1 Iwe, Ngünün Kot a ekieitä o uweeila ren asamalapen imwen ewe Samol mi Lapalap mi sape ngeni ötiu. Ikenan, lükün ewe asamalap a wor rüe me liman mwän, nge lefiler üa küna ruoman samolun chon Israel Jaasania nöün Assur, pwal Pelatia nöün Penaia. 2 Iwe, Kot a üreniei, “Nöün aramas, ikkei ir ekewe mwän ra ekiekietä sokun rawangau o öüröüra ngeni chon ei telinimw mine a ngau. 3 Iwe, ra apasa, ‘A arap ewe fansoun ach sipwe aüetä imw. Ei telinimw a wewe ngeni eu kama, nge kich ewe fituk mi nom lon.’ 4 Iei mine, nöün aramas, kopwe osuni usun ar repwe feiengau, kopwe fokun osuni.”

5 Mürin, Ngünün ewe Samol mi Lapalap a feitiu woi o aiti ngeniei mine üpwe üreni ekewe aramas, “Iei alon ewe Samol mi Lapalap: Ämi chon Israel, üa silei mine oua apasa. Üa pwal silei ekiekin lelukemi. 6 Oua niela chomong aramas lon ei telinimw, pwe ekewe al ra urela ren somä. 7 Iei mine ngang Kot ewe Samol mi Lapalap üa apasa: Ekewe somä oua niela lon ei telinimw ir ewe fituk, nge ei telinimw ewe kama. Iwe, nge ämi, ngang üpwe asükemiila seni ei telinimw. 8 Oua niuokusiti ewe ketilas. Nge ngang üpwe tinato remi aramas mi maun ngenikemi fän ketilas. 9 Iwe, üpwe emwenikemiiwu seni lon ei telinimw o atolongakemi lepöün chon ekis, üpwe pwal awarato apwüng womi. 10 Oupwe mäla lon maun lon kiännin ewe fanü Israel. Mürin oupwe silei pwe ngang ewe Samol mi Lapalap. 11 Ei telinimw esap wewe ngeni eu kama fän itemi, nge ämi ousap pwal wewe ngeni ewe fituk mi nom lon. Nge üpwe apwüngükemi lon kiännin ewe fanü Israel. 12 Mürin ämi oupwe silei pwe ngang ewe Samol mi Lapalap. Pun ousap apwönüetä ai kewe allük, ousap pwal aleasochisi ai kewe pwüüng, nge oua tümwünü allükün ekewe mwü mi nom ünükümi.” 13 Iwe, lupwen üa osuni, a fis pwe Pelatia nöün Penaia we a mäla. Iwe, üa chapetiu lepwül o kökkö fän leüömong, “Ai Kot Samol mi Lapalap. Ifa usun, ka ekiekin arosala ekewe lusun mi chüen manau lon Israel?”

14 Iwe, ewe Samol mi Lapalap a kapas ngeniei, 15 “Nöün aramas, ekewe chon Jerusalem ra apasa usum me pwiüm kewe mi etuk le oola, ir chon Israel meinisin, ‘Ra nom toau seni ewe Samol mi Lapalap, iei mine a ngenikich ei fanü pwe sipwe fanüeni.’ 16 Iei mine kopwe üreni ekewe mi oola, ‘Iei alon Kot ewe Samol mi Lapalap: Ewer, üa tinirela lein ekewe mwü o atoropasafeiliir won ekewe fanü. Nge üa fen nonom rer lon ei fansoun lon ekewe fanü ia ra oola ie.’ 17 Iei mine kopwe üreniir, ‘Iei alon Kot ewe Samol mi Lapalap: Üpwe aliwinikemiito seni ekewe mwü o achufengenikemi seni ekewe fanü ia oua toropasfeil ie, üpwe pwal ngenisefälikemi ewe fanü Israel.’ 18 Iwe, lupwen repwe liwinsefälito ikei, repwe pöütala seni lon ei fanü ekewe uluulun anümwäl mi ngau o anioput. 19 Üpwe ngeniir eu leluk mi fö, üpwe pwal fangelong lor eman ngün mi fö. Üpwe angei me leutur ewe leluk mi pöchökül usun fau o ngeniir eu leluk mi pwetete. 20 Mürin repwe apwönüetä ai kewe allük o aleasochisi ai kewe pwüüng. Iwe, ir repwe nei aramas kana, nge ngang üpwe ar Kot. ✡Is 36.26-28 21 Nge chokana mi tipeni ar repwe angang ngeni ekewe uluulun anümwäl mi ngau o anioput, üpwe liwini ngeniir ükükün liwinin ar föför.” Iei alon Kot ewe Samol mi Lapalap.

22 Mürin, ekewe kerop ra awenawu pöükässir o ässitä, pwal ekewe wiil mi nom lepekir ra etiir, nge lingen ewe Koten Israel a nonom aser. 23 Iwe, lingen ewe Samol mi Lapalap a feitä seni lukalapen ewe telinimw, a feila o üla won ewe chuk a nom ötiuen ewe telinimw. ✡Is 43.2-5 24 Iwe, lon künaei we Ngünün Kot a ekieitä o uweeila lon ewe fanü Papilon ren ekewe chon oola. Mürin, künaei we a morola seniei. 25 Iwe, üa apworausa ngeni ekewe chon oola ekewe mettoch meinisin ewe Samol mi Lapalap a aiti ngeniei.