1 Iwe, lon ena fansoun ekewe soufos Akai me Sekaraia eman mwirimwirin Ito ra osuni ngeni ekewe chon Juta mi nom lon Juta me Jerusalem fän iten ewe Koten Israel, pun Ngünün a nonom wor. ✡Sek 1.1 2 Mürin Serupapel nöün Sealtiel me Jesua nöün Jehosatak ra ütä o popuetä le aüsefälietä ewe imwen Kot lon Jerusalem. Nge nöün Kot kewe soufos ra etiir o alisiir. ✡Ak 1.12; Sek 4.6-9

3 Iwe, lon ewe chök fansoun Tatenai kepinan ewe fanü lotoun ewe chanpupu Oifrat me Setar-posenai pwal chiechier kewe ra feila rer o aisiniir, “Iö a mwütätä ngenikemi pwe oupwe aüetä ei imwenfel o awesala? 4 Ikafa iten ekewe mwän mi aüetä ei imw?” 5 Nge Kot a mamasa ekewe souakomwen chon Juta. Iwe, ekewe nöüwisen Persia resap aükätiu ar angang tori echö repoot epwe tori Tarius, nge Tarius epwe tinala pälüan lon echö toropwe.

6 Iei ewe repoot Tatenai kepinan ewe fanü lotoun ewe chanpupu Oifrat me Setar-posenai pwal chiechian kewe kepina mi nom lon ewe fanü lotoun ewe chanpupu Oifrat ra tinala ren ewe king Tarius. 7 Iwe, iei masouen ewe repoot: “Ngeni ewe king Tarius, aia äleäl amwo epwe wor kinamwe lon mwum. 8 Äm aia mochen asile ngonuk, en äm king, pwe aia feila lon ewe fanü Juta ren imwenfelin ewe Kot mi tekia. Ra aüetä ewe imw ren fau mi fokun watte o iseis irä lon ekewe etiip, nge ar angang a fokun fisiöch o fefeitä. 9 Mürin aia kapas ngeni ekewe souakom o aisiniir, ‘Iö a mwütätä ngenikemi pwe oupwe aüsefälietä ei imwenfel o awesala?’ 10 Aia pwal aisiniir iter pwe aipwe asile ngonuk iten ekewe mwän mi emweniir. 11 Iwe, iei usun mine ra pälüeni ngenikem, ‘Äm aia chon angang ngeni ewe Koten läng me fanüfan. Aia aüsefälietä ewe imwenfel a fen kaü lon chomong ier ra la. Eman king mi tekia lon Israel a aüetä ewe imwenfel o awesala. 12 Nge pokiten äm kewe lewo ra asonga ewe Koten läng, iei mine a atolongeer fän nemenien Nepukatnesar ewe kingen Papilon, ewe re Kaltea. Ätei a ataela ei imwenfel o uwala ekewe aramas ngeni Papilon. ✡2.King 25.8-12; 2.Kron 36.17-20; Jer 52.12-15 13 Nge lon aeuin ierin mwün Sirus ewe king mi nemeni Papilon, Sirus a föri eu allük pwe ei imwen Kot epwe kaüsefäl. ✡Esr 1.2-11 14 Iwe, a pwal atowu ekewe pisek seni kolt me silifer Nepukatnesar a angei seni ewe imwenfel lon Jerusalem o uwala lon ewe imwenfelin an kewe kot lon Papilon. Ekei pisek ewe king Sirus a ngeni eman mwän itan Ses-pasar. Ätewe ewe king a seikätä pwe epwe kepina lon Juta. 15 Iwe, Sirus a üreni Ses-pasar, “Kopwe angei ekei pisek, kopwe feila o anomuur lon ewe imwenfel lon Jerusalem, nge kopwe pwal aüsefälietä ewe imwen Kot won wesewesen lenian me lom.” 16 Mürin, ei mwän Ses-pasar a feito o föri longolongun ewe imwen Kot lon Jerusalem. Iwe, seni ewe fansoun tori lon ei otun aia chök akaüetä, nge esamwo wesila.’ 17 Iei mine ika a öch me reöm, en äm king, kopwe kütta lon än ekewe king puken uruwo lon Papilon pwe kopwe küna ika ei allük a pwüngüla me ren ewe king Sirus fän iten kaüsefälin ei imwen Kot lon Jerusalem. Mürin kopwe asile ngenikem mefiom won ei pworaus.”