35
Soko Inkanek Mutallana
1 Yen mwesis ac fah enganak,
Ac ros fah fareng in acn turangang.
2 Yen mwesis fah on ac sasa ke engan;
Ac fah arulana kato oana eol in acn Lebanon,
Ac kasrup fohk we oana ima lun Carmel ac Sharon.
Mwet nukewa fah liye oasku lun LEUM GOD,
Elos ac liye fulatlana ac ku lal.
3 Akkeye po su totola
Ac inti ma rarrar ke munas la.Heb 12:12
4 Fahk nu selos nukewa su munasla nunka,
“Kowos in ku, ac tia sangeng!
God El ac tuku in molikowosla,
El ac tuku in kalyei mwet lokoalok lowos.”
5 Mwet kun fah ku in liye,
Ac mwet sulohngkas fah lohng.35:5–6; Mt 11:5; Lk 7:22
6 Mwet ul fah srosro ac tacn,
Ac elos su tia ku in kaskas fah sasa ke engan.
Infacl srisrik fah soror sasla in acn mwesis;
7 Puk fol fah ekla sie lulu,
Ac acn pao ac fah sessesla ke unon in kof.
Acn ma kosro jackal uh muta we meet,
Mah ac loa fah kapak we.
8 Ac fah oasr soko inkanek sralap we
Su fah pangpang “Inkanek Mutallana.”
Wangin mwet koluk ac fah ku in fufahsryesr fin inkanek soko inge;
Wangin mwet lalfon ac wi forfor fac.
9 Ac fah wangin lion muta we;
Wangin kosro sulallal fah forfor we.
Elos na su LEUM GOD El molela
Fah fahsr nu yen selos ke innek soko inge.
10 Elos ac fah arulana engan ke elos sun acn Jerusalem,
Elos ac alullul ac sasa ke engan.
Elos ac fah engan ma pahtpat,
Ac fah wanginla asor ac keok lalos nwe tok.