51
Kas In Akwoye Jerusalem
1 LEUM GOD El fahk,
“Porongeyu, kowos su lungse moulla,
Kowos su tuku nu yuruk in suk kasru.
Nunku ke eot su kowos tuku kac me,
Ac ke lufin eot ma tafleyukla kowos kac.
2 Nunku kacl Abraham, papa matu tomowos,
Ac kacl Sarah, su oswekowosla.
Ke pacl se nga tuh pangnol Abraham, srakna wangin tulik natul.
Tusruktu nga akinsewowoyal ac sang tulik natul.
Nga akpusye pac fwilin tulik natul.
3 “Nga ac fah akkalemye pakomuta luk nu sin Jerusalem,
Nu selos nukewa su muta in siti lalos ma musalla.
Acn we finne sie acn mwesis, nga fah oru tuh in sie ima,
Oana ima se nga yukwiya Eden.
Engan ac insewowo ac fah oasr we,
Wi on in kaksak ac kulo nu sik.
4 Porongeyu, mwet luk,
Porongo ma nga fahk uh.
Nga sang mwe luti luk nu sin mutunfacl pus;
Ma sap luk fah sang kalem nu selos.
5 Nga fah sa in tuku ac molelosla.
Pacl in kutangla luk apkuranme.
Nga sifacna fah leumi mutunfacl uh.
Acn loessula soano nga in tuku.
Elos tupan ke finsrak tuh nga in molelosla.
6 Ngetak ac liye kusrao; ac liye pac faclu!
Kusrao fah wanginla oana kulasr uh;
Ac faclu fah kulawi oana nuknuk mahi uh,
Ac mwet we nukewa fah misa oana loang uh.
Tusruktu lango su nga ac use fah oanna nwe tok.
Kutangla luk fah tiana safla.
7 “Porongeyu, kowos su etu ma suwohs,
Ac su eis mwe luti luk ac oakiya insia.
Nimet sangeng ke mwet uh angon kowos ac fahk kas in akkolukye kowos.
8 Elos ac wanginla oana nuknuk ma watil uh kangla.
Tusruktu molela su nga use ac fah oan nwe tok.
Kutangla luk ac fah oan ke fwil nu ke fwil.”
9 LEUM GOD, ngutalik ac kasrekut!
Orekmakin ku lom ac molikutla;
Orekmakin oana ke kom tuh oru in pacl oemeet ah.
Kom pa tuh pakpakilya Rahab,*Rahab: soko wet lulap meoa ma srumunyuk in pulengfong lun mwet meet — kutu pacl uh pupulyuki nu ke facl Egypt. wet lulap soko meoa, nu ke ip srisrik.
10 Kom pac pa tuh akpaoyela meoa ah,
Ac orala innek soko sasla inkof uh,
Tuh elos su kom ac molela in ku in fahsr kac.
11 Elos su kom tuh molela
Fah sun acn Jerusalem ke engan.
Elos fah alullul ac sasa ke engan.
Elos ac fah engan ma pahtpat,
Sukosokla liki asor ac sasao nwe tok.
12 LEUM GOD El fahk,
“Nga pa akkeye kowos.
Efu ku kowos in sangeng sin mwet ma sukawil moul la,
Su ac sa na uli oana mah uh?
13 Ya kowos mulkunla LEUM GOD su orekowosla,
Su laknelik kusrao,
Ac oakiya pwelung lun faclu?
Efu ku kowos in muta in sangeng pacl nukewa
Ke folo lalos su akkeokye kowos —
Elos su akola in kunauskowosla?
Kaskusrak lalos tia ku in sifil tuku nu fowos.
14 Ac tia paht, elos su muta in kapir ac fah aksukosokyeyukla.
Elos ac moul arulana paht,
Ac ac fah oasr na mongo nalos.
15 “Nga pa LEUM GOD lowos.
Nga mokleak meoa
Ac oru noa uh in ngirngir.
Inek pa LEUM GOD Kulana!
16 Nga asroelik kusrao
Ac oakiya pwelung lun faclu:
Nga fahk nu sin mwet Jerusalem, ‘Kowos mwet luk!
Nga asot tari mwe luti luk nu suwos,
Ac nga loangekowos ke pouk.’ ”
Saflaiyen Keok Lun Jerusalem
17 Jerusalem, ngutalik!
Sifacna tukaskomyak ac tuyak!
Kom numla tari cup in kaiyuk
Su LEUM GOD El sot nu sum in numla ke sripen kasrkusrak lal;
Kom tuh numla, oru kom tukulkul.Fwack 14:10; 16:19
18 Wangin mwet ac fah pwen kom,
Wangin sie inmasrlon wen nutum
Ac sruokya poum in kasrekom.
19 Oasr mwe ongoiya luo putati fom:
Facl sum sikiyukla ke mweun,
Ac mwet lom misa ke masrinsral.
Wanginla mwet in pakomutom.
20 Ke insruwasrik in inkanek nukewa
Mwet lom elos ikori ke munasla lalos.
Elos oana deer ma srifusryuki sin mwet sruh kosro.
Elos pulakin kuiyen kaskusrak lun God.
21 Kowos mwet keok in Jerusalem,
Kowos su tukulkul oana mwet sruhi,
22 LEUM GOD lowos El loangekowos ac fahk,
“Nga eisla cup se ma
Nga tuh sot nu suwos ke nga kaskusrak ah.
Kowos ac tia enenu in sifil nim
Wain se ma oru kowos tukulkul.
23 Nga ac fah sang cup sac nu selos su tuh akkeokye kowos,
Nu selos su oru kowos oan fin inkanek uh
Na elos fahsr fowos oana infohk uh pa kowos.”
*51:9 Rahab: soko wet lulap meoa ma srumunyuk in pulengfong lun mwet meet — kutu pacl uh pupulyuki nu ke facl Egypt.