1 “Ifa usun, eman aramas esap wisen angang weires won fanüfan?

Ifa usun, ränin manauan resap wewe ngeni ränin manauen eman aramas mi saata?

2 Usun eman chon angang, aramas ra nöüni amanau, a älälei an mochen nonom fän nür,

pwal usun eman aramas mi saata a witiwiti liwinin,

3 iei usun manauei lon chomong maram esap wor aüchean,

nge chomong pwin mi ur ren riaföü ra toriei.

4 Lupwen üa konola, üa üra, ‘Inet üpwe pwätäsefäl?’

Nge ewe pwin a langatam, üa fokun lupelupekisiei tori a ränila.

5 Inisi a kula ren wuun me limengau,

ünüchei a ponopon,

chönü a pwal towu seni kilingauei.

6 Ränin manauei ra müttirila, lap seni müttirin än eman chon tür äsäp.

A tori müchülar, nge esap wor ai apilükülüköch.

7 Ai Kot, kopwe chechemeni pwe manauei a usun chök eu ngasangas mi müchükai,

nge mesei esap chüen künasefäli mine a mürina.

8 Iwe, chokewe mi künaei iei resap chüen künasefäliei.

Lupwen mesom a neto rei, üsap chüen nom.

9 Usun ekewe kuchu ra ässila o morola,

iei usun eman aramas mi feitiu lon lenien sotup esap chüen liwinsefäl,

10 esap chüen fokun liwiniti imwan,

nge chon lenian resap chüen silei.

11 Iei mine üsap fanafanala,

nge üpwe fos fän riaföün letipei,

üa ösüngau fän weiresin lelukei.

12 Ifa usun, ngang ewe matau ika eman mönün lematau mi fokun watte,

pwe ka awisa eman epwe mamasaei?

13 Lupwen üa ekieki pwe ai kon won kiei epwe achipaei,

ai möür epwe akisikisala ai cheuch,

14 mürin ka eniuokusuei ren tan,

ka eniwaei ren künaei

15 pwe üpwe filätä ai üpwe kak o mäla,

lap seni ai üpwe chök riaföü ren samaun inisi.

16 Üa anioputa manauei, üsap chüen mochen manau.

Kopwe likitiei, pun ränin manauei ra usun chök eu ngasangas mi müchükai.

17 Pwota ka kon aücheani eman aramas?

Pwota ka nenengenifichi mine a föri? ✡Kölf 8.4; 144.3

18 Ka cheki i iteiten lesosor,

ka sotuni iteiten fansoun.

19 Inet kopwe nenne seniei?

Kopwe likitiei ekis chök tori üpwe oromalong chönün awei.

20 Nge are üa tipis, met kopwe osupwang ren, en chon mamasa aramas.

Pwota üa eu lenien ännen me reöm?

Pwota üa eu pisek mi chou me reöm?

21 Pwota kosap amusala ai pupungau

o angei seniei ai föföringau?

Pun arapakan chök üpwe kon lon peiasei.

En kopwe küttaei, nge üsap chüen nom.”