1 En pwii, ifa usun, ka apwüngü pwal ekoch? Esap fokun wor om künetipingen, ese lifilifil ika en iö. Pun lupwen ka apwüngü ekewe ekoch, nge mürin ka föri ekewe sokun föför usun chök ir, ka püsin atipisuk. ✡Mat 7.1; Luk 6.37 2 Nge kich sia silei pwe Kot a wenechar lupwen a apwüngü ekewe aramas mi föri ekei sokun föför. 3 Nge en pwii, ka püsin föri ekei sokun föför ka apwüngü ekoch won! Ifa usun, ka ekieki pwe ka tongeni sü seni än Kot apwüng? 4 Eli ka turunufasei an kirikiröch mi fokun lapalap, an songomang me tongotam! Kosap mefi pwe än Kot kirikiröch a mochen emwenuk ngeni ekieksefäl? 5 Nge lelukom a tipepöchökül o ülöförea. Iei mine ka püsin alapala om liwiningau lon ewe rän lupwen Kot epwe pwärala an song me an apwüngüwen. 6 Pun Kot epwe liwini ngeni aramas meinisin liwinin ar föför. ✡Kölf 62.12; SalF 24.12 7 Ekoch aramas ra likitü lon ar föför mürina, ra kütta ling me iteüöch me ewe manau esap müchüla. Iwe, Kot epwe ngeniir manau esemüch. 8 Nge pwal ekoch ra chök kütta püsin feiöchür, ra oput mine a let o ra föri mine ese pwüng. Iwe, Kot epwe tinatiu an song me lingeringer wor. 9 Epwe wor osukosuk me riaföü epwe tori aramas meinisin mi föri mine a ngau, akomwan epwe tori ekewe chon Juta, nge mürin epwe pwal tori ekewe chon lükün Israel. 10 Nge Kot epwe ngeni chokewe mi föri mine a mürina ling me iteüöch me kinamwe, akomwan ngeni ekewe chon Juta, nge mürin ngeni ekewe chon lükün Israel. 11 Pun Kot esap lifilifil aramas lon an apwüngüür. ✡Tut 10.17

12 Iwe, ekewe chon lükün Israel esap wor rer än Moses kewe Allük, ra tipis o pöütmwälila, inamwo ika esap wor rer ekewe Allük. Ekewe chon Juta a wor rer ekewe Allük. Ra tipis o küna apwüng ren mine a mak lon ekewe Allük. 13 Pun ekewe aramas resap küna pwüng mwen mesen Kot ren ar rongorong ngeni ekewe Allük, nge ren ar apwönüetä pwüngün ekewe Allük. 14 Ekewe chon lükün Israel esap wor rer ekewe Allük. Nge iteiten fansoun ra föri pwüngün ekewe Allük ren mefien letiper, ra pwärätä pwe ra silei met repwe föri ika resap föri, inamwo ika esap wor rer ekewe Allük. 15 Ar föför a pwärätä pwe pwüngün ekewe Allük a mak lon letiper. Mwelien letiper a pwal pwärätä pwe ei a let, pun fän ekoch ar ekiek a atipisiir, nge pwal fän ekoch a peniir. 16 Ren pwüngün ewe Pworausen Manau üa afalafala epwe iei usun mine epwe fis lon ewe Rän lupwen Kot epwe apwüngü ekewe ekiekin aramas mi monomon ren Jesus Kraist.

17 Nge ifa usun en? Ka püsin aita ngonuk eman chon Juta. Ka lükülükü ekewe Allük o sikäsini usun om chiechi ngeni Kot. 18 Ka silei mine Kot a mochen pwe kopwe föri, ka pwal kaiö seni ekewe Allük pwe kopwe filätä met a pwüng. 19 Ka lükü pwe en eman chon emwen fän iten ekewe mi mesechun, pwal eu saram fän iten chokewe mi nom lon rochopwak, 20 pwal eman chon öüröür fän iten ekewe mi tiparoch me eman sense fän iten chokewe resap mirit. Ka lükü, pwe pokiten a wor reöm ekewe Allük ka silei unusen mettoch meinisin o mine ka apasa a fokun let. 21 En ka aiti ngeni aramas ekewe Allük, pwota kosap püsin aiti ngonuk? Ka afalafala aramas pwe resap solä, nge ifa usumw, kosap püsin solä? 22 Ka apasa ngeni aramas pwe resap lisowu, nge ifa usumw, kosap lisowu? En ka fokun oput ekewe uluulun anümwäl, nge ifa usumw, kosap soläni mettoch seni lon ar kewe imwenfel? 23 Ka sikäsini usun än Kot kewe Allük mi nom reöm, nge ifa usumw, kosap atoto säw won Kot ren om purätiu an kewe allük? 24 Ekewe Toropwe mi Pin ra apasa, “Pokiten ämi chon Juta, ekewe chon lükün Israel ra aitengaua iten Kot.” ✡Ais 52.5

25 Are ka aleasochisi ekewe Allük, om sirkomsais a lomot, nge are ka aleasolap ngeni ekewe Allük a usun chök pwe kosap fokun sirkomsais. 26 Are eman chon lükün Israel esap sirkomsais a aleasochisi pwüngün ekewe Allük, ifa usun, Kot esap alealong i lon tettelin ekewe mi sirkomsais? 27 Iei usun ekewe chon lükün Israel repwe atipisikemi ämi chon Juta, pun ämi oua purätiu ekewe Allük, inamwo ika a makketiu fän itemi o ämi oua sirkomsais. Nge ir ra aleasochisi ekewe Allük, inamwo ika resap sirkomsais ren inisiir. 28 Iwe, iö wesewesen eman re Juta mi enletin sirkomsais? Sap eman re Juta mi chök sirkomsais ren inisin me lükün. 29 Esap ina! Nge eman mi enletin re Juta i eman re Juta lon letipan, wewen a sirkomsais lon letipan. Iei angangen ewe Ngünün Kot, sap angangen ekewe Allük mi makketiu. Ei sokun aramas epwe angei iteüöchün seni Kot, sap seni aramas.