni grain nrib yo’or, machane wom’ngin ni kam t’ared e ri bochu’uw. Bay e ggan ni ngam ked, machane de gaman ni ngam fosgad ngay. Bay e wayin ni ngam unumed, machane de gaman ni ngam chinggad ngay. Bay e mad romed, machane de gaman ni nge magwal nagmed. Ma pi’in yad be maruwel e dab ra gaman gad u pulworad. 7 Damur guyed fan e ran’ey nike yodroy? 8 Ere mmarod e chiney ngalan e burey ngam th’abed e ren, ngam toyed bayay fare Tempel; ma aram e ra felfelan’ug min liyor ngog ni bod nthingar nrin’.
9 “Um fineyed ni bay mu t’ired wom’ngin e woldug nib yo’or, machane me yan i aw nri buchu’uw. Ma nap’an e mu feked fapi wom’ngin e woldug nga tabnaw, mug kirebnag. Mangfan e binem ni gu rin’? Bochan fare Tempel rog ni be par nib puth u but’ mra bugmed ma ke thay parwon i muruwliy e naun rok. 10 Aram fan ndakir yib e n’uw ma dakir tugul ban’en. 11 Kug pag e yal’ nib gel kem’ay e ran u daken e but’ ngu daken e ted, nge yung i flang ko grain, nge yung i woldug ko grape, nge milay’ ko olive, nge gubin mit e woldug nma tugul u but’, ma ku er rogon e gamanman nge girdi’, nge gubin ban’en ni gimed be guy rogon ni ngam yunged.”
Girdi’ nima fol ko tin ke tay SOMOL chiylen
12 Ma aram e Zerubbabel nge Joshua nge gubin e girdi’ ni ur kalbusgad u wuru’ e nam u Babylon, ni karsuled e yad be rin’ e n’en ni yog e SOMOL rorad ngorad ni ngar rin’ed. Kar pired ni yad ba marus ma yad be fol rok Haggai ni profet ni fare mal’og rok SOMOL. 13 Ma aram me yog Haggai e thin rok SOMOL ngak fapi girdi’: “Gube micheg ni bay gu par romed.” 14 Me pasignag SOMOL laniyan’ gubin e girdi’ ni ngar muruwliyed fare Tempel: Zerubbabel, fare governor nu Judah; Joshua, ni fare Prist ni Th’abi Ga’, nge gubin e girdi’ ni ur kalbusgad u bang ni kar sulod. Ra tababgad ko maruwel ko fare Tempel rok SOMOL ni Gubin ma Rayag Rok ni Got rorad, 15 ko rofen ni rliw’ nge aningeg ko bin nnel’ e pul ko duw ni l’agruw ni Darius e ir e pilung.
DRAFT VERSION — Proofreading in progress