1 Irera’ e thin ni murung’agen yu Tyre.

Mu gogo’gad ko gafgowan’ gimed e sala u maday! Gin ma yan i gif e barkow romed ngay e ka ni gathay; naun riy nge gin yima yuluy e barkow riy e ke mogoth. Ra sul e barkow romed u Cyprus, mi gimed nang salpen. 2 Mu sigel’gel’gad nga but’, gimed e pi’in tasiyobay u Sidon! Gimed be pi’ e girdi’ 3 ngranod u maday ni ngar chuway’gad miyad pi’ ni chuway’ e grain ni yima yung u Egypt miyad siyobay u gubin e pi nam.

4 Binaw nu Sidon, mu tamra’gad, kem’ay famed! Day nge nge t’ay e regur e ke n’agmed ma be ga’ar, “Dariy e bbitir ni fakag. Ma dariy e ngiyal’ ni gu chugol pagel ara ppin.”

5 Mus ngak piyu Egypt ni yad ra dada’ ngay nap’an ni yad ra nang ni ka ni gathay yu Tyre.

6 Mu gogo’gad ko gafowan’, gimed e girdi’ nu Foenicia! Mu guyed rogon e mil nga Spain! 7 Moged irera’ fare binaw ko felfelan’ nu Tyre nni sunmiy ni kari kakrom? Irera’ fare binaw nma pi’ e girdi’ nge th’ab e day nge yan i par nga boch e nam? 8 Mini’ e tanomnag nge girengiy gubin e pin’ey nga daken yu Tyre, ni fare binaw nib sorok, ni pi siyobay riy e bogi fak e pilung ni yad e picha’ nth’abi gilbugwarad u fayleng? 9 I SOMOL ni Gubin ma Rayag Rok e tanomnag. I tanomnag ni fan e nge museg e tolngan’ rorad ko n’en ni kar rin’ed me sobut’nag e pi’in yad ma tayfan.

10 Marod ngam woldug niged fare nam, gimed e girdi’ ni gimed be par u Spain! Dakriy be’ nra yoror romed bingyal’. 11 I SOMOL e ke ki’yag pa’ nga daken e day ke pulpuluy e pi gagiyeg. Ke duwgiliy ni gin bay kenggin e siyobay riy u Foenicia e nge mogoth. 12 Binaw nu Sidon, felfelan’ romed e kemus, ma girdi’ romed e nge gafgow. Ni dariy fan ni yad ra mil nga Cyprus, ya ku dariy ba ayuw nra yib ngorad.

13 (Gathi piyu Assyria, ya piyu Babylon e ra paged e gamanman ni malboch nge wagay u daken yu Tyre. Piyu Babylon e ra suweged e tawo’en e thum’ ngalan binaw, ma yad e ka ra buthged e pi yoror u Tyre ni fan ko mael, kar paged fare binaw nike mogoth.)

14 Mu gogo’gad ko gafgowan’, gimed e pi sala u lan e pi regur! Ya fare binaw ni gimed ma ta’ ngay e ke mogoth.

15 Bayi taw nga bangiyal’ mi ni pagtalin yu Tyre ni melip i ragag e duw nap’an, ni aram n’umngin e yafos rok reb e pilung. Ra m’ay e pi duw nem ma yu Tyre e ra bod fa’anem nma falchuway’ ngak ni bay ko tang:

17 Nap’an nra m’ay fa medlip i ragag e duw, me pag SOMOL yu Tyre nge sul ko maruwel rok ni i rin’, ma aram e bayi pi’ ir nchuw’ay ngak gubin e nam nu fayleng. 18 Salpiy ni nge yag ngak ko siyobay e bay ni pi’ ngak SOMOL. Dabi cha’riy ngabang, machane pi’in yad ma liyor ngak SOMOL e bay ra faned fare salpiy rok ni ngar chuw’iyed e ggan nge mad nib t’uf rorad ngay.