1 Üa echeni ewe Samol mi Lapalap, pun a rongorong mweliei

o aüselinga ai kewe tüngor pwe epwe ümöümöch ngeniei.

2 I a aü selingan ngeniei,

iei mine üpwe kökköri i lon unusen ränin manauei.

3 Ekewe likatupun mäla ra pwelieila,

ekewe feiengauen lenien sotup ra toriei,

üa uren riaföü me niuokus.

4 Mürin üa köri iten ewe Samol mi Lapalap o apasa,

“Ai Samol mi Lapalap, üa tüngor ngonuk, kopwe amanauaei.”

5 Ewe Samol mi Lapalap a kirikiröch o pwüng,

ach Kot a fokun eäni tong.

6 Ewe Samol mi Lapalap a tümwünü ekewe chon lipwäkingau.

Lupwen üa nom lon feiengau, a amanauaei.

7 Ngüni, kopwe apilükülüköch,

pun ewe Samol mi Lapalap a kirikiröch ngeniei.

8 Ewe Samol mi Lapalap a amanauaei seni mäla.

A aükätiu chönün mesei,

a tümwünü pechei pwe üsap chepetek,

9 pwe üpwe fetal fän mesan

lon fanüen chon manau.

10 Üa amwöchü ai lükülük pwal lupwen fansoun ai üra,

“Üa nom lon riaföü lapalap.” ✡2.Kor 4.13

11 Üa apasa lon ai niuokus,

“Aramas meinisin ra chofana.”

12 Met üpwe liwini ngeni ewe Samol mi Lapalap

ren ekewe feiöch meinisin a ngeniei?

13 Üpwe uwato ewe kapen wain pwe ai asoren ün

o kilisou ngeni ewe Samol mi Lapalap.

14 Üpwe apwönüetä ai kewe pwon ngeni ewe Samol mi Lapalap

me fän mesen nöün kewe aramas meinisin.

15 A aüchea me fän mesen ewe Samol mi Lapalap

mälan nöün kewe chon pin.

16 Ai Samol mi Lapalap, ngang noum chon angang.

Ngang noum chon angang, nöün noum chon angang fefin.

En ka apichala föföi kewe.

17 Üpwe eäni ngonuk ewe asoren kilisou

o iotek ngonuk.

18 Üpwe apwönüetä ai kewe pwon ngeni en, ewe Samol mi Lapalap,

me fän mesen noum kewe aramas meinisin

19 me lon imwom we imwenfel me lukalapen Jerusalem.

Ousipwe mwareiti ewe Samol mi Lapalap.