1 Lupwen ewe kiwinnen Sepa a rongorong usun än Salomon iteföüla, a feila Jerusalem, pwe epwe sotuni Salomon ren kapas ais mi weires. A feito fän eu mwichemongun chon angang me kamel mi uwou nofitin mongö mi pwokus, kolt mi chomong me fau aüchea. Nge lupwen a churi Salomon, a ais ngeni meinisin mine a ekieki lon lelukan. 2 Iwe, Salomon a pälüeni an kewe kapas ais meinisin. Esap wor och mi weires ngeni ewe king Salomon an epwe tongeni pälüeni. 3 Nge lupwen ewe kiwinnen Sepa a küna än Salomon tipachem, ewe imw a aüetä fän itan, 4 ewe mongö mi nom won an chepel, usun än nöün kewe nöüwis mot ünükün, angangöchün nöün kewe chon angang me lingen üfer, nöün chon amolätä ünüman me üfer, pwal ekewe asoren kek a eäni me lon imwen ewe Samol mi Lapalap, neminewe a fokun mwar ren.

5 Mürin, ewe kiwin a üreni ewe king Salomon, “A let ewe pworaus üa rong me lon püsin fanüei usun om föför me om tipachem. 6 Nge ngang üsap mochen lükü ewe pworaus tori iei üa feito o küna ren püsin mesei. Nge nengeni, ra chök apworausa ngeniei esopun om tipachem mi lapalap. A kon senukula om tipachem seni ewe pworaus üa rong usum. 7 Feiöchün pwülüom kewe. Feiöchün noum kei chon angang mi nom reöm iteiten fansoun o rongorong ngeni om tipachem. 8 Üpwe mwareiti ewe Samol mi Lapalap om we Kot mi pwapwaituk o atolongok lon ewe wisen king, pwe kopwe nemenem fän itan. Pokiten om we Kot a echeni chon Israel o anüküchara mwür tori feilfeilachök, iei mine a seikuketä pwe kopwe nöür king o eäni kapwüng me pwüng ngeniir.” 9 Mürin, neminewe a ngeni ewe king ina epwe ükükün limu ton kolt, chomong nofitin mongö me fau aüchea. Esap chüen wor ena sokun nofitin mongö usun ekei, ewe kiwinnen Sepa a ngeni ewe king Salomon. ✡Mat 12.42; Luk 11.31

10 Iwe, nöün Hairam chon angang me nöün Salomon chon angang mi uwato kolt seni Ofair ra pwal uwato chomong irä itan alkum me fau aüchea. 11 Seni ekei irä alkum ewe king a föri natö ngeni imwen ewe Samol mi Lapalap, pwal ngeni imwan, a pwal föri ükülele me kitar seni fän iten ekewe souköl. Ei sokun irä esap tori ewe fanü Juta me mwan.

12 Iwe, ewe king Salomon a ngeni ewe kiwinnen Sepa meinisin mine a mochen ika tüngor. A ngeni neminei chomong lifang lap seni mine a uwato ren. Mürin, ewe kiwin me nöün kewe chon angang ra liwiniti poputän fanüer.

13 Iwe, choun ewe kolt mi tori Salomon iteiten ier ina epwe ükükün rüe me limu ton, 14 lükün mine a tolong seni takisesin ekewe chon kamö me chon amömö. Iwe, ekewe kingen Arapia meinisin me kepinan ewe fanü Israel ra pwal uwato kolt me silifer ren Salomon. 15 Iwe, ewe king Salomon a föri rüepükü tittin maun mi watte o cheni ngeni kolt mi nechenech. Nge kolten eu me eu kei tittin maun ina epwe ükükün engol me limu paun. 16 A pwal föri ülüpükü tittin maun mi kükün o cheni ngeni kolt mi nechenech. Nge kolten eu me eu kei tittin maun ina epwe ükükün walu paun. Iwe, ewe king a iseni ekei tittin maun lon ewe imwen wöllapen Lepanon. 17 Mürin, ewe king a pwal föri eu lenien motun king mi watte, a alinga ngeni ngiin äläfan o apachatä kolt mi mürina won. 18 Iwe, a wor wonu foson latön ewe lenien mot, pwal eu lenien puun pechen seni kolt mi pach ngeni ewe lenien mot. Mi pwal wor lenien pau won lepekin me ruu, nge uluulun eman laion a nom lükün eu me eu kewe lenien pau. 19 Nge mi pwal wor uluulun engol me ruoman laion won ewe latö, eman uluulun laion a nom lesopun me ruu ekewe wonu foso. Ei sokun lenien motun king esap fokun wor esin lon ekewe mwü. 20 Iwe, än ewe king Salomon kapen ün meinisin ra för seni kolt, pwal ekewe sepi meinisin mi nom lon ewe imwen wöllapen Lepanon ra för seni kolt mi mürina. Pun silifer esap kon aüchea lon fansoun manauen Salomon. 21 A pwal wor än ewe king pöisein sip mi kamö me amömö pisek, nge nöün Hairam kewe chon angang ra nom won. Iwe, fän eu lon iteiten ülüngat ier ei pöisein sip a liwinto o uwato kolt, silifer, ngiin äläfan me sokopaten mongki.

22 Iei usun ewe king Salomon a pisekisek me tipachem lap seni ekewe king meinisin won fanüfan. 23 Iwe, ekewe king meinisin ra feito ren Salomon pwe repwe rongorong an tipachem Kot a fang ngeni. 24 Nge iteiten eman me eman mi feito a uwato an lifang: pisek seni silifer me kolt, üf, pisekin maun, nofitin mongö me oris me aas kana. Ei a chök fifis ier me ier. 25 Iwe, a wor ükükün rüanüngeröü än Salomon leni fän iten ekewe oris me wan woken, a pwal wor engol me ruungeröü nöün oris. A anomu ekoch lon ekewe telinimwen woken, nge ekoch a anomu ren lon Jerusalem. ✡1.Kron 4.26 26 Salomon a nemeni ekewe king meinisin, seni ewe chanpupu Oifrat tori ewe fanüen chon Filistia, pwal tori kiännin Isip. ✡Ken 15.18; 1.King 4.21 27 Iwe, lon fansoun mwün ewe king Salomon silifer a chomong lon Jerusalem usun chök chomongun fau, a pwal wor chomong irä setar usun chök chomongun ewe irä sikamor mi mär fäsonun ekewe chuk. 28 Iwe, Salomon a möni nöün kewe oris seni Isip pwal seni ekewe fanü meinisin. ✡Tut 17.16

29 Iwe, lusun pworausen än Salomon föför meinisin seni lepoputan tori lesopolan an nemenem a makelong lon än ewe soufos Natan puken uruwo, lon än Ahia ewe re Silo puken osuni, pwal lon puken künan ewe soufos Ito usun Jeropoam nöün Nepat we mwän. 30 Salomon a nom lon Jerusalem o nemeni unusen Israel lon ükükün faik ier. 31 Iwe, Salomon a mäla, nge ra peiaseni lon ewe telinimwen Tafit saman we. Nge Rehopoam nöün we mwän a siwili lon wisan wisen king.