1 Ai Kot, en ewe üa mwareiti, kosap fanafanala.

2 Pun ekewe aramas mi ngau o atuputup ra apasawu kapasen ü ngeniei,

ra aitengauaei ren ar kapas chofana.

3 Ra kapasingau usi o fiu ngeniei,

nge esap wor popun.

4 Liwinin ai tongeer, ra atipisiei,

nge ngang üa fen iotek fän iter.

5 Iei usun ra liwini ngeniei ngau fän iten ai föför mürina ngeniir,

nge oput fän iten ai tongeer.

6 Kopwe filätä eman aramasangau epwe ü ngeni ewe chon oputaei,

eman chon atipisi epwe atolonga i lon kapwüng.

7 Are a wes le kapwüng, epwe pwä pwe a tipis.

Pwal an iotek epwe wiliti tipis.

8 Amwo ränin manauan epwe chökükün,

nge eman epwe siwili lon wisan. ✡Föf 1.20

9 Amwo nöün kana repwe mäsen,

nge pwülüan we epwe lipichsefäl.

10 Amwo nöün kana repwe nomofetal o tütüngor,

eman epwe asürela seni imwer mi tala.

11 Amwo ewe chon angei liwinimang epwe angei meinisin mine an,

nge chon ekis repwe angei fän pöchökül uän an angang.

12 Amwo esap wor eman epwe eäni kirikiröch ngeni,

esap pwal wor eman epwe tongei nöün kewe mi mäsen.

13 Amwo mwirimwirin kana repwe mäla,

nge iter epwe töttölüwu me lon aruuen täppin aramas.

14 Amwo än an kewe lewo föföringau repwe chem me ren ewe Samol mi Lapalap,

nge än inan tipis esap musala.

15 Amwo ewe Samol mi Lapalap epwe chechemeni ar tipis fansoun meinisin,

nge aramas repwe fokun manlükirela.

16 Pun ewe mwän esap ekiekin eäni kirikiröch,

nge a tapweri ekewe mi wöüngau o mwelele,

pwal ekewe mi tatakis leluker, pwe epwe nirela.

17 A sani anümamaua aramas. Amwo ekewe anümamau repwe feitiu won.

Esap sani an epwe afeiöchü aramas. Amwo esap wor eman epwe afeiöchü.

18 A örüni kapasen anümamau usun an örüni üföüf üf.

Amwo an kewe kapasen anümamau repwe tolong lon inisin usun chök koluk,

repwe pwal tolong lon chün usun chök kiris.

19 Amwo repwe usun chök echö üf a pwölü ngeni,

pwal usun efoch pelit a ri ngeni lukalapan fansoun meinisin.

20 Amwo epwe iei liwinin ekewe chon atipisiei me ren ewe Samol mi Lapalap,

liwinin chokewe mi kapasingau usi.

21 Nge en, ai Kot, ai Samol mi Lapalap, kopwe peniei usun ka pwon ngeniei,

kopwe angasaei pokiten om tong ellet mi mürina.

22 Pun ngang eman mi wöüngau o mwelele,

lelukei a fokun tatakis.

23 Üpwe le morola usun nürün och mettoch a morola lekuniol.

Aramas ra pönieila usun ra pöni eman lifichimas.

24 Pwäsuki ra apwangapwang ren ai öchüün,

inisi a kichüchüla.

25 Ngang eman mi küna turunufas me ren chon atipisiei,

lupwen ra künaei, ra elifechifechi mökürer. ✡Mat 27.39; Mark 15.29

26 Ai Samol mi Lapalap ai Kot, kopwe alisiei,

kopwe amanauaei lon om tong ellet.

27 Kopwe amefi ngeniir

pwe en, ai Samol mi Lapalap, ka amanauaei.

28 Ir ra tongeni eäni kapasen anümamau ngeniei,

nge en kopwe afeiöchüei.

Chokewe mi ü ngeniei repwe küna säw.

Nge ngang noum chon angang üpwe pwapwa.

29 Amwo ekewe chon atipisiei repwe pwölüla ren itengau,

repwe pwölüla ren püsin ar säw usun ra pwölüla fän echö üf.

30 Üpwe kilisou chapur ngeni ewe Samol mi Lapalap.

Üpwe mwareiti i me lein ewe mwicheichen aramas.

31 Pun i a peni ewe chon mwelele,

pwe epwe amanaua seni chokewe mi atipisi pwe epwe mäla.