1 Iwe, üa mefi pwe ewe Samol mi Lapalap a nom rei ren an manaman, nge Ngünün a panieila lukalapen eu lemol mi ur ren chün aramas. 2 Mürin a emwenifetaleei lon ewe lemol, nge üa küna pwe ekewe chü ra fokun chomong lon, ra pwal fokun pwasapwas meinisin. 3 Iwe, a aisiniei, “Ifa usun, nöün aramas, epwe tufich pwe ekei chü repwe manausefäl?” Nge üa pälüeni, “Ai Kot Samol mi Lapalap, en chök ka silei.” 4 Mürin a pwal kapassefäl ngeniei, “Kopwe osuni usun ekei chü. Kopwe üreni ekei chü mi pwasapwas, pwe repwe rongorong alon ewe Samol mi Lapalap. 5 Iei aloi ngang Kot ewe Samol mi Lapalap ngeni ekei chü: Nengeni, üpwe wusalong lomi enienin ngasangasen manau pwe oupwe manausefäl. 6 Üpwe afisi föüicho womi o ämäri fitukemi, üpwe pwölü ngenikemi ünüch o wusalong lomi enienin ngasangasen manau pwe oupwe manau. Mürin oupwe silei pwe ngang ewe Samol mi Lapalap.”

7 Iwe, üa osuni usun mine Kot a allük ngeniei. Nge lupwen üa osuni, a fis och akürang, usun chök och chopuchop. Iwe, ekewe chü ra chufengen efoch ngeni efoch. 8 Nge lupwen üa nenengeni, a fis föüicho wor, fituk a mär wor, ra pwal pwölüpwölüla ren ünüch, nge esamwo wor enienin ngasangasen manau lor. 9 Mürin, Kot a üreniei, “Nöün aramas, kopwe osuni ngeni ewe enienin ngasangas *a pwal wor wewen ei kapas “enienin ngasangas” lon fosun Ipru: asepwäl ika ngün, kopwe osuni ngeni o üreni pwe iei aloi ngang Kot ewe Samol mi Lapalap: En enienin ngasangas, kopwe enito seni lepelien fanüfan me rüanü o eniti ekei somä, pwe repwe manausefäl.” 10 Iei mine üa osuni usun mine Kot a allük ngeniei. Iwe, enienin ngasangas a tori ekewe somä pwe ra manausefäl o ütä. Iwe, a fokun lapalap ar we mwich. ✡Pwär 11.11

11 Mürin, Kot a üreniei, “Nöün aramas, wewen ekei chü ekewe aramasen Israel meinisin. Nengeni, ra apasa, ‘Chüch kewe ra pwasapwas, ach apilükülük a morola, sa fokun ärela.’ 12 Iei mine kopwe osuni o üreniir pwe iei aloi ngang Kot ewe Samol mi Lapalap: Üpwe suki peiasemi o amanauasefälikemiitä seni me lon, ämi nei aramas, üpwe pwal aliwinikemiila lon ewe fanü Israel. 13 Iwe, lupwen üpwe suki peiasemi o amanauasefälikemiitä seni me lon, ämi nei aramas, mürin oupwe silei pwe ngang ewe Samol mi Lapalap. 14 Üpwe fangelong lomi Ngüni pwe oupwe manau, üpwe pwal aleniakemi lon poputän fanüemi. Mürin oupwe silei pwe ngang ewe Samol mi Lapalap üa kapas, üpwe pwal apwönüetä,” iei alon ewe Samol mi Lapalap.

15 Iwe, ewe Samol mi Lapalap a kapas ngeniei, 16 “Nöün aramas, kopwe angei efoch wok o makei ekei kapas won, ‘Mwün Juta.’ Mürin kopwe angei pwal efoch wok o makei ekei kapas won, ‘Mwün Israel.’ 17 Mürin, kopwe aföüfengeniir pwe repwe wiliti efoch chök wok me lepoum. 18 Nge are chon fanüom repwe ürenuk, ‘Kose mochen kopwe awewe ngenikem wewen ekana wok,’ 19 kopwe pälüeniir pwe iei aloi ngang Kot ewe Samol mi Lapalap: Üpwe angei ewe wok mi mak Israel won o aföüfengeni me ewe wok mi mak Juta won, pwe repwe wiliti efoch chök wok me lepei. 20 Iwe, lupwen ekewe wok ka fen makei wor ra nom lepoum, kopwe aküneer ngeni ekewe aramas. 21 Kopwe üreniir pwe iei aloi ngang Kot ewe Samol mi Lapalap: Üpwe angei ekewe aramasen Israel seni me lein ekewe mwü ia ra oola ie, üpwe pwal achufengeniir seni ekis meinisin o emwenirela lon poputän fanüer. 22 Üpwe föri pwe repwe eu chök mwichen aramas me lon ewe fanü, pwal won ekewe chukun Israel. Nge eman chök king epwe nemeniir meinisin. Iwe, resap chüen imwüfesen lon ruu mwichen aramas ika ruu mwü. 23 Resap chüen alimengaueer ren ar kewe uluulun anümwäl me ar föför mi anioput ika sokun ar pupungau. Pwe ngang üpwe amanaueer seni tipisin ar tok seniei, üpwe pwal limeti seniir ar tipis. Iwe, ir repwe nei aramas, nge ngang üpwe ar Kot.

24 Eman king usun chök nei chon angang Tafit epwe nemeniir, epwe wor eman chök ar chon mas, nge repwe tümwünüöchü le apwönüetä ai kewe allük o aleasochis ngeni ai kewe pwüüng. ✡Is 34.24 25 Iwe, repwe nonom lon ewe fanü ia ar kewe lewo ra fen nonom ie, ewe fanü üa ngeni nei we chon angang Jakop. Repwe nonom lon me nöür pwal mwirimwirir kewe tori feilfeilachök. Nge eman king usun chök nei chon angang Tafit epwe nemeniir tori feilfeilachök. 26 Üpwe föri eu pwonen kinamwe ngeniir, eu pwon epwe nonom tori feilfeilachök. Üpwe afeiöchüür o achomongeer, üpwe pwal anomu imwei mi pin lefiler, pwe epwe nom tori feilfeilachök. 27 Iwe, üpwe imweimw lefiler, ngang üpwe ar Kot, nge ir repwe nei aramas kana. ✡2.Kor 6.16; Pwär 21.3 28 Iwe, lupwen imwei mi pin epwe nonom lefiler tori feilfeilachök, mürin chon ekewe mwü repwe silei pwe ngang ewe Samol mi Lapalap üa apini Israel.”