8
[Psalm lal David]
Wolana Lun God Ac Saok Lun Mwet Uh
1 O LEUM GOD, kom Leum lasr;
Fulat lom akilenyuk fin faclu nufon!
Kaksakinyom sowak sun kusrao,
2 Onkakinyuk sin tulik srisrik ac tulik fusr.
Kom oakiya sie pot ku in kosrala mwet lokoalok lom
Tuh kom in tulokinya kutena mwet su lain kom. Mt 21:16
3 Ke nga ngetak ac liye kusrao su kom orala,
Malem ac itu, su kom oakiya in acn selos,
4 Mea mwet, tuh kom in nunku kacl;
Ac mea se mwet uh, tuh kom in saokkin? Job 7:17–18; Psa 144:3; Heb 2:6–8
5 Nwe ouinge, kom oru tuh elos in pusisel kutu srisrik liki kom,
Ac sonelosi ke wolana ac sunak.
6 Kom oru tuh elos in leum fin orekma nukewa lun poum;
Ac filiya ma nukewa ye nialos: 1 Cor 15:27; Eph 1:22; Heb 2:8
7 Sheep ac cow, oayapa kosro nukewa inimae,
8 Won yen engyeng uh, ac ik in meoa,
Ac ma moul nukewa inkof uh.
9 O LEUM GOD, kom Leum lasr,
Fulat lom akilenyuk fin faclu nufon!