26
God El Ac Sang Kutangla Nu Sin Mwet Lal
Len se ac tuku ke mwet uh fah yuk on soko inge in facl Judah:
Siti sesr uh ku na!
God El sifacna loango pot kac!
Ikasla mutunpot lun siti uh
Ac lela mutunfacl se ma oaru ac pwaye in utyak —
Mutunfacl su mwet we oru ma suwohs.
Kom, LEUM GOD, sang misla pwaye
Nu selos su filiya lulafongi lalos in kom,
Ac nunak lalos oakwuki ku.
Lulalfongi LEUM GOD pacl nukewa;
El ac fah karingin kut nwe tok.
El akpusiselyalos su inse fulat;
El kunausla siti ku ma elos muta we,
Ac rakinya pot we nu infohk uh.
Elos su akkeokyeyuk meet elos forfor fac in pacl inge
Ac futungya ye nialos.
 
LEUM GOD, kom akfwelye inkanek uh nu sin mwet wo;
Inkanek ma elos fufahsryesr fac uh fwelna.
Ku fahsr tukun ma lungse lom, ac filiya finsrak lasr in kom;
Kom mukena pa kut lungse yohk uh.
Ke fong uh nga nunkekom ke insiuk nufon;
Ke kom nununku faclu ac mwet fac,
Elos nukewa fah etu lah mea kalmen nununku suwohs.
10 Kom finne kulang nu sin mwet koluk uh,
Elos ac tiana etala in oru ma pwaye.
Elos finne muta in facl sin mwet suwoswos
A elos srakna oru ma koluk;
Elos tia lungse akfulatye kom.
11 Mwet lokoalok lom elos tiana etu lah kom ac kalyaelos.
LEUM GOD, oru elos in mwekin ac lela elos in keok;
Lela elos in keokkin kaiyuk su kom akoo nu selos.
Akkalemye nu selos lupan lungse lom nu sin mwet lom. Heb 10:27
 
12  LEUM GOD, kom fah ase misla ac insewowo nu sesr;
Ma nukewa ma kut orala uh
Ma tuku ke sripen orekma lom.
13  LEUM GOD lasr, oasr tari pacl ma leumiyuk kut sin mwet saya,
Tusruktu kom mukena pa LEUM GOD lasr.
14 A inge elos misa tari, ac elos fah tia sifil moul;
Ngunalos fah tia sifil tukakek,
Tuh kom kaelos ac kunauselosla.
Wangin sie mwet ac sifil esamulos.
15  LEUM GOD, kom akkapye mutunfacl sesr,
Ac akyokyelik ke siska nukewa;
Ke ma inge akfulatyeyuk kom.
16  LEUM GOD, kom kalyei mwet lom,
Ac in keok lalos elos pre nu sum.
17  LEUM GOD, kom oru kut wowoyak ac tung,
Oana ke sie mutan el koek ac tung ke pacl in isus lal.
18 Kut mutana in waiok ac keok,
wanginna ma kut oswe.
Wangin kutangla lasr nu sin facl sesr;
Wanginna ma kut orala.
 
19 Mwet lasr ma misa ac fah sifil moulyak!
Manolos ac fah sifil moul.
Elos nukewa su motul inkulyuk lalos
Fah ngutalik ac on ke engan.
Oana ke aunfong saromrom aksasuye faclu,
Ouinge LEUM GOD El fah akmoulyalosyak su misa ke pacl loes somla.
Pacl In Nununku Ac Pacl In Aksasuyeyuk
20 Mwet luk, kowos som nu in lohm suwos ac kaleang srungul an. Wikla kitin pacl nwe ke na kasrkusrak lun God wanginla. 21  LEUM GOD El ac tuku liki acn sel inkusrao in kalyei mwet faclu ke ma koluk lalos. Akmas ma orek in lukma fin faclu ac fah kalemla, ac infohk uh fah tia sifil okanla mwet su anwuki we.

26:11 Heb 10:27