BABYOR ROK
RUTH
Murung’agen e Re Ke Babyor Ney
Ngiyal’ ni i gagiyeg e pi judge ma bay be’ ni bpin nu Moab ni Ruth fithingan ni le’ay be’ u Israel. Ma fa’ani yim’ figirngin ni be’ nu Israel, me par Ruth nrib yul’yul’ ngak e chitiningin fa en figirngin nge ngak fare Got nu Israel. Me munmun me le’ay Ruth reb e pumo’on ni girdi’en fare pumo’on rok nike yim’, me gargelnag bochi pagel ni Obed, mi Obed e chitamngin Jesse, mi Jese e chitamngin David, ni aram fare pilung nib th’abi ga’ nu Israel.
Pi marang’ag ni bay ko Judges e be dag e pi gafgow ni yib ngak yu Israel ko ngiyal’ nra pi’ed keru’rad ngak e Got rorad. Murung’agen Ruth e be dag rogon ni tow’athnag Got be’ u yugu reb e nam ni bochan e toer ngak e Got nu Israel, ma aram me par nike mang bagayad fapi girdi’en Got nib yul’yul’.
Gathon e Re Ke Babyor Ney
Naomi ni sul nga Bethlehem ni yow Ruth 1:1–22
Ruth e mada’nag Boaz 2:1—3:18
Boaz e le’engiy Ruth 4:1–22
1
Elimelek nge girdi’en e tabinaw rok nranod nga Moab
Pi rran nem ni pi’in tapuf oloboch e be gagiyegnag yu Israel e yib ba uyongol ko re nam nem. Mu Bethlehem, ni bay u lan e nam nu Judah, e yan be’ nib mo’on riy ko nam nu Moab ni nge par u rom ni bay n’umngin nap’an; me un le’engin nge l’agruw i pumo’on ni fak ngak ngranod. Elimelek fithingan e re mo’on nem; me Naomi fithingan le’engin, me Mahlon nge Kilion fithingan fa gali pumo’on ni fakrow. Yad girdi’en fare ke girdi’ ko Efrath u Bethlehem in bay u lan yu Judah. Ranod nga Moab miyad par u rom. Me yim’ Elimelek me par Naomi ni go ir nge fa gali pumo’on ni fak, mi yow le’engiy l’agruw i ppin u Moab; bagayow e gali ppin nem e Orpa, ma bagayow e Ruth. Tomuren ragag e duw nap’an ni kar pired u rom, miki yim’ Mahlon nge Kilion, me yan i par Naomi ni go ir nike yim’ fa gali pumo’on ni fak nge figirngin.
Naomi nge Ruth nra sulow nga Bethlehem
Me munmun me rung’ag Naomi nike ayuweg SOMOL e girdi’ rok ya ke dammalnag e woldug rorad; me fal’eg rogon ni nge chuw u Moab ni yad fa gali ppin ni le’engin fak. Ma aram miyad chuw u rom ni ngar sulod nga Judah. Machane nap’an ni kayad be yan, me ga’ar ngorow, “Mu sulow nga tafenmew ngam pirew rok e gali cha’ ni chitiningmew. Mang e yigi ayuwegmew SOMOL ni bod rogon ni um ayuwegew gag nge pi’in karm’ad. I SOMOL e nge ayuwegmew nge bigimew miki yag ni un nga reb e mabgol nge yag reb e tabinaw ngak.”
Ma aram me faray Naomi owcherow ni aram e ke fingichiyrow. Miyow pag lamrow ngalang ngar yorgow. 10 me lungurow ngak, “Danga’! Bay gu unew ngom ngdarod ngak e tirom e girdi’.” 11 Me fulweg Naomi ni ga’ar, “Gal fakag, thingar mu sulow. Mang ni gimew ba’adag ni ngam’unew ngog? Gimew be finey ni ku rayag ni nggu diyennag l’agruw e pagel bayay ngam figirngiyew? 12 Mu sulow nga tabnaw romew; ya kug pilibthir ndabkiyag ni gu un nga reb e mabgol. Ma gomang e fa’an mang e ku rayag, mu gu mabgol e nep’ ney nggu fakay e pagel, 13 ma gur gimew ra sonnag row ngar ilal gow? Ra aram rogon mi gimew ra par ndab mu figirngiyew be’? Gal fakag, dangay, gimew manang ni ban’en ni dabyag. I SOMOL e ke togopluw ngog, ma ke kireban’ug ngomew.” 14 Mi yow pag lamrow ngalang bayay ngar yorgow; ma aram me faray Orpa owchen e chitiningin figirngin ni aram e ke fingichiy, me sul ngak e girdi’ rok, machane Ruth e gamuchmuch ngak Naomi.
15 Me ga’ar Naomi ngak Ruth, “Mu sap! Fare pin ni le’engin walagen e pumo’on rom e ke yan ni aram e nge sul ngak e girdi’ rok nge got rok; mu’un ngak ngam sulow nga tabinaw romew.” 16 Machane me fulweg Ruth ni ga’ar, “Dab mu wenig ngog ni nggu pagem; ma dab mu guy rogon ni nge dab ku gu un ngom! Ya demturug e gin’en ni ga ra yan ngay, ma gu ra un ngom; ma demturug e gin’en ni ga ra par riy, ma gu ra un riy ko par. Girdi’ rom e bayi mang girdi’eg; ma Got rom e bayi mang Got rog. 17 Ma gin ni bay mum’ riy, e bay gum’ riy, me ir e bay ni k’eygeg riy. Mang e yigi pag SOMOL e bin ga’ e gechig ngog ni fa’anra gu pag yugu ban’en nge deregdow ni fa’anra gathi yam’!” 18 Ma fa’ani guy Naomi nike m’ay i leamnag rok Ruth ni nge un ngak ngranow, ma daki yog bbugithin. 19 Miyow yan ngar mada’gow nga Bethlehem. Ma fa’anra tawgow me yo’or lanyan’ e girdi’ u ga’ngin fare binaw, me ga’ar e pi’in ni ppin, “Gur fa’anem i Naomi eray?” 20 Me fulweg ni ga’ar, “Dab mu pininged ngachaleg ni Naomi, mu pininged Marah ngog,”* NAOMI . . . MARAH: Naomi e fan ni Hebrew e “felan” me Marah e fan ni Hebrew e “mo’oy.” ni bochan e Got ni Gubin ma Rayag Rok e ke tay e yafos rog nike mo’oy. 21 Fa’an gu chuw u roy ma bo’or ban’en rog, machane ke fulwegeg SOMOL ngaray ni dariy ban’en rog. Ere mang ni ngam pininged Naomi ngog ni SOMOL ni Gubin ma Rayag Rok e ke gechig nageg ke pi’ e gafgow ngog?”
22 Irera’ rogon ni sul Naomi u Moab ni yow Ruth, ni be’ u Moab ni leay be’ ni fak. Ra tawgow nga Bethlehem ko ngiyal’ ni kan pignag e dum’ barley.

*1:20 NAOMI . . . MARAH: Naomi e fan ni Hebrew e “felan” me Marah e fan ni Hebrew e “mo’oy.”