Jeremaia
Kapas akom
I. Iten ei puk: Jeremaia, pun mine a mak lon, püsin pworausan me an kewe kapasen osuni. Wewen ei it Jeremaia: Kot a tekia, Kot a atekiatäi ika Kot a pöütala.
II. Chon makei ei puk: Jeremaia
III. Itelapemongen ei puk: Pwüng a afefeitäi eu mwü, nge tipis a afefeitiua o aitengaua.
IV. Kapas aüchean ei puk: Än chon Juta tipis a atoto wor feiengau, pwe ra oola Papilon.
V. Masouen ei puk Jeremaia: Lon ei puk a mak pworausen ewe soufos Jeremaia me an kapasen osuni. Jeremaia a manau arapakan ngeni ewe ier 627 tori 560 mwen Kraist (B.C.) Lupwen an angang fansoun langatam a üreni ekewe chon Israel, pwe Kot epwe afeiengaueer pokiten ar angang ngeni anümwäl me ar tipis. Jeremaia a chüen manau, lupwen a fis osunian, pwe Jerusalem a oolong fän nemenien Nepukatnesar ewe kingen Papilon. A küna pwe ewe telinimw me ewe imwenfel ra tala, nge ewe kingen Juta me chomong chon Juta ra oola Papilon. Jeremaia a pwal osuni pwe lon eu fansoun ekewe aramasen Juta repwe liwinsefälito seni ar oola o försefäli mwüür. Ewe puken Jeremaia a kinikinitiu lon limu kinikin:
1. Kot a köri Jeremaia o akünöü.
2. Än Kot kapas ngeni ewe mwün Juta me nöün kewe king lupwen fansoun än Josia, Jehoiakim, Jehoiachin me Setekia nemenem.
3. Ekoch sokun kapasen osuni me pworaus mi aüchea usun manauen Jeremaia, Paruk nöün Jeremaia we seketeri a makei.
4. Än Kot kapas usun ekewe mwün lükün.
5. Pworausen lesopolan usun än Jerusalem tala me än ekewe aramas oola Papilon.
Jeremaia eman mwän mi fokun tongei aramasan, a pwal oput an epwe asile ngeniir usun ewe apwüng epwe toriir. Fän chomong a kapas fän mwökütükütün lelukan usun an riaföü, pokiten Kot a köri pwe epwe eman soufos. Än ewe Samol mi Lapalap kapas a usun chök ekkei me lon lelukan, esap tongeni amwöchalong lon. Ekoch kapas mi fokun aüchea me lon ei puk resap chök pworaus fän iten ewe fansoun weires Jeremaia a nom lon, nge a pworaus usun ewe fansoun epwe fis eu pwon mi fö, eu pwon nöün Kot kewe aramas repwe apwönüetä, nge esap eman epwe achema ngeniir kapasan, pun epwe mak lon leluker.
VI. Tettelin masouen ei puk:
Kot a köri Jeremaia 1.1-19
Kapasen osuni lon mwün Josia, Jehoiakim, Jehoiachin me Setekia 2.1–25.38
Pworaus mi fis ngeni Jeremaia 26.1–45.5
Kapasen osuni usun feiengauen ekewe mwü 46.1–51.64
Jerusalem a tala 52.1-34
1
Kot a köri o akünöü Jeremaia
1.1-19
1 Iei apworausaen Jeremaia nöün Hilkia we mwän, i eman me lein ekewe souasor mi nom lon Anatot lon fanüen Peniamin. 2 Iwe, ewe Samol mi Lapalap a kapas ngeni Jeremaia lon engol me ülüngatin ierin mwün Josia ewe kingen Juta nöün Amon we mwän. ✡2.King 22.3–23.7; 2.Kron 34.8–35.19
3 Ewe Samol mi Lapalap a pwal kapas ngeni Jeremaia lon mwün Joiakim ewe kingen Juta nöün Josia we mwän. Mürin a pwal kapas ngeni fän chomong tori sopolan ewe engol me euin ierin mwün Setekia ewe kingen Juta nöün Josia we mwän. Iwe, lon alimuen maramen ei ier ekewe chon Jerusalem ra oola. ✡2.King 23.36–24.7; 2.Kron 36.5-8; 2.King 24.18–25.21; 2.Kron 36.11-21
4 Iwe, ewe Samol mi Lapalap a kapas ngeniei, 5 “Üa sileek me mwen kosamwo fis me lon letipen inom, nge me mwen om kosamwo uputiu üa filuk. Üa awisok pwe kopwe eman soufos ngeni chon ekewe mwü.” 6 Mürin üa üra, “Ai Kot Samol mi Lapalap, nengeni, üsap sile fos, pun ngang eman mi chök ier kükün.” 7 Nge ewe Samol mi Lapalap a üreniei, “Kosap apasa pwe en eman mi chök ier kükün. Pun kopwe feila ren chokana meinisin üpwe tinukela rer, nge kopwe apasa meinisin mine üa akünö ngonuk. 8 Kosap niuokusitiir, pun ngang üpwe etuk o tümwünuk. Ngang ewe Samol mi Lapalap üa kapas.” 9 Mürin, ewe Samol mi Lapalap a aitiewu pöün, a atapa awei o üreniei, “Nengeni, üa anöünöüuk fos. 10 Lon ei rän üa awisok pwe kopwe nemenem won ekewe fanü me mwü, pwe kopwe üttiretä o kupiretiu, kopwe atarela o atururetiu, kopwe pwal aüretä o fotukiir.”
11 Iwe, ewe Samol mi Lapalap a aisiniei, “Jeremaia, met ka küna?” Nge üa pälüeni, “Üa küna efoch palen ewe irä almont.” 12 Mürin ewe Samol mi Lapalap a üreniei, “A pwüng mine ka küna, pun üa tümwünü ai kapas pwe üpwe apwönüetä.” 13 Mürin ewe Samol mi Lapalap a pwal aisiniei, “Met ka küna?” Nge üa pälüeni, “Üa küna eu nape mi pur, nge a päito seni efeng.” 14 Mürin, ewe Samol mi Lapalap a üreniei, “Feiengau epwe towu seni efeng o feito won chon ei fanü meinisin. 15 Pun üpwe körato chon ekewe mwün efeng meinisin pwe repwe feito. Ar kewe king repwe anomu ar lenien motun king lon ekewe asamalapen Jerusalem me pwelin ünükün tittin pwal ünükün ekewe telinimwen Juta meinisin. 16 Üpwe apwüngü nei aramas pokiten ar föföringau meinisin. Ra likitieila, ra asor ngeni pwal ekoch kot o fel ngeni mine ra püsin föri ren pöür. 17 Nge en Jeremaia kopwe amolokotä. Kopwe feila o üreniir meinisin mine üa akünö ngonuk. Kosap rükö rer, pwe üsap arüköök me fän meser. 18 Nengeni, ikenai üpwe apöchökülok pwe kopwe wewe ngeni eu telinimw mi pöchökül tittin, kopwe wewe ngeni efoch ür seni mächä me eu tit seni piras, pwe kopwe ü ngeni unusen ei fanü, ngeni ewe kingen Juta me ekewe nöüwisen Juta, ekewe souasor me aramasen ei fanü. 19 Ir repwe maun ngonuk, nge resap tongeni akufuk, pun ngang üa etuk pwe üpwe tümwünuk. Ngang ewe Samol mi Lapalap üa kapas.”