1 Ämi chon ewe ainangen Peniamin, oupwe sü seni Jerusalem o sü ngeni anaie oupwe kinamwe me ie. Oupwe ettiki ewe rappwa me lon Tekoa, oupwe aüetä eu asisil won Pet-akerem, pun feiengau me tatakis mi watte epwe feito seni efeng. 2 Ewe telinimw Sion a fokun mürina o limelimöch, nge ngang üpwe ataela. 3 King kana repwe feito fiti nöür mwichen sounfiu pwe repwe maun ngeni Sion. Repwe aüetä imwer imw mangaku pwelin ünükün ia ra chök mochen aüetä ie. 4 Repwe apasa, “Ousipwe amol ngeni ach sipwe maun ngeni Jerusalem. Leoloas ousipwe maun ngeni. Feiengauach, pun ewe rän a mochomochola, nge a pwinitikich. 5 Ousipwe maun ngeni lon ei pwin o ataela an kewe imwen king.”

6 Pun iei alon ewe Samol mi Unusen Manaman, “Oupwe pöküetiu ekewe irä, oupwe senätä eu ororen maun ünükün Jerusalem. Üpwe apwüngü ei telinimw, pun angangen ariaföüü aramas a chök fifis lon. 7 Usun eu chönüttu a awora koluk mi fö, iei usun ewe telinimw a awora föföringau mi fö iteiten rän. Üa rongorong usun angangen mwäneson me kata a fis lon, üa chök küna chon samau me chon kinas. 8 Oupwe miritila, ämi chon Jerusalem! Pun are ousap, üpwe kul senikemi o awili ämi telinimw ngeni eu fanüapö ia esap wor eman a nonom ie.”

9 Iei alon ewe Samol mi Unusen Manaman ngeniei, “Kopwe elimelimala ekewe lusun mi chüen nom me lon Israel, usun eman a kiniela ekewe lusun föün irän wain, kopwe küttasefäli uän palan, usun eman mi kini föün irän wain.” 10 Nge üa apasa, “Iö üpwe fos ngeni o eäni kapasen fön ngeni? Iö epwe rongorong? Nengeni, ra pineela selinger pwe resap mochen rongorong om kapas. Ra takiri mine ka akünö ngeniei pwe üpwe üreniir. 11 Üa pwal eäni om lingeringer ngeniir, ai Samol mi Lapalap, nge üsap chüen tongeni amwöchü.” Mürin, ewe Samol mi Lapalap a üreniei, “Kopwe eäni ai lingeringer won ekewe semirit mi nom won al, pwal won ekewe mwichen alüal. Ekewe mwän fiti pwülüer repwe oola, pwal ekewe chinlap me chokewe mi ieritam. 12 Chon ekis repwe imweni imwer kewe, repwe pwal fanüeni fanüer o pwülüeni pwülüer. Üpwe apwüngü chon ei fanü. 13 Pun seni ekewe mi kis tori ekewe mi lap ir meinisin ra kütta ar win fän pwüngingau. Pwal seni ekewe soufos tori ekewe souasor ir meinisin ra atupu aramas. 14 Ra atupun säfeni kinasen nei aramas ren ar apasa, ‘A wor kinamwe, a wor kinamwe,’ ngei ese wor kinamwe. ✡Is 13.10 15 Ifa usun, ra säw ren ar föri föför mi anioput? Apwi, resap fokun säw, esap pwal sokola wowor. Iei mine repwe pöütütiu lein chokewe mi pöütütiu, repwe feiengau lupwen üpwe apwüngüür. Ngang ewe Samol mi Lapalap üa kapas.” ✡Jer 8.10-12

16 Iei alon ewe Samol mi Lapalap, “Oupwe ütä ünükün ekewe al o katol, oupwe ais usun ekewe alen lom ifan ewe al mi mürina. Oupwe fetal won o küna kinamwe.” Nge ir ra apasa, “Äm aisap mochen fetal won.” ✡Mat 11.29 17 Mürin ewe Samol mi Lapalap a awisa chon mas womi o apasa, “Oupwe aüseling ngeni tikin ewe rappwan asilesil.” Nge ir ra apasa, “Äm aisap mochen aüseling.” 18 Iei mine ewe Samol mi Lapalap a apasa, “Oupwe aüseling, ämi chon ekewe mwü, oupwe katol mine epwe fis ngeni nei aramas. 19 Oupwe aüseling, ämi chon fanüfan. Nengeni, üpwe awarato feiengau won ekewe aramas pwe uän ar föför, pokiten resap mochen aüselinga ai kewe kapas, ra pwal aleasolap ngeni ai kewe allük. 20 Met popun pwe ra uwato rei apach mi pwokus seni Sepa, ika ekewe nofitin mongö mi arar seni fanü toau? Üsap etiwa ar asoren kek, üsap pwal pwapwa ren ar kewe asor. 21 Iei mine üpwe anomu me mwen ekei aramas eu lenien chepetek, pwe repwe chepetek won. Ekewe sam pwal nöür kewe mwän, chon arur me chiechier repwe mäfeiengauepök.”

22 Iei alon ewe Samol mi Lapalap, “Nengeni, eu mwichen aramas a feito seni ewe fanü mi nom efeng, chon eu mwü mi fokun watte seni lesopun fanüfan, ra amolätä ngeni maun. 23 Ra amwöchü nöür esefich me wokur siles, ra ariaföüü aramas nge resap eäni tong. Ngüngün ar feito a usun ngüngün noon lematau. Ra wawa oris o tettel pwe repwe mauneek en, Jerusalem.” 24 Ekewe aramasen Jerusalem ra apasa, “Sa rongorong ei pworaus, pöüch ra chök ititiu. Niuokus watte a torikich, pwal cheuch a cherikich usun cheuchen fam a cheri eman fefin. 25 Sisap tongeni feiliwu lon ekewe mälämäl ika fetal won ekewe al, pun ewe mi oputakich a wor nöün ketilas, nge eniweniw a pweli ünüküch.” 26 Ewe Samol mi Lapalap a üreni nöün aramas, “Oupwe üföüf üf seni tuk o asokopelakemi lon falangen ekkei. Oupwe ngüngüres usun eman a ngüngüres won nöün aleman, oupwe fokun kechüangau, pun ewe chon kata epwe müttir wareitikemi.

27 Üa awisok, Jeremaia, pwe kopwe sotuni nei aramas usun eman a sotuni mächä. Kopwe sotuniir o küna ar kewe föför. 28 Ir meinisin ra ülöförea o ü ngeniei, ra usun chök piras me mächä. Ir meinisin ra chök föri föför mi ngau o luapasfetal. 29 Ewe um a fokun kü pwe epwe etelala ewe pilom. A lomotongau än ewe chon ketel angang, pun ekewe aramasangau resap imwüla. 30 Aramas ra aita ngeniir kiten silifer mi pöütüla, pun ngang ewe Samol mi Lapalap üa pöütirela.”