32
Fapi Ganong ko ngek ko Jordan
(Deuteronomy 3:12–22)
Gal ganong rok Ruben nge Gad e ba yo’or e gamanman rorad. Nap’an e raguyed feni fel’ e binaw nu Jazer ngu Gilead ko chugol garbaw, marabad ngak Moses, Eleazar, nge tin ba’ram e tayugang’ ko ulung nu Israel ngar ga’argad ngorad, 3-4 “Re gin’ney nike ayweg SOMOL yu Israel kar pired ngay — ni pi binaw nu Ataroth, Dibon, Jazer, Nimrah, Heshbon, Elealeh, Sibmah, Nebo, ngu Beon — e bfel’ ko chugol gamanman, ma gamad e bo’or e gamanman romad. Ere wenig ngomed, mpi’ed e giney e but’ nge milfan ngomad, ma dab mu tawasargad ngomad ni nggu th’abed e Lul’ nu Jordan nga ba’nem nggu pired riy.”
Me fulweg Moses ni ga’ar, “Gimed ba’adag ni ngam pired u roy mi gimed pag pi chongmed nu Israel ngranod ko mael? Mang ni gimed be luf lanyan’ e girdi’ nu Israel ko th’um lul’ nga ba’nem ko binaw nike pi’ SOMOL ngorad? Er rogon e n’en ni rin’ pi chitmangimed u nap’an ni gu l’oegrad u Kadesh Barnea ni ngar lekagged e binaw. Mranod i yan nga talang ko Loway nu Eshcol miyad guy fare binaw, machane fa’anra sulod, miyad l’uf lanyan’ e girdi’ ko yan ko fare binaw nike pi’ SOMOL ngorad. 10 Me damumuw SOMOL e rofen nem me micheg bugithin ni ga’ar: 11 ‘Nggu micheg ni bochan e da ra yul’yul’gad ngog, are dakriy bagyad fapi pumo’on ni rliw’ e duw rok ngalang ni chuw u lan yu Egypt nra yan nga langgin fare binaw ni gu ognag ngak Abraham, Isaac, nge Jakob.’ 12 Ni urngin e girdi’ nib mu’un ko ran’ey, kemus ni Kaleb ni be’ nib mo’on ni fak Jefunneh ni reb e Kenizzite nge Joshua nib mo’on ni fak Nun; yow e ra pirew ni yow ba yul’yul’ ngak SOMOL. 13 I SOMOL e par nib damumuw ko girdi’ me digeyrad ngu’ur derawgad u daken e ted ni aningeg i ragag e duw nge taw ko ngiyal’ nike yim’ gathon fare mfen ni ur kireb naged lanyan’ SOMOL. 14 Ma chiney e gimed e kamun’ed luwan e pi chitamangimed kakrom, ni irera’ e bin be’ech e mfen nike sugnag e girdi’ ni tadenen, ni aram e ngam girngiyed nga daken yu Israel bayay fare damumuw rok SOMOL. 15 Fa’anra gimed e girdi’ rok Ruben nge Gad e gimed be siyeg ni ngam folgad rok SOMOL e chiney, ma bay i n’ag bayay urngin e pi girdi’ ney u roy u daken e ted, ma gimed tapgin e riya’ ni nge aw ngorad.”
16 Marbad ngak Moses ngar ga’argad, “Som’on e ngam pagmad nggu ubungyed e chumol ni malang u roy ni fan ko saf nge yoror ko binaw ni fan ko mael ngi i par pifakmad riy. 17 Ma aram e rayag ni gu uned ngak e pi’in gamad nu Israel ko mael magmad girengiy e mael nge yan i taw ko ngiyal’ ni kug warod gu ted yad ngalan fare binaw ni bay ra tafned. Ma be par pifakmad u lan e pi binaw ney ni kan yororiy ni fan ko mael, ni dariy ban’en nra rin’ e girdi’ u rom ngorad. 18 Dab gu sulod nga tabinaw romad nge mada’ ko ngiyal’ nike milfan ngak e tin kabay e girdi’ nu Israel fa yung i binaw ni kan turguy ni ngar tafned. 19 Ma dabki milfan ngomad bang e tirorad e binaw u ba’nem e Jordan, ya kem’ay i pi’ ngomad e tiromad e f’oth u ba’ ni ngek e Jordan.”
20 Me fulweg Moses, “Fa’anra n’en ni gimed be yog e arrogon u lanin’med, me’ere u roy u p’eowchen SOMOL e ngam fal’eged rogmed riy ko m’ag mael. 21 Urngin e salthaw romed e ngar thabed e Jordan nga ba’nem, ma SOMOL e nge pi’med ni ngam chamgad ngak e pi to’ogor rodad nge taw ko ngiyal’ nike gel SOMOL 22 ma ke tafnay e binaw. Ma aram migmed sul, ni bochan e kam lebuguyed e maruwel romed ngak SOMOL nge ngak e pi’in gimed ni piyu Israel. Ma aram e bay i micheg SOMOL ni re gi but’ ney ko ngek u Jordan e gimed e tafenmed. 23 Ma fa’anra da mu ted u gil’ e n’en ni kam og niged, ma nggog ngomed e chiney ni bay um denengad nib togopluw ngak SOMOL. Dabi maruwar u wun’med; ni yira gechig nagmed ni bochan e denen romed. 24 Ere mu fal’egged e pi binaw romed nge pi chumol ko saf romed, machane ngam rin’ed e n’en ni kam og naged ni ngam rin’ed.”
25 Me ga’ar fapi pumo’on ko ganong rok Gad nge Ruben ngak Moses, “Siro’, ma ri gamad ra rin’ ni bod ni kamog. 26 Pi le’engimad nge pifakmad nge garbaw nge saf romad e kayad bay u roy u lan e pi binaw nu Gilead. 27 Machane gamad gubin ni kug fal’eged rogomad ni nggu warod ko mael ni SOMOL e ke pi’mad. Gamad ra th’ab e Jordan nga ba’nem nggu chamgad, nri bod rogon ni kamog.”
28 Ma aram me ga’ar Moses ngak Eleazar, Joshua, nge tin kabay e tayugang’ nu Israel: 29 “Fapi pumo’on ko ganong rok Gad nge Ruben e fa’anra ngar th’abed e Jordan nga ba’nem ni ngar maelgad ni bod rogon nike yog SOMOL ma fa’anra yag ni ngar ayuweged gimed ngam koled e re gi binaw nem, ma aram e ngam pi’ed yu Gilead ngar tafned. 30 Ma fa’anra dab ra th’abed e Jordan nga ba’nem ngar uned ngomed ko mael, ma ku rayag ngorad fare f’oth ko binaw nu Kanaan, ni bod gimed.”
31 Me fulweg fapi pumo’on ko ganong rok Gad nge Ruben nra ga’argad, “Siro’, ri gamad ra rin’ ni bod nike yog SOMOL. 32 Gamad ra thum’ ngalan e binaw nu Kanaan ni SOMOL e ke pi’mad magmad yan ko mael, ya nge yag niki par nib milsuwon tafenmad ngomad u roy u ba’ ni ngek e Jordan.”
33 Me pi’ Moses urngin e binaw rok Sihon ni Pilung nu Amorite nge Og ni Pilung nu Bashan ko ganong rok Gad nge Ruben nge baley ko ganong rok Manasseh, nib mu’un ngay e yochi binaw nge charen i yan. 34 Fare ganong rok Gad e ku ra fal’eged fapi binaw min ngongliy e yoror riy ni fan ko mael. Ni binaw nu Dibon, Ataroth, Aroer, 35 Atroth Shofan, Jazer, Jogbehah, 36 Beth Nimrah, ngu Beth Haran. 37 Ma birok Ruben e ganong e ku ra fal’eged fapi binaw nu Heshbon, Elealeh, Kiriathaim, 38 Nebo, Baal Meon (ni biney e fithingan e kan thilyeg), ngu Sibmah. Miyad tunguy fithingan e pi binaw nem ni kar fal’eged.
39 Fare ke girdi’ rok Makir ni be’ ni pumo’on ni fak Manasseh e ranod ni mael ngalan e binaw nu Gilead, miyad kol e re binaw nem, miyad tuluf e pi Amorite ni ur pired u rom. 40 Ma aram me pi’ Moses yu Gilead ko fare ke girdi’ rok Makir, miyad par u rom. 41 Jair, ni be’ ko ganong rok Manasseh, e cham nge kol boch e binaw me tunguy fithingan e pi binaw nem “Ni bogi binaw rok Jair.” 42 I Nobah e cham nge kol yu Kenath nge binaw u langgin, me thilyeg fithingan nge tunguy ngachlen ngay ni Nobah.