1 Mürin, ewe Samol mi Lapalap a üreniei, “Kopwe angei epek fau mi chöpöp o makei won ren itechik aramas ra tongeni aleani ‘Maher-salal-haspas.’ *wewen Maher-salal-haspas chon ewe fanü ra müttir solä, ra müttir liap. 2 Kopwe pwal körato ruoman mwän mi allükülük, ewe souasor Uria pwal Sakaria nöün Jeperekia we mwän, pwe repwe chon pwärätä.” 3 Mürin üa kon ren pwülüei we, nge a pwopwo o nöüni eman ät. Iwe, ewe Samol mi Lapalap a üreniei, “Kopwe aita ngeni ewe ät Maher-salal-haspas. 4 Pun mwen än ewe semirit epwe tongeni apasa ‘semei’ ika ‘inei’, ewe kingen Asiria epwe akom le uwala wöün Tamaskus me pisekin Samaria.”

5 Iwe, ewe Samol mi Lapalap a kapassefäl ngeniei, 6 “Ekei aramas ra aücheangaua ekewe kolukun Siloa mi pupuöch, nge ra pwapwa ren ar pwonen atipeeu ngeni Resin ewe kingen Siria me ewe king Peka nöün Remalia we. 7 Iei mine ngang ewe Samol üpwe awarato ewe kingen Asiria me nöün sounfiu meinisin pwe repwe maun ngeni Juta. Repwe feito usun pumongun ewe chanpupu Oifrat, lupwen a säsewu seni lenian o pwölüela ünükün. 8 Repwe tolong lon Juta usun eu noter a tolong lon ewe fanü o pwölüela. Nge lölön epwe feitä tori üen aramas. O Emanuel †wewen Emanuel Kot ailach, ekewe chon Asiria repwe chonifetalei unusen fanüom.”

9 Oupwe achufengenikemi, ämi chon ekewe mwü, nge oupwe niuokus. Oupwe aüseling, ämi chon ekewe fanü mi toau. Oupwe amolakemiitä ngeni maun, nge oupwe niuokus. Ewer oupwe amolakemiitä, nge oupwe niuokus. 10 Oupwe pwüngüpwüngfengen, nge ousap fokun pwäk ngeni och. Oupwe pwal apwüngala och, nge esap fokun fis, pun Kot ailem.

11 Iwe, ewe Samol mi Lapalap a kapas ngeniei fän an manaman mi lapalap. A fönöüei pwe üsap föri föförün ekei aramas. Iwe, a üreniei, 12 “Ousap aita ngeni rawangau mine ekei aramas ra aita ngeni rawangau, ousap pwal niueiti mine ir ra niueiti. 13 Oupwe chechemeni pwe ngang ewe Samol mi Unusen Manaman üa pin, ngang chök ewe eman oupwe meniniti o niuelapeiti. ✡1.Pet 3.14-15 14 Iwe, üpwe wiliti eu leni mi pin fän iten chokewe ra niueitiei o lüküei. Nge üpwe wewe ngeni eföü föün chepetek me eu achauen opup fän iten ekewe mwün Israel me Juta, pwal eu sär chon Jerusalem repwe tup lon. 15 Iwe, chomong aramas repwe chepetek ren, repwe turula o tatakis, repwe pwal tup o fif lon.” ✡1.Pet 2.8

16 Kopwe rifengeni ei kapasen pwärätä o anükü ekei allük lon leluken nei chon kaiö. 17 Ewe Samol mi Lapalap a amonala mesan seni ekewe mwirimwirin Jakop, nge ngang üpwe chök lükü i o apilükülükü. ✡Ipr 2.13 18 Ngang üa nom ikei me nei kana ewe Samol mi Lapalap a ngeniei. Äm aia eu asisilen mine epwe fis fän iten chon Israel me ren ewe Samol mi Unusen Manaman, ewe mi imweimw won ewe chuk Sion. ✡Ipr 2.13 19 Iwe, aramas repwe ürenikemi pwe oupwe aisini ekewe watawa me ekewe sourong mi ngorongor me ngüngü. Nge ämi oupwe chök aisini ämi Kot. Pun pwota oupwe aisini ngünün ämi kewe somä fän iten chokewe mi manau? 20 Apwi, oupwe chök rongorong än Kot kewe allük me pwärian. Nge are ousap apwönüetä ekei kapas, esap wor remi saram. 21 Aramas repwe chök siamüfetal won ewe fanü fän riaföü me echik. Nge lupwen ar echik, repwe songeiti o otteki ar king me ar Kot. Iwe, repwe netä läng, 22 repwe pwal netiu lepwül, nge repwe chök küna riaföü me rochopwak me watten niuokus. Iwe, repwe kasülong lon rochopwak mi lapalap.