14
Pacl in Tuka
LEUM GOD El kaskas nu sik ke sie pacl in tuka.
“Judah el muta in asor;
Wanginla ma orek ke mutunpot lun siti we.
Mwet lal uh ona in fohk uh in asor,
Ac Jerusalem el wowoyak in suk kasru.
Mwet leum uh supwala mwet kulansap lalos in ut kof;
Elos som nu ke nien kof
Tusruktu wangin kof we.
Elos foloko ac wangin koanon mwe neinyuk kof lalos.
Ke sripen elos fohsak ac mwekinla,
Elos okanla mutalos.
Mwet orek ima uh arulana supwarla,
Ac afinya mutalos
Ke sripen wanginna af,
Ac infohk uh paolana.
Soko deer mutan isusla inimae
Ac sisla natu natul ac som,
Mweyen wanginna mah.
Donkey lemnak uh tu fin mangon inging uh
Ac mongolos tuhyak ke mal, oana kosro jackal.
Ohkla mutalos
Mweyen wangin mwe mongo nalos.
Mwet luk elos wowoyak nu sik ac fahk,
‘Ma koluk lasr finne fal in liskutla,
LEUM GOD, kasre kut oana ke kom wulema.
Kut forla liki kom pacl pus;
Kut orekma koluk lain kom.
Kom mukena pa mwe finsrak lun mwet Israel,
Kom na pa molikutla liki mwe ongoiya.
Efu kom ku oana sie mwetsac in facl sesr,
Oana sie mwet fufahsryesr su muta yorosr ke fong se na?
Efu kom oana sie mwet ma lut ke ma sikyak uh,
Oana sie mwet mweun ma tia ku in kasru?
LEUM GOD, kom muta inmasrlosr!
Eteyuk kut lah kut mwet lom;
Nimet siskutla.’ ”
10 Pa inge ma LEUM GOD El fahk ke mwet inge: “Elos lungse in kaingla likiyu, ac tia sifacna karingin ouiyalos. Ke ma inge, nga tia insewowo selos. Nga fah esam orekma tafongla lalos, ac kalyaelos ke sripen ma koluk lalos.”
11  LEUM GOD El fahk nu sik, “Nik kom siyuk sik in kasru mwet inge. 12 Elos finne lalo, nga fah tia lohng pusren tung lalos. Elos finne oru mwe kisa firir ac mwe kisa wheat nu sik, nga ac fah tia engan kac. A nga fah onelosi ke mweun ac ke sracl ac ke mas.”
13 Na nga fahk, “LEUM GOD Fulatlana, kom etu lah mwet palu elos fahkang nu sin mwet uh lah ac fah wangin mweun ku sracl, mweyen elos fahk mu kom wulela tari mu ac fah oasr misla mukena in facl sesr uh.”
14 Na LEUM GOD El topuk, “Mwet palu elos kaskas kikiap Inek. Nga tiana supwalos, ac nga tia sapkin elos in oru kutena ma, ku fahkang kutena ma nu selos. Aruruma elos fahk uh tia ma sik. Kas in palu lalos ma na elos sifacna kinauk ac wanginna sripa.
15 Nga, LEUM GOD, fahk nu sum ma nga ac oru nu sin mwet palu ingan su nga tia supu a elos kaskas Inek, ac fahk mu mweun ac sracl fah tia sun facl se inge. Nga fah onelosi ke mweun ac ke sracl. 16 Ac funu mwet ma elos fahk ma inge nu se, ac fah anwuki pac elos ke mweun ac ke sracl. Manolos ac fah sisilana ke inkanek Jerusalem. Ac fah wangin mwet in puknelosi. Ma inge ac sikyak nu selos nukewa — mukul, mutan, ac tulik. Nga ac fah oru nu selos fal nu ke ma koluk lalos.”
17  LEUM GOD El sapkin nu sik in fahkang nu sin mwet uh ke asor luk. Na nga fahk:
“Lela sroninmutuk in soror ke len ac fong.
Lela nga in tia tui ke tung,
Mweyen acn virgin nutik — su mwet luk — arulana kinkineta
Ac apkuran in misa.
18 Ke nga illa nu likin siti uh,
Nga liye monin mwet anwuki ke mweun.
Ke nga som nu in siti srisrik,
Nga liye mwet misa ke masrinsral.
Mwet palu ac mwet tol uh oru na orekma lalos,
Tusruktu elos tia etu ma elos oru.”
Mwet uh Kwafe Nu Sin LEUM GOD
19  LEUM GOD, ya kom ngetla na pwaye liki Judah?
Ya kom srunga mwet Zion?
Efu kom ku puok kut
Pwanang kut apkuran in misa?
Kut suk misla, a wangin ma wo sikyak;
Kut finsrak mu kut ac kwela, a mwe aksangeng mukena pa kut liye.
20 Kut orekma koluk lain kom, LEUM GOD;
Kut fahkak ma koluk lasr sifacna
Ac ma koluk lun mwet matu lasr.
21 Esam wuleang lom ac nimet ngetla liki kut;
Nimet akmwekinye acn Jerusalem,
Acn sin tron wolana lom.
Karinganang wuleang se kom orala inmasrlosr, ac tia kunausla.
22 Ma sruloala uh tia ku in supwama af;
Pukunyeng uh tia ku in sifacna oru in afi.
Kom na pa oru ma inge,
Pwanang kut filiya finsrak lasr in kom, LEUM GOD lasr.