Aeuin nöün Paulus Toropwe ngeni ekewe Souläng lon
Korint
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ekewe souläng lon Korint.
III. Itelapemongen ei toropwe: Ekewe osukosuken lon ewe mwichefel.
IV. Kapas aüchean ei toropwe: Ekewe föför mi mwäl repwe limelimewu seni lon ewe mwichefel.
V. Masouen ei toropwe: Paulus a mak ewe aeuin toropwe ngeni ekewe souläng lon Korint pwe epwe afata ngeniir usun ekewe osukosuk lon manauen ekewe souläng me ar lükülük mi fisitä lon ewe mwichefel Paulus a popuetä lon Korint. Lon ena fansoun ei telinimw Korint eu telinimw mi fokun watte lon Krik, ewe samolun telinimw lon ewe fanü Akaia mi nom fän nemenien ewe mwün Rom. Ei telinimw a iteföüla ren angangen amömö, ren örünien fanüer, ren föför mi fokun ngau, pwal ren chomong sokopaten lamalam.
Ewe soukünö Paulus a fokun chüngü ekewe osukosuk usun ar kinikinfesen me föför mi fokun ngau, ekewe kapas ais usun lefilen mwän me fefin me pwüngün pwüpwülü, pwal ekewe sokun memef seni letip, usun kotöchün lon mwichefel, ekewe lifang seni Ngünmifel me ewe manausefäl seni sotup. Seni alololun an mirit a aiti ngeniir met ewe Pworausen Manau a apasa usun ar kei kapas ais.
Lon sopun 13 a pwärätä pwe chen än Kot lifang mi fokun aüchea ngeni nöün aramas. Ekei wokisin lon ei sopun aramas ra fokun sileöchü seni ekewe wokisin meinisin lon ei toropwe.
VI. Tettelin masouen ei toropwe:
Kapas akom 1.1-9
Kinikin lon ewe mwichefel 1.10–4.21
Pwüngün lefilen mwän me fefin me famili 5.1–7.40
Souläng me chon lükün 8.1–11.1
Nonomun mwichefel me ar fel ngeni Kot 11.2–14.40
Än Kraist manausefäl me än ekewe chon lükü i manausefäl 15.1-58
Ewe asor fänäsengesin ekewe souläng lon Juta 16.1-4
Kapasen lesopolan 16.5-24
1
Kapong
1.1-3
1 Ngang Paulus, ewe mi kö me ren letipen Kot an epwe nöün Kraist Jesus soukünö, pwal pwiich ei Sostenes, 2 aia kapong ngeni än Kot we mwichefel mi nom lon Korint, ngeni chokewe mi küna pin lon Kraist Jesus, ir mi kö pwe repwe pin fitifengen me chokewe ekis meinisin mi köri iten ach Samol Jesus Kraist, i ouach Samol: ✡Föf 18.1 3 Iwe, Samach Kot me ach Samol Jesus Kraist epwe ngenikemi ümöümöch me kinamwe.
Ekewe feiöch lon Kraist
1.4-9
4 Üa kilisou ngeni Kot fänäsengesimi fansoun meinisin pokiten ewe ümöümöch i a ngenikemi ren Kraist Jesus. 5 Pun lon Kraist oua wöü lon mettoch meinisin, pwal lon ämi kapas me ämi silelap meinisin. 6 Ach kapasen pwärätä usun Kraist a fokun nüküchar lomi, 7 iei mine ousap osupwang ren och ekewe feiöchün Ngün lupwen oua witiwiti ach Samol Jesus Kraist an epwe pwä. 8 I epwe pwal anükücharakemi tori lesopolan, pwe esap wor eman epwe tip ngenikemi och mi mwäl lon ewe Ränin ach Samol Jesus Kraist. 9 Kot a allükülük, i ewe a körikemi pwe oupwe chiechi ngeni Nöün we Jesus Kraist ach Samol.
Kinikinfesen lon mwichefel
1.10-17
10 Üa tüngormau ngenikemi, ämi pwii kana, fän iten ach Samol Jesus Kraist, pwe oupwe tipeeufengen lefilemi, pwe esap wor kinikinfesen leimi. Oupwe fokun tip-eu me ekiek eu. 11 Ämi pwii kana, ekoch aramas seni än Kloe famili ra asile ngeniei pwe mi wor aninifengen lefilemi. 12 Iei met üa kapas usun: Eman a apasa, “Ngang nöün Paulus souläng,” eman a pwal apasa, “Ngang nöün Apolos souläng,” pwal eman a apasa, “Ngang nöün Petrus souläng,” nge pwal eman a apasa, “Ngang nöün Kraist souläng.” ✡Föf 18.24 13 Ifa usun, Kraist a kinikinfesen? Ifa usun, Paulus a mäla won iräpenges fän itemi? Ifa usun, oua papatais ngeni iten Paulus?
14 Ngang üa kilisou ngeni Kot pwe üsap papataisi eman leimi, chilon chök Krispus me Kaius, ✡Föf 18.8; 19.29; Rom 16.23 15 iei mine esap wor eman a tongeni apasa pwe üa papataisi eman ngeni itei. 16 (Ewer, üa pwal papataisi Stefanas me chon leimwan, nge üsap tongeni chechemeni ika üa papataisi eman me lükün.) ✡1.Kor 16.15 17 Kraist esap akünöüei pwe üpwe papataisi aramas, nge a akünöüei pwe üpwe arongafeili ewe Pworausen Manau, nge sap lon kapasen tipachemen aramas, pwe än Kraist mäla won iräpenges esap lomotongau.
Kraist ewe manaman me tipachemen Kot
1.18-31
18 Pun ewe kapas usun än Kraist mäla won iräpenges och kapas mi umwes ngeni chokewe mi pöütmwälila, nge ngenikich mi küna manau och manamanen Kot. 19 Pun a mak lon ekewe Toropwe mi Pin,
“Ngang üpwe atala tipachemen ekewe soutipachem
o awesi ekiekin ekewe souekiek.” ✡Ais 29.14 20 Iwe, ifa i ewe soutipachem? Ifa i ewe souekiek? Ifa i ewe mi silelap le anini lon kapasen ei fanüfan? Ifa usun, Kot esap pwärätä pwe tipachemen ei fanüfan mi chök umwes? ✡Hiop 12.17; Ais 19.12; 33.18; 44.25
21 Pun lon än Kot tipachem, a föri pwe aramas resap tongeni silei i ren püsin ar tipachem. Nge Kot a akota pwe epwe amanaua chokewe mi lükü ewe kapas aia afalafala, iei ewe kapas ekoch aramas ra aita ngeni pwe och kapasen umwes. 22 Ekewe chon Juta ra mochen küna asisil mi alletätä pwe ewe kapas a pop seni Kot, nge ekewe chon Krik ra kütta tipachem. 23 Nge kich sia arongafeili ewe Kraist mi iräpenges, iei ewe kapas chon Juta ra chepetek ren, nge ekewe chon lükün Israel ra apasa pwe och kapas mi umwes. 24 Nge ren chokewe Kot a köriir me lein chon Juta me chon lükün Israel, Kraist ewe manamanen Kot me ewe tipachemen Kot. 25 Pun inamwo ika aramas ra apasa pwe Kot a umwes, nge än Kot umwes a tipachem seni än aramas tipachem. Inamwo ika aramas ra apasa pwe Kot a apwangapwang, nge an apwangapwang a pöchökül seni än aramas pöchökül.
26 Ämi pwii kana, oupwe chechemeni usun nonomumi me lom lupwen Kot a körikemi. Lon ekiekin aramas sap chomong me leimi ra tipachem, sap chomong leimi a wor maner, sap chomong ra uputekia. 27 Nge Kot a filätä ekewe mi umwes me ren fanüfan, pwe epwe asäwa ekewe chon tipachem. Kot a pwal filätä ekewe mi apwangapwang me ren fanüfan, pwe epwe asäwa ekewe chon pöchökül. 28 A filätä ekewe mi uputekison me ren fanüfan, pwal ekewe mi küna koput me ekewe esap wor aüchear, pwe epwe awesi ekewe mi wor aüchear me ren fanüfan. 29 Iei popun esap wor eman aramas epwe tongeni aingaing mwen mesen Kot. 30 Nge Kot chök popun ämi nonom lon Kraist Jesus. Kot a föri pwe Kraist ach tipachem, ach pwüng, ach pin me ach ngas seni ach tipis. 31 Pun iei usun a mak lon ekewe Toropwe mi Pin, “Iö a mochen aingaing epwe aingaing won ach Samol.” ✡Jer 9.24