1 Mürin, ewe Samol mi Lapalap a üreni Moses, “Iei kopwe le küna mine üpwe föri ngeni Farao. Pun ren pei mi manaman üpwe pöchökül ngeni Farao pwe epwe tinirewu, ewer, epwe asürela seni fanüan.”

2 Iwe, Kot a üreni Moses, “Ngang ewe Samol mi Lapalap. 3 Üa pwä ngeni Apraham, Isaak me Jakop ren itei we Kot mi Unusen Manaman, nge üsap asile ngeniir itei ei Samol mi Lapalap. ✡Ken 17.1; 28.3; 35.11; Eks 3.13-15 4 Üa pwal föri ai pwon ngeniir pwe üpwe ngeniir ewe fanü Kanaan, ewe fanü ra fen asösö lon usun chon siamü. 5 Nge iei üa rong än ekewe aramasen Israel ngüngü ren ar riaföü, pun chon Isip ra amwöchüretiu o nöüniir amanau. Iwe, üa chechemeni ai pwon ngeniir. 6 Iei mine kopwe üreni ekewe aramasen Israel, ‘Ngang ewe Samol mi Lapalap. Üpwe emwenikemiiwu seni fän ämi angangochou ngeni chon Isip, üpwe pwal angasakemi seni ar nöünikemi amanau o amanauakemi fän pei mi manaman pwal ren apwüng mi lapalap. 7 Iwe, üpwe nöünikemi pwe oupwe aramasei, nge ngang üpwe ämi Kot. Oupwe silei pwe ngang ewe Samol mi Lapalap ämi we Kot mi emwenikemiiwu seni fän ämi angangochou lon Isip. 8 Üpwe pwal emwenikemiilong lon ewe fanü, üa pwon ngeni Apraham, Isaak me Jakop pwe üpwe ngenikemi pwe fanüemi. Ngang ewe Samol mi Lapalap.’ ” 9 Iwe, Moses a üreni ekewe aramasen Israel ekei kapas, nge ir resap aüselinga, pun a tatakis letiper ren än chon Isip nöüniir amanau.

10 Mürin, ewe Samol mi Lapalap a kapas ngeni Moses, 11 “Kopwe feila o üreni Farao ewe kingen Isip pwe epwe mwüt ngeni ekewe aramasen Israel pwe repwe towu seni fanüan.” 12 Nge Moses a üreni ewe Samol mi Lapalap, “Nengeni, ekewe aramasen Israel resap aüselingaei. Ifa usun, Farao epwe mochen aüselingaei, nge ngang fen eman mi angangau le kapas?” 13 Nge ewe Samol mi Lapalap a kapas ngeni Moses me Aaron, a akünöörela ren ekewe aramasen Israel pwal ren Farao ewe kingen Isip, pwe repwe emwenawu ekewe aramasen Israel seni ewe fanü Isip.

14 Ikkei ir mwänirelan ar kewe cho. Nöün Rupen kewe mwän ewe mwänichien nöün Israel: Hanok, Pallu, Hesron me Karmi. Ätekei ir än ar kewe cho lewo mi iteni iter. 15 Nge nöün Simeon kewe mwän: Jemuel, Jamin, Ohat, Jakin, Sohar me Shaul nöün eman fin Kanaan. Ätekei ir än ar kewe cho lewo mi iteni iter. 16 Ikkei iten nöün Lefi kewe mwän lon tettelin mwirimwirir: Kerson, Kohat me Merari. Ätekei ir än ar kewe cho lewo mi iteni iter. Iwe, ierin manauen Lefi ükükün ipükü ilik me fisu. 17 Iwe, nöün Kerson kewe mwän: Lipni me Shimei, a pwal wor chomong mwirimwirir. 18 Nge nöün Kohat kewe mwän: Amram, Ishar, Hepron me Ussiel. Iwe, ierin manauen Kohat ükükün ipükü ilik me ülüngat. 19 Iwe, nöün Merari kewe mwän: Mali me Mushi. Ir meinisin än Lefi kewe cho lon tettelin mwirimwirir. ✡Num 3.17-20; 26.57-58; 1.Kron 6.16-19 20 Amram a pwülüeni Jokopet fefinen saman we. Iwe, Jokopet a nöüni me won Amram: Aaron me Moses. Nge ierin manauen Amram ükükün ipükü ilik me fisu. 21 Iwe, nöün Ishar kewe mwän: Kora, Nefek me Sikri. 22 Nge nöün Ussiel kewe mwän: Misael, Elsafan me Sitri. 23 Iwe, Aaron a pwülüeni Elisepa nöün Aminatap fefin, fefinen Nashon. Neminewe a nöüni me won Aaron: Natap, Apihu, Eleasar me Itamar. 24 Iwe, nöün Kora kewe mwän: Assir, Elkana me Apiasaf. Ir än Kora kewe cho lewo. 25 Iwe, Eleasar nöün Aaron mwän a pwülüeni eman lein nöün Putiel fefin. Neminewe a nöüni me won Pinehas. Ikkeiir mwänirelan än Lefi cho lon en me an famili.

26 Ikkeiir Aaron me Moses, ätekewe ewe Samol mi Lapalap a kapas ngeniir, “Oupwe emwenawu ekewe aramasen Israel seni lon ewe fanü Isip lon tettelin en me an cho.” 27 Moses me Aaron ir ätekewe mi fos ngeni Farao ewe kingen Isip usun ar repwe emwenawu ekewe aramasen Israel seni Isip.

28 Lon ewe rän, lupwen ewe Samol mi Lapalap a kapas ngeni Moses me lon ewe fanü Isip, 29 a üreni, “Ngang ewe Samol mi Lapalap. Kopwe asile ngeni Farao ewe kingen Isip meinisin mine üa ürenuk.” 30 Nge Moses a üreni ewe Samol mi Lapalap, “Ngang eman mi angangau le kapas. Ifa usun, Farao epwe mochen aüselingaei?”