5
[Psalm lal David]
Sie Pre Ma Siyuk Ke Karinginyuk
1 Porongo kas luk, O LEUM GOD,
Ac lohng sasao luk.
2 Lohng pusren tung luk ke nga pang nu sum,
O God luk ac tokosra luk!
Nga pre nu sum, O LEUM GOD.
3 Kom lohng pusrek ke lotutang,
Ke faht uh takak nga oru pre luk
Ac soano top lom.
4 Kom tia sie God su insewowo ke ma koluk,
Ac kom tia lela mwet koluk in muta yurum.
5 Kom tia lela mwet enum in kaskas in tu ye motom,
Ac kom srunga mwet koluk nukewa.
6 Kom kunausla mwet nukewa su kaskas kikiap
Ac kom kwase mwet akmas ac mwet sulallal.
7 Tuh ke sripen lungse yohk lom
Nga ku in utyak nu in lohm sum.
Nga ku in alu in Tempul mutal sum
Ac epasr nu sum ke nga sunakin kom.
8 LEUM GOD, arulana pukanten mwet lokoalok luk!
Kolyu tuh nga in oru ma lungse lom.
Oru tuh in kalem sik inkanek lom nga in fahsr kac.
9 Kas ma mwet lokoalok luk elos fahk, tia ku in lulalfongiyuk;
Elos lungsena kunausla.
Kas lalos emwem ac aklukuk,
Tusruktu ma inge mwe na kolla mwet nu ke misa. Rom 3:13
10 O God, sang mwatalos ac kaelos;
Lela tuh pwapa koluk lalos in kunauselosla sifacna.
Luselosyak liki ye motom
Ke sripen ma koluk pus lalos
Ac ke sripen elos lain kom.
11 A elos nukewa su konauk molela yurum fah enganak;
Elos in on ac engan pacl nukewa.
Karinganulosyang su lungse kom;
Ke sripom elos arulana engan.
12 O LEUM GOD, kom akinsewowoyalos su akos kom;
Lungse lom karinganulos oana sie mwe loeyuk.