1 “Iwe, kopwe föri ewe imwenfel ren engol pekin mangaku mi mürina o pwechepwech, mangaku mi arauarau me parochol me parapar. Eman mi silelap le chü epwe chüri liosun kerop wor. 2 Iwe, ekewe pekin mangaku meinisin repwe nönöfengen, langatamer ükükün engol me rüanü iach, nge chölaper ruu iach. 3 Limu pekin mangaku repwe tetefengen, nge limu pekin repwe pwal tetefengen pwe epwe wor ruachö cheech. 4 Kopwe tei pwäken mi arauarau ünükün ewe echön cheech me epek, kopwe pwal föri ina usun won ewe aruachön. 5 Iwe, kopwe teätä lime pwäken ünükün ewe echön cheech me epek, kopwe pwal teätä lime pwäken ünükün ewe aruachön cheech me epek. Iwe, ekewe pwäken repwe chök wenefengen. 6 Mürin kopwe föri lime ökkük seni kolt o ökküküfengeni ekewe cheech. Iei usun ewe imwenfel seni mangaku epwe unus.

7 Iwe, kopwe föri engol me echö pekin mangaku seni ülöülen kuuch, pwe pwölüpwölün ewe imwenfel. 8 Iwe, ekewe engol me echö pekin mangaku repwe chök nönöfengen, ükükün langatamen echö pekin engol me limu iach, nge ükükün chölapan ruu iach. 9 Kopwe teifengeni limachö pekin mangaku pwe repwe chök eu cheech, pwal wonachö pwe epwe wor aruachön cheech. Nge ewe awonachön pekin kopwe numätä won ewe alimachön me fän mesen ewe imwenfel. 10 Mürin kopwe teätä lime pwäken ngeni ünükün ewe echön cheech me epek, kopwe pwal teätä lime pwäken ngeni ünükün ewe aruachön cheech me epek.

11 Kopwe föri lime ökkük seni piras o ökküküfengeni ekewe pwäken. Iei usun om kopwe achufengeni ekewe pwölüpwöl pwe repwe echö chök. 12 Iwe pokiten ewe pwölüpwöl a langatam seni ewe imwenfel, esop seni epekin mangaku epwe sapwilitiu me lesopun. 13 Ewe pwölüpwöl a chömong seni ewe imwenfel, iei mine esop iach epwe sapwilitiu me lepekin me ruu o pwölüela. 14 Kopwe pwal föri echö pwölüpwöl mi kapar seni silin ätemwänin sip pwal echö pwölüpwöl seni silin man mi mürina.

15 Iwe, kopwe föri papen ewe imwenfel seni mangaku seni ewe irä akasia, nge ekewe pap repwe üwenewenetä. 16 Langatamen echö me echö ekewe pap ükükün engol me limu fiit, nge chölapan rüe me fisu inis. 17 Nge fän iteiten echö pap epwe wor ruu oupun pwe repwe tongeni afoufengen. Iei usun kopwe föri ngeni papen ewe imwenfel meinisin. 18 Iwe, kopwe föri rüe pap fän iten peliörün ewe imwenfel seni mangaku. 19 Kopwe pwal föri faik along seni silifer o anomuur fän ekewe rüe pap, ruu along fän iteiten echö pap, pwe oupun repwe sökulong lon pwangen ekewe along. 20 Nge fän iten peliefengin ewe imwenfel seni mangaku kopwe pwal föri rüe pap 21 me faik alongur seni silifer, ruu along fän iteiten echö pap. 22 Iwe, fän iten lükisökürün ewe imwenfel seni mangaku me pelilotoun kopwe föri wonachö pap. 23 Kopwe pwal föri ruachö pap fän iten lepwokukun ewe imwenfel seni mangaku me lükisökürün. 24 Ekewe ruachö pap repwe pachefengen seni fan tori asan o ökkükfengen ren efoch ring. Iei usun om kopwe föri ngeni ekewe ruachö pap fän iten ekewe ruu pwokuku. 25 Ina usun epwe wor waluchö pap pwal engol me wonu alongur seni silifer, ruu along fän iteiten echö pap.

26 Iwe, kopwe föri ömwöch seni ewe irä akasia, limefoch fän iten papen lepekin ewe imwenfel seni mangaku me epek, 27 limefoch fän iten papen me pwal epek, nge limefoch fän iten pappen lükisökürün me pelilotoun. 28 Ewe ömwöch mi nom lukalapen ekewe pap epwe seni fän mesen ewe imwenfel seni mangaku tori lükisökürün. 29 Iwe, kopwe apacha ngeni kolt ekewe pap, kopwe pwal föri ringen wor seni kolt, pwe ekewe ömwöch repwe sökülong lor. Kopwe pwal apachätä kolt won ekewe ömwöch. 30 Lupwen kopwe aüetä ewe imwenfel seni mangaku, kopwe chök aüetä lon aükükün mine ka küna me won ewe chuk.

31 Iwe, kopwe föri echö cheech seni mangaku mi arauarau me parachol me parapar, pwal mangaku mi pwechepwech o mürina. Eman mi silelap le chü epwe chüri liosun kerop won. 32 Iwe, kopwe ökkükätä ewe cheech won fofoch ür seni ewe irä akasia mi pwölüpwöl ngeni kolt. Won ekewe ür epwe wor ökkük seni kolt, epwe pwal wor rüanü alongur seni silifer. 33 Kopwe aitiuätä ewe cheech won ekewe ökkük o anomu ewe pworofel pekilongan. Ewe cheech epwe refifeseni ewe rumw mi pin seni ewe rumw mi unusen pin. ✡Ipr 6.19; 9.3-5 34 Iwe, kopwe anomu ewe öppüng won ewe pworofel o iseni lon ewe rumw mi unusen pin. 35 Kopwe anomu ewe chepel pekiton ewe cheech me peliefengin lon ewe imwenfel seni mangaku. Nge ewe lenien atittin kopwe anomu peliörün awenewenen ewe chepel.

36 Iwe, kopwe föri echö cheech fän iten asamalapen ewe imwenfel seni mangaku mi arauarau me parachol me parapar, pwal seni mangaku mi pwechepwech o mürina, epwe pwal chü. 37 Iwe, kopwe föri ökkük seni kolt fän iten ei cheech me limefoch ür seni ewe irä akasia o apacha ngeniir kolt. Kopwe pwal föri limu alongur seni piras.