1 Ai Samol mi Lapalap, üa siö ngonuk seni lon ekewe leni mi alolol.

2 Ai Samol, kopwe rongorong mweliei.

Kopwe aü selingom ngeni ai kewe tüngor pwe kopwe ümöümöch ngeniei.

3 Are en, äm Samol mi Lapalap, kopwe maketiu äm kewe tipis,

iö epwe tongeni manau?

4 Nge en ka amusala äm tipis,

pwe aipwe niuokusituk.

5 Üa fokun witiwiti ewe Samol mi Lapalap,

üa apilükülükü an kapas.

6 Üa witiwiti ewe Samol,

lap seni än ekewe chon mas witiwiti an epwe ränila,

lap seni än ekewe chon mas witiwiti an epwe ränila.

7 Ämi chon Israel, oupwe apilükülükü ewe Samol mi Lapalap.

Pun tong ellet a nom ren ewe Samol mi Lapalap,

a pwal watte an angangen amanaua aramas.

8 I epwe amanaua chon Israel seni ar tipis meinisin. ✡Mat 1.21; Tit 2.14