GOSPEL ROK
MARK
Fare Gospel rok Mark e tabab ni ba’aray rogon: Ireray fare Thin Ni BFel’ ni murung’agen Jesus Kristus ni Fak Got. Mark e be dag ni Jesus e be’ ni bay gelngin Got ko thin rok mma tiyan’ ko tin nma rin’. Gelngin e yibe guy u daken e machib rok, ngu rogon ni i tuluf e mo’onyan’, ngu rogon ni i n’ag fan e denen ko girdi’. Jesus e i yog ir ni ir e en ni Fak e Girdi’ ni yib ni nge pi’ e pogofan rok ni fan e nge pithig e girdi’ ko denen rorad.
I Mark e ba ga’ ni be weliy murung’agen e tin ni i rin’ Jesus, ma ku be weliy nib tamilang murung’agen e machib ni i tay. Som’on e weliy Mark rogon John ni i tawfe nge rogon e tawfe ni tay ngak Jesus, nge mo’onyan’ ni i guy rogon e n’en nra rin’ me denen Jesus. Ma aram e be weliy Mark murung’agen Jesus ni i golnag e m’ar ma be machibnag e girdi’. Me munmun me nang pi gachalpen ko mini’ Jesus nge n’en ni be rin’, ma pi’in to’ogor rok e ri gel boch e togopluw ni ur ted ngak i yan. Yu guruy ntomur e be weliy murung’agen e bin tomur e wik ko par rok Jesus u fayleng, nib mu’un murung’agen e yam’ ni tay u daken e kuruth nge fos ko yam’ ni tay.
Fa l’agruw i tungun e thin ko babyor ku Mark ni kan tay ngalan e bracket [ ] e yibe leamnag ni yugu be’ e yoloy.
Tin ni bay riy
Tabolngin e Gospel 1:1–13
Jesus ni be machib ma be ayuweg e girdi’ nu Galile 1:14—9:50
U Galile nga Jerusalem 10:1–52
Bin tomur e wik ni immoy Jesus u Jerusalem nge pi binaw nib chugur ngay 11:1—15:47
Fos ko yam’ ni tay Jesus 16:1–8
Rogon ni i m’ug Jesus u tomuren nike fos ko yam’ nge rogon nni fek nga tharmiy 16:9–20
1
Machib ni tay John nma tawfe
(Matthew 3:1–12; Luke 3:1–18; John 1:19–28)
Ireray fare Thin Ni Bfel’ ni murung’agen Jesus Kristus, ni Fak Got;* Boch e babyor ni e dariy riy e Fak Got. ni tabab ni bod rogon ni ba’aray ni yoloy Isaiah ni profet:
“Ke ga’ar Got, ‘Ba’aray e mol’og rog, ni bay gu l’oeg nge m’on rom
nge bing e kanawo’ rom.’
Be tolul be’ u daken e ted ni be ga’ar:
‘Mu fal’eged rogon kanawo’en Somol,
mu yal’uweged e kanawo’ ni ngeb riy!’ ”
Ma aram me m’ug John u daken e ted ni desert, ni be tawfenag e girdi’ ma be machib m’ug John u daken e ted ni desert, ni be tawfe ma be machib. ni be ga’ar ko girdi’, “Mpi’ed keru’med ko denen ni gimed be rin’ min tawfe nagmed, me n’ag Got fan e denen romed u wan’.” Ma bo’or e girdi’ nranod ko nug nu Judea nge binaw nu Jerusalem ngaram ni ngar motoyilgad ngak John. Miyad weliy e denen rorad me tawfe nagrad u lan e lul’ ni Jordan.
Ma ke yin’ John e mad nni ngongliy nga bunu’en e kamel, ma ke leed nga keru’ e gamanman; ma ggan rok e asmen’ing nge honey ni be pir’eg u fithik’ e pan. Me yog ko girdi’ ni ga’ar, “En ni bay yib u tomureg e ri ka ba ga’ ngog; ya gag e ri gub sobut’ ndab gu bung ni nggu lumel nga but’ nggu pithig togfan e sus rok. I gag e gu be tawfe nagmed ko ran, machane ir e bayi tawfe nagmed ko fare Kan Nthothup.”
Tawfe ntay ngak Jesus nge rogon ni yib mo’onyan’ i guy rogon ni nge denen Jesus
(Matthew 3:13—4:11; Luke 3:21–22; 4:1–13)
De n’uw nap’an me yib Jesus u Nazareth, ni bay u lan e nug nu Galile, me tawfenag John Jesus u lan e lul’ ni Jordan. 10 Ma nap’an ni yib Jesus u fithik’ e ran nga talang me guy e tharmiy ni be mab, me guy fare Kan ni Thothup ni be yib u lang i yib nga daken ni bod ba arche’ ni dove. 11 Me rung’ag ba lam u tharmiy ni be ga’ar, “I gur Fakag, ni gab t’uf rog, ni kari felan’ug ngom.”
12 Kachingiyal’ nem me tay fare Kan ni Thothup nga laniyan’ Jesus ni nge yan Jesus nga daken e ted. 13 Me par Jesus u daken e ted ko gin ni bay e gamanman ni malboch riy ni aningeg i ragag e rran, mi i guy mo’onyan’ rogon e n’en nra rin’ me denen Jesus. Me yib e pi engel ngarbad ra pigpiggad ngak.
Jesus ni pining aningeg i girdi’en e fita’
(Matthew 4:12–22; Luke 4:14–15; 5:1–11)
14 Nga tomuren ni ka nin’ John nga kalbus, me yan Jesus nga Galile nge machibnag ngak e girdi’ e Thin Ni Bfel’ ni yib rok Got, 15 ni be ga’ar, “Ke taw nga nap’an nnog, ma gagiyeg rok Got e ke chugur! Mpi’ed keru’med ko denen ni gimed be rin’ nge mich u wun’med e Thin Ni Bfel’ ni yib rok Got!”
16 Ma nap’an ni be yan Jesus u to’oben e lipath nu Galile, me guy l’agruw i pumo’on ni yow ma fita’, ni aram Simon nge walagen ni Andrew, ni yow be fita’ ko nug u lan e lipath. 17 Me ga’ar Jesus ngorow, “Mu unew ngog mu gu fil ngomew rogon i yagnag e girdi’.” 18 Ka chingiyal’ nem miyow digey e nug rorow ngar unew ngak.
19 Ma fa’an ki yan bochu’uw ngam’on miki guy l’agruw i walag, ni aram James nge John, ni Zebede e chitamangirow, ni yow bay u lan e bowoch ni yow be fal’eg rogon e nug rorow. 20 Nap’an ni guyrow Jesus me piningrow; miyow digey e chitamangirow ni er Zebede u lan e bowoch, nge pi’in be pi’ Zebede puluwrad ni yad be maruwel rok, miyow un ngak Jesus.
Be’ nib mo’on nike ying ba mo’onyan’ ngak
(Luke 4:31–37)
21 Miyad taw ko binaw nu Kapernaum, ma nap’an ni yigi taw ko Sabbath me yan Jesus ngalan tafen e mu’ulung rok piyu Israel me tabab ko machib. 22 Ma pi’in ur motoyilgad ko thin rok e ra gin gad ngarogon e machib ni tay. Ya gathi ta’reb rogon ngak e pi’in tamchib ko Motochiyel; ya be machib ni bod be’ ni bay gelngin e thin rok.
23 Ka chingiyal’ nem me yib be’ nib mo’on nike ying ba mo’onyan’ ngak ngalan fare tafen e mu’ulung me tolul ni be ga’ar, 24 “I gur Jesus nu Nazareth, mang e ngam rin’ ngomad? Kamub ngaray ni ngam thang owchemad? Gu manang ko gur mini’ — i gur e mol’og rok Got ni gab thothup!”
25 Me non Jesus ngak fare mo’onyan’ ni ga’ar, “Mu th’ab gulungam, nga mub u fithik’ i downgin e cha’nir nga but’!”
26 Me pingeg fare mo’onyan’ fare mo’on ngi i da’da’ nib gel, me tolul fare mo’onyan’ me chuw u fithik’ facha’. 27 Mi yigo’o gin urngin e girdi’ ko n’en nike rin’ Jesus, miyad yog u fithik’rad ni lungurad, “Gur ren’ey e reb e machib nib be’ech? Cha’ney e bay mat’wun nrayag ni nge yog e n’en ni nge rin’ e mo’onyan’, miyad fol rok!”
28 Ma aram me wear murung’agen Jesus nib machreg nga gubin yang u daken e nug nu Galile.
Jesus ni chuweg e liliy rok bo’or e girdi’
(Matthew 8:14–17; Luke 4:38–41)
29 Me chuw Jesus nge pi gachalpen u tafen e mu’ulung ngranod nga tafen Simon nge Andrew; me un James nge John ngorad. 30 Ma bay e chitiningin e en nleengin Simon u bet nib m’ar nib gel e gowel u daken, ma nap’an ni yigi taw Jesus ngaram minog salpen ngak. 31 Me yan Jesus ngak, me kol pa’ me suwonnag ngalang. Me chuw e gowel u daken, ma aram me tabab fare pin i ayuwegrad ko tin nge yag ngorad.
32 Ma nap’an nike aw e lumor me fek e girdi’ urngin e pi’in yad mm’ar nge pi’in ke ying e mo’onyan’ ngorad i yib ngak Jesus: 33 Me mu’ulung gathon fare binaw nga mit e naun u wean. 34 Pire’ e girdi’ nib m’ar ni bo’or mit e liliy ni bay rorad ni gol nagrad Jesus, ma bpire’ e mo’onyan’ ni tuluf ngar chuwgad rok e pi’in ke ying e mo’onyan’ ngorad. Ma de pag Jesus fapi mo’onyan’ ni ngrogned ban’en, ya yad manang ko ir mini’.
Jesus ni machib u lan yu Galile
(Luke 4:42–44)
35 Tanirran ni kab neap’ me od Jesus nge yan nga wuru’ e binaw, me yan ngabangi n’en ndariy e girdi’ riy, me par u rom nge meybil. 36 Me yan Simon nge pi tafager rok ni yad be gay Jesus i yan; 37 ma nap’an nra pir’eged me lungurad ngak, “Be gayem urngin e girdi’.”
38 Me fulweg Jesus ni ga’ar, “Thingar darod ko pi binaw nib chugur ngaray, ya ngku gu machib riy, ya er fag ni kugub.”
39 Me yan u lan tafen e mu’ulung ni gubin u lan yu Galile, ni be machib ma be tuluf e mo’onyan’ rok e pi’in ke ying e mo’onyan’ ngorad.
Jesus ni golnag be’ nib mo’on
(Matthew 8:1–4; Luke 5:12–16)
40 Me yib be’ nib daraw ngak Jesus ni be wenig ngak nike ragbug u p’eowchen ni be ga’ar ngak, “Fa’anra bm’agan’um ngay, mrayag rom ni ngam be’ech nigeg.” NGAM BE’ECH NIGEG: Re m’ar ni daraw ney e ra bay rok be’ ma ke alit ko yalen rorad.
41 Me taganan’§ taganan’; boch e babyor e bay riy ni damumuw. Jesus ngak, me k’iyag pa’ nge math ngak me ga’ar, “Bm’agan’ug ngay, aram e ngam be’ech!” 42 Ma kachingiyal’ nem me chuw e daraw rok fa’anem nge gol. 43-44 Me ri tay Jesus chiylen ngak ni ga’ar, “Dabmog murung’agen e n’en ni kug rin’ ngom ku be’. Machane mman ndab mu tal u bang ngam man mu taw ngak e prist nge guy ko kabay e daraw rom fa dakuriy, ma ga pi’ fare maligach ni fa’ani yog Moses, ni nge mang mich rom ngak urngin e girdi’ ndakuriy e daraw rom e chiney.” Ma aram me l’oeg nge yan ni kachingiyal’ nem.
45 Me yan ngi i weliy murung’agen i yan, ni aram tapgin ma dakiyag ni yan Jesus ngalan reb e binaw nga fithik’ e girdi’ ni yo’or. Mi i par Jesus ko yungi n’en ndariy e girdi’ riy, me mang girdi’ e ur bad ngak u gubin yang.

*1:1 Boch e babyor ni e dariy riy e Fak Got.

1:4 m’ug John u daken e ted ni desert, ni be tawfe ma be machib.

1:40 NGAM BE’ECH NIGEG: Re m’ar ni daraw ney e ra bay rok be’ ma ke alit ko yalen rorad.

§1:41 taganan’; boch e babyor e bay riy ni damumuw.