Nehemia
Kapas akom
I. Iten ei puk: Nehemia. Ei puk a angei itan seni iten ewe aramas mi aüchea, a mak pworausan lon. Wewen ei it Nehemia: Kot ewe chon echipa aramas. Lon ewe Paipelin Ipru ewe puk Esra me Nehemia ra chök eu.
II. Chon makei ei puk: Ese nien fat. Chomong sousilelap lon Paipel ra ekieki, pwe Nehemia a makei ewe eu kinikin mi watte me lon ei puk usun pworausen manauan.
III. Itelapemongen ei puk: Iotek fiti angang.
IV. Kapas aüchean ei puk: Nehemia eman mi anomu an apilükülük won Kot o achocho le iotek.
V. Masouen ei puk Nehemia: Ei puk a kinikinitiu lon 4 kinikin:
1. Ewe kingen Persia a tinala Nehemia Jerusalem, pwe epwe kepina lon Juta.
2. Tittin ewe telinimw Jerusalem a kaüsefälitä.
3. Esra a aleani ngeni ekewe aramas ewe puk än Kot kewe allük ra mak lon. Ekewe aramas ra pwärätä ar tipis.
4. Pwal ekoch angang Nehemia a föri, lupwen a kepina lon Juta.
VI. Tettelin masouen ei puk:
Nehemia a liwinsefäliti Jerusalem 1.1–2.20
Tittin ewe telinimw Jerusalem a kaüsefälitä 3.1–7.73
Esra a aleani ewe allük, a fis försefälin ewe pwon ngeni Kot 8.1–10.39
Pwal ekoch angang Nehmia a föri 11.1–13.31
1
Nehemia a iotek fän äsengesin Jerusalem
1.1-11
Iei än Nehemia nöün Hakalia we mwän pworaus. Iwe, lon ewe maram Kislef, lon rüen ierin mwün Artaksasta, ngang Nehemia üa nom lon Susa samolun telinimwen ewe fanü. Iwe, a fis pwe Hanani, eman me lein pwii kewe, a feito me ekoch mwän seni Juta. Üa aisiniir usun ekewe chon Juta mi chüen manau, chokewe mi liwinla seni ar oola lon Papilon, pwal usun Jerusalem. Mürin ra üreniei, “Ekewe mi chüen manau seni ar oola o liwiniti ewe fanü ra nom lon weires watte me itengau. Tittin ewe telinimw Jerusalem a chüen tatiu, nge asamalapan kewe mi karala resamwo försefäl.”
Iwe, lupwen üa rongorong ei pworaus, üa mottiu o kechü, üa ngüngüres ekoch rän o echikefel me iotek fän mesen ewe Koten läng. Üa apasa, “Ai Samol mi Lapalap Koten läng, en ewe Kot mi tekia, äm aia niuokusituk. Ka apwönüetä om pwon me tong ellet ngeni chokewe mi echenuk o aleasochisi om kewe allük. Kose mochen kopwe nenengeniei o aüselinga ai iotek ngang noum ei chon angang üa eäni ngonuk lerän me lepwin fän iten ekewe aramasen Israel noum kewe chon angang. Üa pwärätä pwe äm aramasen Israel aia tipis ngonuk. Pwal ngang me chon leimwen semei, äm aia tipis. Äm aia föri föför mi ngau o ü ngonuk, äm aisap aleasochisi om kewe allük me pwüüng ka allük ngeni noum chon angang Moses. Kopwe chechemeni ewe kapas ka eäni ngeni noum chon angang Moses, lupwen ka apasa, ‘Are ämi chon Israel ousap allükülük ngeniei, üpwe atoropasakemi lein chon ekewe mwü. Lif 26.33 Nge are oupwe liwinsefälitiei o aleasochisi ai kewe allük, ngang üpwe achufengenikemi o aliwinikemiila ngeni ewe leni üa filätä pwe aramas repwe fel ngeniei ie, inamwo are oua toropasfeil tori lesopun fanüfan.’ Tut 30.1-5 10 Ir noum chon angang me noum aramas, chokewe ka angaserela ren om manaman mi lapalap, pwal ren om pöchökül. 11 Ai Samol, kopwe aüselinga ai iotek, pwal än noum kewe chon angang iotek, ir mi pwapwa le meninituk. Kose mochen kopwe atufichiei ngang noum chon angang ikenai o mwüt ngeniei pwe üpwe küna ümöümöch me ren ei king.” Lon ei fansoun ngang eman chon amolätä ünümen ewe king.

1:8: Lif 26.33

1:9: Tut 30.1-5