1 Mürin, ewe Samol mi Lapalap a üreni Moses, “Kopwe feila ren Farao o kapas ngeni, ‘Iei alon ewe Samol mi Lapalap, “Kopwe mwüt ngeni nei aramas pwe repwe feila o fel ngeniei. 2 Nge ika kosap mwüt ngeniir pwe repwe feila, üpwe ariaföüü unusen fanüom ren kairü. 3 Iwe, ewe chanpupu Nil epwe uren kairü. Repwe tolong lon imwom, lon om rumwen annut pwal won om peet. Iwe, repwe tolong lon imwen noum kewe nöüwis pwal lon imwen noum kewe aramas, repwe tolong lon om lenien um me sepien öüwöü pilawa. 4 Ekewe kairü repwe mwetemwetfetal womw, won noum kewe aramas me noum kewe nöüwis.” ’ ” 5 Iwe, ewe Samol mi Lapalap a üreni Moses, “Kopwe kapas ngeni Aaron pwe epwe aitiela pöün fiti wokun won ekewe chanpupu me ekewe warawar, pwal won ekewe nasen koluk, pwe kairü repwe tötä won ewe fanü Isip.” 6 Iei mine Aaron a aitela pöün won kolukun Isip. Iwe, ekewe kairü ra tötä o pwölüela ewe fanü Isip. 7 Nge ekewe sourongen Isip ra pwal föri ei sokun manaman ren ronger, pwe ra pwal atötäi kairü won ewe fanü Isip.

8 Mürin, Farao a körato Moses me Aaron o üreniir, “Oupwe tüngorei ewe Samol mi Lapalap, pwe epwe angei ekewe kairü seniei pwal seni nei aramas. Nge ngang üpwe mwüt ngeni ekewe aramasen Israel pwe repwe feila o asor ngeni ewe Samol mi Lapalap.” 9 Iwe, Moses a üreni Farao, “Kose mochen, en chök kopwe püsin filätä inet üpwe tüngor fän itom pwal fän iten noum kewe nöüwis me noum kewe aramas, pwe ekewe kairü repwe sü senuk pwal seni imwom, nge repwe chök nonom lon ewe chanpupu Nil.” 10 Iwe, Farao a üreni, “Lesor.” Nge Moses a üra, “Epwe fis usun om apasa, pwe kopwe silei pwe esap wor eman kot mi wewe ngeni äm we Kot ewe Samol mi Lapalap. 11 Ekewe kairü repwe sü senuk pwal seni imwom, repwe sü seni noum kewe nöüwis me noum kewe aramas, nge repwe chök nonom lon ewe chanpupu Nil.” 12 Iwe, Moses me Aaron ra feila seni Farao. Mürin, Moses a tüngormamau ngeni ewe Samol mi Lapalap usun ekewe kairü i a awarato won Farao. 13 Iwe, ewe Samol mi Lapalap a föri usun mine Moses a tüngorei. Ekewe kairü ra mäla seni lon ekewe imw tori lükün, pwal tori lemal. 14 Ra ionifengeniir o achukuchukuretä, nge ewe fanü a pwongau rer. 15 Iwe, lupwen Farao a küna pwe a ekis ngasala, a pwal tipeföreala pwe esap mochen aüselinga Moses me Aaron, usun mine ewe Samol mi Lapalap a fen apasa.

16 Mürin, ewe Samol mi Lapalap a üreni Moses, “Kopwe kapas ngeni Aaron pwe epwe aitiela wokun o wichi pwülün ewe fanü, pwe pwülümoromorun won unusen ewe fanü Isip epwe wiliti nikken.” 17 Iwe, ra föri iei usun. Aaron a aitiela pöün fiti wokun o wichi pwülün ewe fanü, pwe pwülümoromorun unusen ewe fanü Isip a wiliti nikken, nge ra küw aramas me man. 18 Iwe, ekewe sourong ra pwal sotuni ronger pwe repwe afisätä nikken, nge resap tongeni. Ekewe nikken ra küw aramas me man. 19 Mürin, ekewe sourong ra üreni Farao, “Ei pöün Kot a föri.” Nge Farao a fen tipeföreala pwe esap mochen aüselinga Moses me Aaron, usun mine ewe Samol mi Lapalap a fen apasa. ✡Luk 11.20

20 Mürin, ewe Samol mi Lapalap a üreni Moses, “Kopwe pwätä lesosorusich o feila souni Farao, lupwen epwe feila ren ewe koluk. Iwe, kopwe üreni, ‘Iei alon ewe Samol mi Lapalap: Kopwe mwüt ngeni nei aramas repwe feila pwe repwe fel ngeniei. 21 Nge ika kosap mochen mwüt ngeniir, üpwe tinato pwiin loong womw, won noum kewe nöüwis me noum kewe aramas, pwal lon imwom. Iwe, lon imwen chon Isip meinisin epwe uren pwiin loong, pwal ewe pwül ra nom won. 22 Nge lon ena ränin üpwe tiela ewe fanü Kosen, ewe ia nei aramas ra nonom ie, pwe esap wor pwiin loong rer. Ren ei kopwe silei pwe ngang ewe Samol mi Lapalap üa nonom lon ei fanü. 23 Iwe, üpwe aimwü lefilen nei aramas me noum aramas. Ei manaman epwe fis lesor.’ ” 24 Iwe, ewe Samol mi Lapalap a apwönüetä mine a apasa. Chomong pwiin loong ra ässilong lon imwen Farao pwal lon imwen nöün kewe nöüwis tori lon unusen ewe fanü Isip, pwe ewe fanü a ngauala ren ekewe loong.

25 Mürin, Farao a kökkörato Moses me Aaron o üreniir, “Oupwe feila o asor ngeni ämi we Kot, nge lon chök ei fanü.” 26 Nge Moses a üra, “Esap öch ika epwe ina usun. Pun ekewe mönün asor aia eäni asor ngeni ewe Samol mi Lapalap äm we Kot ra anioput ngeni chon Isip. Nge ika aia eäni asor ekewe mönün asor mi anioput me fän meser, ifa usun, resap monei ngenikem fau? 27 Äm aipwe fokun sai lon ükükün ülüngat rän lon fanüapö pwe aipwe asor ngeni ewe Samol mi Lapalap äm we Kot, usun a allük ngenikem.” 28 Nge Farao a üreniir, “Üpwe mwüt ngenikemi pwe oupwe feila o asor ngeni ewe Samol mi Lapalap ämi we Kot lon fanüapö, nge ousap chök feila toau. Oupwe pwal iotekin tüngor fän itei.” 29 Iwe, Moses a üra, “Nengeni, lupwen üpwe feila senuk, üpwe iotek ngeni ewe Samol mi Lapalap pwe lesor ekewe pwiin loong repwe sü senuk, seni noum kewe nöüwis me noum kewe aramas. Nge en Farao kosap chüen atupukem ren om kosap mwüt ngeni ekewe aramas pwe repwe feila o asor ngeni ewe Samol mi Lapalap.” 30 Mürin, Moses a towu seni fän mesen Farao o iotek ngeni ewe Samol mi Lapalap. 31 Iwe, ewe Samol mi Lapalap a föri usun mine Moses a tüngor. A asüela ekewe pwiin loong seni Farao, seni nöün kewe nöüwis me nöün kewe aramas. Esap nonom mwo eman. 32 Nge Farao a chök tipeförea pwal lon ei fansoun, pwe esap mwüt ngeni ekewe aramas pwe repwe feila.