NAHUM
Tukakinyen Book Lal NAHUM
Book lal Nahum el soko on in engankin musalla lun Nineveh, siti fulat se lun mwet Assyria, su nuna lain ac akkeokye mwet Israel in pacl oemeet ah me. Nunkeyuk mu musalla se inge sikyak yac onfoko kutu B. C. (meet liki Christ). Mwet uh akilen mu nununku lun God pa inge nu fin sie mutunfacl inse fulat ac sulallal.
Takla Lun Koanon Book Se Inge
Nununku nu fin Nineveh 1:1–15
Musalla lun Nineveh 2:1—3:19
1
Pa inge kas ke acn Nineveh, oana ma liyeyuk in sie aruruma lal Nahum, sie mwet Elkosh. 1:1—3:19; Isa 10:5–34; 14:24–27; Zep 2:13–15
Kasrkusrak Lun LEUM GOD Lain Nineveh
LEUM GOD El sie God loloik,
El kalyaelos su lainul.
El foloksak nu selos ke kasrkusrak lal.
LEUM GOD El tia sa in kasrkusrakak,
Tusruktu El arulana ku,
Ac pacl nukewa El kalyei mwet su oru ma koluk.
 
Yen LEUM GOD El fahsr we, eng upa ac sikyak;
Kutkut in ye nial orala pukunyeng uh!
El sap ku nu sin meoa, ac meoa paola!
El akpaoyela pac infacl uh.
Ima in acn Bashan uli,
Insroan fineol Carmel srusrala,
Ac ros in acn Lebanon efla.
Eol uh kusrusr ye mutun LEUM GOD,
Eol srisrik uh kofelik ye mutal.
Faclu usrusryak ke pacl LEUM GOD El sikla;
Faclu ac mwet nukewa fac rarrar.
Ke pacl El kasrkusrak, su ku in moulla?
Su ku in moulla liki foloyak lal?
El okoala fulen kasrkusrak lal;
Eot uh mwesri nu ke kutkut ye mutal.
 
LEUM GOD El wo;
El loango mwet lal in pacl in ongoiya;
El karinganulos su nget nu sel.
El arulana kunausla mwet lokoalok lal oana sie sronot lulap su fungla.
El supwala mwet su lainul nu infulan misa.
Mea kowos pwapa sulali sang lain LEUM GOD?
El ac kunauskowosla.
Wangin mwet ku in alein nu sel pacl luo.
10 Kowos su lungse sruhi ac fah isisyak
Oana kokul su pinpinla ac sroan mah pao.
11 Oasr sie mwet su tuku liki kom, Nineveh, sesseslana ke pwapa sulal elan oru lain LEUM GOD. 12 Pa inge ma LEUM GOD El fahk nu sin mwet Israel, mwet lal: “Mwet Assyria finne ku ac pus suna, elos ac fah kunausyukla ac wanginla. Mwet luk, nga tuh akkeokye kowos meet, tusruktu nga fah tia sifilpa oru. 13 Inge nga fah aksafyela ku lun Assyria fowos, ac wotyalik sein ma kaprikowosi.”
14 Pa inge ma LEUM GOD El wotela ke mwet Assyria: “Ac fah wangin tulik natulos in folokonak inen sou lalos. Nga fah kunausla ma sruloala su oan in tempul lun god lalos. Nga akoo sie kulyuk nu sin mwet Assyria — tia fal elos in moul!”
15 Liye, mwet roso se pa tuku fineol uh me ingo, ac use pweng wo! El fahsr in sulkakin ke kutangla! Mwet Judah, oru kufwa in akfulat lowos an, ac sang nu sin God ma kowos wulela ku mu kowos ac sang nu sel an. Mwet koluk fah tia sifilpa utyak mweuni acn lowos. Wutiyukla na pwaye elos! Isa 52:7

1:1 1:1—3:19; Isa 10:5–34; 14:24–27; Zep 2:13–15

1:15 Isa 52:7